Ads by Google Ads by Google

Tu’u avanoa le Fa’amasino i ali’i e to’alua tausala i le umia fualaau faasaina


[ata: foa'i]
ausage@samoanews.com

Pago Pago - AMERIKA SAMOA

 

E 5 tausaga lea ua faamalumalu ai e le Fa’amasinoga le tuuina atu o sana faasalaga faasaga i ni ali’i se to’alua lea ua ta’usala i lo la le usitaia o tulafono tau Fualaau Faasaina a Amerika Samoa, ina ua faamaonia e le Fa’amasinoga moliga faasaga ia te i laua.

 

O le mataupu e pei ona nofosala ai alii nei e to’alua i luma o le Fa’amasinoga, na alia’e mai ina ua taofia e Leoleo se ta’avale na la malaga ai i le masina o Oketopa o le tausaga na te’a nei, ae maua ai vaega o le pauta faasaina ia te i laua.

 

O i laua ua nofosala i luma o le Fa’amasinoga e aofia ai Tisena Leota ma Taumaia Valaau, na malaga asiasi mai i o la aiga i Amerika Samoa nei ma le fa’amoemoe, a mae’a le faamanatuina o Aso Fiafia iinei, ona toe fo’i atu lea i Amerika i le nofoaga o loo aumau ai.

 

O le masina na te’a nei na tutula’i ai i laua ua ta’usala i lenei i luma o le Faamasinoga mo le tuuina atu o se faaiuga faasaga i le la mataupu. 

 

Na ulua’i tu’uaia le susuga a Leota ma Valaau i le moliga mamafa o le umia faasolitulafono o vaega o le pauta faasaina o le aisa, o se solitulafono e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e le silia i le $20,000. 

 

Ae i lalo o se maliliega na sainia e le malo ma i laua e ta’usalaina nei, na malilie ai i laua e tali ioe i le solitulafono o le umia faasolitulafono o vaega o le pauta faasaina o le aisa, o le solitulafono mamafa e mafai ona faasala ai se tasi i le Toese e oo atui le 5 tausaga, pe faasala i le salatupe e mafai ona oo atu i le $5,000, pe faasala fo’i i faasalaga uma ia e lua.

 

I le tali ioe ai o Leota ma Valaau i le solitulafono ua ta’usala ai i laua, na la ta’utino ai e fa’apea, i se taimi o le aso 13 o Tesema i le tausaga na te’a nei i Amerika Samoa, na la umia faasolitulafono ai vaega o le pauta faasaina o le aisa.

 

Na ioe Leota e faapea, ina ua sailia e Leoleo lona tino i le aso e pei ona taua, na latou maua ai se paipa tioata o loo i ai vaega o le pauta faasaina o le aisa. Na tautino fo’i le susuga a Valaau e fa’apea, ina ua sailia e Leoleo lona tino i le aso e pei ona taua, na latou maua ni tama’i pepa iila se 2 o lo o i ai vaega o le pauta faasaina o le aisa.

 

O fualaau faasaina na maua ia i laua ua ta’usalaina nei e le Fa’amasinoga, sa la tautino i le Faamasinoga e fa’apea, o mea sa faamoemoe e fa’aaoga mo i laua lava.

 

Talu mai le aso na pu’e faapagota ai e Leoleo i laua nei e to’alua, na taofia ai pea i laua i le Toese i Tafuna e le i tatalaina i tua, ina ua le mafai ona la totogi le tupe e $5,000 a le tagata e to’atasi na faatulaga e tatala ai i laua i tua.

 

Ae ina ua mae’a ona talia e le Fa’amasinoga le maliliega na sainia e i laua nei ma le malo i le masina o Ianuari o le tausaga nei, na talosaga ai loa le la loia fautua i le Fa’amasinoga, mo se poloaiga e tatala ai i laua i tua e faatali ai le aso e lau ai le la faasalaga, lea fo’i na talia e le Fa’amasinoga.

 

Na taua e le Loia Fautua sa tula’i mo i laua ua ta’usalaina nei i le Fa’amasinoga e faapea, o alii nei e to’alua, na malaga asiasi mai i o la aiga i le faaiuga o le tausaga na te’a nei, ma le faamoemoe e toe taliu atu i Hawaii i le masina o Ianuari, peita’i, ua avea le faalavelave e pei ona molia ai i laua ua tuai ai ona toe fo’i atu i lo la aiga. 

 

Na talia e le Fa’amasinoga le talosaga a le itu tete’e, ma faia ai loa le poloaiga ina ia tatala i tua le susuga a Leota ma Valaau e aunoa ma se tupe la te totogiina, e faatali ai le aso e lau ai le la faasalaga i le masina na te’a nei. Na fautuaina foi e le Faamasinoga i laua nei, e le tatau ona la toe tagofia fualaau faasaina, e tatau fo’i ona faia ni suega i o la tino e faamaonia ai, la te le o toe tagofie fualaau fa’asaina.

 

Ina ua maua le avanoa o alii e to’alua ua ta’usalaina nei mai le Faamasinoga mo sa laua faamatalaga a o le i tuuina mai se faaiuga faasaga i le la mataupu, na la faatoese ai loa e tusa ai o le solitulafono sa laua faia, ma la talosagaina ai se avanoa e toe foi atu ai i Hawaii i lo la aiga o loo faatali mai

 

Na faafetaia le susuga a Leota le Faamasinoga e tusa ai o le taimi na taofia ai o ia i le Toese i Tafuna, lea ua mafai ai ona faapupula e le Atua lana vaai ma ia iloa ai le leaga o le solitulafono. Sa ia taua fo’i lona maua o se lesona taua mai le taimi na nofo ai i le Falepuipui,lea ua mafai ai ona ia faavasega le lelei ma le leaga. 

 

Na ia faatoese i le Faamasinoga mo lana solitulafono, ma talosaga i ai mo se avanoa e toe fo’i atu ai i lona aiga. O le talosaga lava fo’i lea e tasi ma faaleo e le susuga a Valaau ina ua maua lona avanoa e talosaga ai i le Fa’amasinoga.

 

Na saunoa le susuga a Valaau e fa’apea, e ui e laititi se taimi na faaalu e nofo ai i le Toese, ae ua ia iloa ai le tele o mea aoga sa ia misia i lona olaga faapea ai lona aiga. E le gata ua ia misia le faamanatu faatasi o le Kerisimasi ma le Tausaga fou ma lona aiga, ae ua misia ai fo’i ma le faamanatuina o lona aso fanau, o le mafua’aga lea e tasi na ala ai ona la malaga mai i Amerika Samoa nei.

 

Na talosaga le la loia fautua mo se faasalaga mama e aunoa ma le toe tuuina atu o se isi taimi e faaopoopo e tuli e i laua nei i le Toese i Tafuna. Na faamatala e le Loia Fautua i le Fa’amasinoga e fa’apea, o le filifiliga sese na faia e i laua nei e to’alua, ua mafua ai ona tele aso ua taofia ai i laua i totonu o le teritori.

 

O le faanaunauga o le au alii lenei e pei ona taua e le loia fautua, o le toe fo’i atu lea e fa’aauau le olaga o lo o ola ai i Hawaii, e le gata i galuega ae o aoaoga fo’i. O ni ali’i e lelei lo la a’oa’oina e pei ona taua e le loia fautua i le Fa’amasinoga.

 

Na lagolago e le loia a le malo le talosaga a le itu tete’e, ma ia finau ai ina ia faasala i laua ua molia i se faasalaga faanofovaavaaia, pe afai e finagalo i ai le Fa’amasinoga.

 

A o le i tuuina atu le faaiuga a le Fa’amasinoga, na fesili le Faamasinoga i le au alii ua ta’usala ina ia faamanino le mataupu e faatatau i le la toe fo’i atu i Hawaii, pe manatu e nonofo mau i Amerika Samoa. Na tali i laua, o laua e toe fo’i atu i Hawaii.

 

Na taua e le Fa’amasinoga e fa’apea, e ui e i ai vaega o le Iunaite Setete e faataga ai ona fa’aaoga le mariuana mo togafitiga o nisi o tagata, peita’i e leai se vaega o le malo tele e fa’ataga ai le pauta o le aisa.

 

Ua manatu le Faamasinoga e faamalumalu le tuuina atu o sana faasalaga mo i laua ua nofosala i totonu o le 5 tausaga. O nisi o poloaiga ua tuuina atu mo i laua ua ta’usalaina nei e tatau ona usita’i i ai, e aofia ai le faasa lea ona la toe latalata i le nofoaga o le “Le Filifili”, poo isi fo’i nofoaga o loo feofeoa’i ma feiloa’i ai i latou o loo tagofia fualaau fa’asaina.

 

A o i ai i laua i Amerika Samoa e faatali ai le aso e toe malaga atu ai i o la aiga i Hawaii pe a toe tatala femalagaaiga a va’alele, e tatau ona la asiasi i le Ofisa Nofovaavaaia i masina taitasi, e le tatau fo’i ona la toe tagofia le ‘ava malosi poo fualaau fa’asaina. Na fautua malosi le Faamasinoga i laua nei e to’alua, afai la te le usitaia le poloaiga o le nofo mama mai fualaau faasaina poo le ‘ava malosi, e ono mafai ona faasala i laua e le Fa’amasinoga i se fasalaga faa falepuipui e sili atu ona umi nai lo le 90 aso.