PAgo Pago - AMERIKA SAMOA

O le aoauli o le aso 12 o Aperila, 2024 na lipotia ai e se tama loto mafatia ia le susuga ia Ieremia Mapusaga, i lona po ina o lona atalii e 13 tausaga.

Ina ua taunu’u leoleo i le nofoaga na tupu ai le faalavelave, sa faamatalaina iai e le tama loto mafatia i leoleo, le alu atu o Mapusaga ma faato’ese atu ia te ia, i le po ina o lona atalii.

Sa faamatala e le tama, a’o ia oteina le ua molia, sa amata ona faamisamisa atu Mapusaga ia te ia.  Ma ona e le i mana’o le tama e tupu se faalavelave pe soli se tulafono, o lea na ia alu ese atu ma agai atu i lona aiga.  Ae peitai, sa ia fa’alogoina le pa’o o se mea i tua o lana ta’avale, e pei ua togi e seisi.

Ina ua faatalanoaina e leoleo ia le atalii o lenei tama, sa ia faamatalaina e faapea, a’o fai se la talanoaga ma seisi alii, na faate’ia o ia, i le alu atu o Mapusaga ma po o ia.

E tusa ai ma faamaumauga a le malo, e leai ni manu’a na va’aia i foliga o le na a’afia i lenei faalavelave.

Sa faapea ona aveina atu e leoleo ia Mapusaga i le Ofisa a Leoleo i Tafuna mo le fa’aauauina o a latou suesuega.  Ma sa faamatalaina e le ua molia, e fa’atasi ona ia po ina ia le alii 13 tausaga, ona o lona ita tele, i le le ano atu o le alii 13 tausaga, ae o lo’o ia talanoa atu iai.

Ae sa te’ena e le ua molia ia tu’uaiga e faapea sa ia togiina le ta’avale a le tama a le alii 13 tausaga, pe sa ia taumafai foi e faamisa i lea tama.

Ua molia nei Mapusaga i le moliaga o le Faao’olima i lona Tulaga e Tolu – o se vaega ‘A’ o solitulafono mama, lea e mafa ona nofosala ai se tasi i le o’o atu i le tausaga e tasi (1), po o se sala tupe e $1,000; po o faasalaga uma e lua.

E $1,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.