Ads by Google Ads by Google

E LE O OE O SE SULI MONI

Vaega 46

 

Ua le iloa e auauna poo le a se gaioiga la te faia ina ua la vaaia le mafatia o le fafine faiaoga o Ianeta i totonu o le vaega o le falema’i lea o loo latou nofonofo ai, ma fa’atalitali se ripoti mai le Foma’i e tusa ai o le tulaga o le gasegase o le tama’ita’i pologa o Ianeta lea ua i ai i le taimi lea. E lei manatu o Lucy e matuia se tulaga o le gasegase o Ianeta, ae na avea le umi o le taimi na latou fa’atali ai ma auauna i fafo mo se toe fo’i ane o le foma’i e logo ane i latou i le tulaga o lona ma’i, na manatu ai loa Lucy, e foliga mai e fai lava si matuia o le tulaga ua oo i ai le soifua maloloina o Ianeta, ae na manatu le tama’ita’i faiaoga e onosa’i pea ma fa’atali i se tala e ono fa’ailoa ane ia tei latou.

 

Sei o tatou liliu atu lava i le sailiga o le tamaloa o Meki lea o loo fa’agasolo pea lava i le taimi lea. O lea ua silia i le vaiaso o sailia le tamaloa o Meki, ma ua le iloa fo’i e fitafita a le malo poo fea tonu se vaega o atumauga o le malo e saili i ai le ali’i pagota, aua o lea ua soo uma vaega o atumauga i le isi itu o le malo e le o i ai lava se fa’ailoga e iloa ai sa ia uia lea itu o le atunu’u, e oo fo’i i le itu e aga’i atu i le auala, ua leai se itu o le vaega o le malo e le o tiute ai fitafita ma auauna a le tupu saua o Eteuati II, ona o le naunau lava ina ia toe maua mai le tagata lenei o Meki, ina ne’i toe sao atu o ia i fafo atu o le malo, peita’i o le tamaloa o Meki, e le o mamao lava se vaega o le malo o loo lafi ai o ia, ma ua lagona fo’i lona vaivai ma le fia ‘ai, o lea ua silia i le vaiaso talu ona sola ese mai, ma ua lagona fo’i lona fia maua o se malologa ma se mapusaga. O lea e fa’agasolo le sailiga o Meki i luga o atumauga o le atunu’u, ae o loo fa’agasolo fo’i i le taimi lava lea e tasi le fa’atalatalanoaina o tagata pologa o le malo, poo ai na ia fa’asolaeseina Meki mai le potu sa taofia faapagota ai o ia.

 

“Afai e maua le tagata pologa na ia tatalaina Meki ma fa’asolo ese atu ma le malo, o le a oo le oti i lea tagata fa’apea ai ma lona aiga”, o le fa’atonuga lea sa tu’uina atu e le ta’ita’i fitafita lea o loo gafa ma le suesueina o le tagata na ia fa’asolaeseina le alii pagota o Mei, ae o le ali’i pologa lea na ia tatalaina loka sa loka ai lima o Meki, ua le toe vaaia o ia i totonu o le malo i le taimi lea, ao lea ua aga’i atu nei lana sola’aga e tuliloa le sola’aga a Meki i totonu o le vaomatua, ma le fa’amoemoe la te sailia se auala e sosola ese ai ma le malo o tagata pologa, ina ia maua ai se saolotoga. O le ali’i pologa lea ua sola ausulusulu i atumauga o le malo, ua lava lona silafia i vaega eseese o le vaomatua, ua ia masani fo’i i vaega o le vaomatua o loo nonofo ai manu feai, atoa ai ma vaega e maua i ai le lafitaga mo ia. Ao fa’aauau lana solaaga, na fa’afuase’i ona ia tau atu i ni tulaga vae o se tagata, ma e foliga mai o ni tulaga vae e lei leva ona i ai, ae to’atasi fo’i le tagata e ana le tulaga vae, ona ia mulimuli ai loa lea i le asaga o loo i ai tulaga vae o le tagata lea ua ia mauaina seia oo atu lava i le tumutumu o le isi auvae mauga, ae fetaui loa ma le pogisa o le aso, ma faia ai loa lana malologa i lalo o se laau tele lava. Ao malolo le ali’i pologa i lalo o le laau, na fa’afuase’i ona ia fa’alogoina se leo o se tagata e foliga mai o loo pese, ma ua avea le ta’aligoligoa o le po ma auala na manino ai lana fa’alogo, o le leo lea o loo aumai e le savili, o le leo o se tagata o loo pese, o lea na ia tula’i ai ma taumafai loa e asa atu i le gaoa o laau ma le togavao ina ia mafai ona ia taunu’u i le vaega tonu o loo sau ai le leo o le tagata, ae ina ua laatalata atu le alii pologa i le nofoaga o loo sau ai le leo, sa muamua tau lana vaai i se malamalama e foliga mai o se moli o loo mumu mai lalo o se laau tele lava, ae o le taimi fo’i lea ua ia fa’alogoina ai le latalata mai o le leo o le tagata o loo pese.