Na teena e le Pule o le Ofisa o Tiute ia Moetulu’i Fuiava, ripoti e fa’asaga i le le saogalemu o le atunu’u lautele i soo se taimi e fa’aaoga ai masini (Rapiscan) e su’e ai uta o oloa mai fafo i luga o le uafu, ina ua fesiligia o ia e afioga i Senatoa i se iloiloga sa faia i le taeao ananafi.

Saunoa Moetulu’i e fa’apea, o taimi uma lava e fa’aaoga ai le masini e fa’atino ai le sailia o uta o loo aumai i totonu o containers i luga o le uafu, e puipuia uma le itu o le uafu o loo i ai le masini, ina ia mautinoa e malupuipuia le saogalemu o tagata lautele aemaise ai le aufaigaluega o loo galulue i luga o le uafu.

O le ilolioga a le maota maualuga sa fa’ataunu’uina i le taeao ananafi, i lalo o le ta’ita’iga a le afioga i le ali’i senatoa ia Magalei Logovi’i o le ta’ita’i komiti, o le fiamalamalama lea o afioga i Senatoa i le tulaga o loo i ai le fa’aaogaina o Rapiscan fou a le malo, ae pe afaina fo’i le atunu’u i le malosi (radiation) e maua mai i le masini i le taimi e fa’aaoga ai.

O molimau sa auai i le iloiloga e aofia ai le Teutupe a le malo ia Ueligitone Tonumaipe’a, o le Fa’atonusili o le Pulega o Uafu ma Malaeva’alele ia Taimalelagi Dr. Claire Poumele, o le Pulesili o le Ofisa o Tiute ia Moetulu’i, ma ali’i Inisinia e to’alua mai le teritori o Guam o loo galulue fa’atasi ma le Ofisa o Tiute i le tausia lelei o masini.

Na taua e le afioga i le sui peresetene ia Nuanuaolefeagaiga S. Nua i molimau, le to’atele o le atunu’u o loo fa’asea i le le saogalemu o le soifua o le to’atele o le atunu’u i taimi e fa’aaoga ai masini i luga o le uafu, ma ua avea ma auala ua poloka ai le fegasoloa’i o le atunu’u lautele i totonu o le uafu ma le aga’i mai i fafo o le uafu.

Saunoa Moetulu’i e fa’apea, o taimi uma lava e fa’aaoga ai masini mo le su’eina o container i luga o le uafu, e puipuia uma lava lea vaega o le uafu ina ia mautinoa le saogalemu o le aufaigaluega ma tagata fegasoloa’i, e oo fo’i i le fa’aaogaina o masini, e lua ituaiga auala e mafai ona fa’aaoga e le aufaigaluega, o le tu o le masini ae ui ai loli o loo i ai container i luga, poo le tutu o loli o loo ave ai i luga container ae fealua’i le masini e fa’atino lana galuega.

“E le sa’o fa’asea e fa’apea e umi le taimi e taofi ai le feoaiga a tagata, e na o le tasi lava le minute e alu ai le lalo ma lana uta i lalo o le masini ae mae’a ona fai le suega, afai fo’i e i ai se tagata e latalata ane i le vaega o loo i ai le masini, e fa’afuase’i lava ona pe le masini ona o isi auala uma ia e fa’atinoina mo le saogalemu o tagata”, o le saunoaga lea a Moetulu’i.

O se tasi o fa’asea mai ni isi o le aufai pisinisi e pei ona fa’aleo e le senate, o le eseese o tau o loo totogi e le atunu’u e saili ai a latou uta, peita’i na fa’amanino e Moetulu’i e fa’apea, e le o i ai se suiga i tau e totogi e su’e ai uta a tagata, ae o loo tumau pea tau e pei ona pasia atu i le tulafono, e pei o le $200 mo container e 20 futu le uumi e oo atu i le 40 futu, o le ta’i $50 pe a su’e ta’avale ma isi lava uta ma fa’amomoli mo tulaga tau pisinisi, ae $10 e su’e ai uta ma fa’amomoli a aiga ma tagata ta’ito’atasi.

Na taua e le afioga i le ali’i senatoa ia Tuaolo M. Fruean le lagolagoina e ni isi o tagata faipisinisi a le atunu’u o masini ia ua fa’aaoga e le malo, e saili ai uta mai fafo, ina ia malupuipuia ai le aumaia fa’anana o fualaau mai fafo, aemaise ai le aumaia fa’anana o oloa ina ia le mafai ai e le malo ona totogi lafoga o nei oloa.

Na fesili Tuaolo pe moni fa’asea fai mai a ola le masini ona tele lea o le malosi (radiation) e alu i fafo ma a’afia ai tagata, ae na saunoa Moetulu’i e fa’apea, e leai se malosiaga e alu i fafo mai le masini i le taimi e fa’atino ai ana galuega, ae nofo uma lava i totonu o le masini atoa ai ma le aofa’i o le nofoaga atoa lea ua fa’atulaga e faia ai galuega i le tele e 131 futu e oo atu i le 164 futu fa’atafafa (sq ft).

Ina ua fesiligia e le afioga i le ali’i senatoa ia Paepae Faiai le Teutupe e fa’atatau i le tupe na fa’aalu e fa’atau mai ai masini, atoa ai ma le vaavaaia lelei o masini ina ia tumau le lelei ma umi ona fa’aaoga, na saunoa ai Tonumaipe’a e fa’apea, e $5.9 miliona le tupe na fa’atau mai ai e le malo masini e 4 lea ua fa’aaogaina i le taimi nei, ma o ali’i inisinia mai Guam e to’alua o loo galulue ma le Ofisa o le Tiute i le vaavaaia atoa ai ma le tausia lelei o masini, o sui ia o le kamupani na fa’atau mai ai masini, o loo fa’atinoina e i laua le isi vaega o le konekarate sa sainia ma le kamupani, o le galulue lea e tausi ma vaai lelei masini mo le 3 tausaga.

O le fesili pe aoga nei masini mo le atunu’u aemaise ai o le taumafai e taofia le aumaia fa’anana o fualaau fa’asaina i le atunu’u, na saunoa ai Moetulu’i e fa’apea, e le toe i ai se oloa e sao pe afai e aumai fa’anana i totonu o le atunu’u, ona e eseese uma lava lanu o oloa eseese e mafai ona ta’u mai e le masini i le taimi e su’e ai uta e ulufale mai i le atunu’u.

Mo se fa’ata’ita’iga o le pauta oona o le aisa, afai ae aumai fa’anana i totonu o ni uta, e iloa gofie lava i le masini, pe afai e fa’aali mai le lanu uliuli, ona iloa lea o vaega ia o le pauta o le aisa lea o loo aumai i le uta.

“O isi ituaiga oloa lea ua tele ina fa’aaoga e tagata e aumai fa’anana ai fualaau mai fafo, o totonu o sipika, ona e manatu isi, e faigata e le masini ona su’e oloa e kava o latou tino i le u’amea, ae ou te fia fa’ailoa atu e fa’apea, e mafai e le masini ona su’e oloa e aumai i totonu o u’amea e 12 inisi le mafiafia, o le malosi lena ma le tulaga lelei o masini fou ia ua i ai nei”, o le saunoaga lea a Moetulu’i.

O le itula e 8:30 i le taeao nei lea ua fa’amoemoe e faia ai fo’i le iloiloga a le maota o sui mo le talanoaina o le mataupu lava lenei e fa’atatau i masini.