Ads by Google Ads by Google

Tumau pea ona i ai i le atunu’u le fafine Filipino na fa’atonu e alu ese

ausage@samoanews.com

O lo o tumau pea ona i ai i le atunu’u le fafine mai le atunu’u o Filipaina lea na fa’atonu e le Komiti Fa’afoe a le Ofisa o Femalagaaiga e tula’i ese ma le atunu’u, e ui o lea ua tuana’i aso e 10 na tuuina atu e alu ese ai.

 

O le aso Faraile na te’a nei, Aokuso 3, 2018 na atoa i ai le 10 aso lea na tu’u atu e le Komiti Fa’afoe ia Joselyn M. Intila e tatau ai ona ia tuua le atunu’u i lona lava loto malie, talu mai le aso o lana iloiloga, le aso 23 Iulai, 2018.

 

Na fa’amaonia mai e se sui o le Ofisa o Femalagaaiga e le i finagalo e fa’alauiloa lona suafa i le Samoa News, o lo o i ai pea lava i le atunuu ia Intila.

 

E talitonu le Samoa News sa faia feutanaiga i le va o loia mai le Ofisa Loia a le RDA o lo o tula’i mo Intila, ma le loia a le malo o lo o gafa ma le taulimaina o lenei mataupu, mo se maliliega e faai’u fa’alelei ai lenei mataupu, aemaise lava taumafaiga mo le totogiina o le salatupe lea ua tuuina atu e le Komiti Fa’afoe ia Intila.

 

Na taua e se molimau fa’atuatuaina i le Samoa, le leai o se taunuuga lelei na maua i feutanaiga sa faia i le vaiaso na te’a nei i le va o loia, ma e foliga mai e i ai le avanoa e ono tofu atu ai lenei mataupu i luma o le Fa’amasinoga na te fa’amasinoina Mataupu Tau Pulega (Administrative Law Judge) mo le suesueina atili o lenei mataupu.

 

O kopi o le fa’aiuga a le Komiti Fa’afoe sa tuuina atu lea i le afioga i le Loia Sili a le malo, tofa Talauega Eleasalo Ale, o le afioga i le ali’i Kovana ia Lolo Matalasi Moliga, o le Lutena Kovana ia Lemanu Peleti Mauga, ma le Pulesili o le Ofisa o Femalagaaiga, afioga Peseta Dennis Fuimaono.

 

E le gata na fa’atonu e le Komiti Fa’afoe ia Intila na te tuua le teritori i totonu o aso e 10, ae sa poloaina fo’i o ia na te totogi le salatupe e $2,000.

 

Na taua e le Komiti Fa’afoe i lana faaiuga tusitusia le mae’a lea ona latou iloilo ma le toto’a o le talosaga sa tuuina atu e Intila, mo se teuteuga e fa’atatau i le umi e le mafai ai ona ia toe ulufale mai i Amerika Samoa.

 

O le mae’a ai la ona iloilo e le Komiti Fa’afoe o tulaga uma e uiga i lenei mataupu, na faia ai loa le fa’aiuga ina ia lava le tausaga e tasi e fa’asa ai ona toe ulufale mai Intila i le atunu’u.

 

“O se faaiuga sa e faia atoa ai ma tali sa e tuuina mai i luma o le Komiti Fa’afoe i le aso o lau iloiloga, ua fa’amaonia mai ai lou le usitaia o tulafono o Femalagaaiga a le malo o Amerika Samoa,” o se vaega lea o le fa’aiuga.

 

“O se tasi o vaega o le tulafono ua e le usitaia, o lou musu lea e fa’afou lou ID e fa’ataga ai ona e nofo i Amerika Samoa mo le isi tausaga e tasi. O lou ID na mae’a lona aoga i le aso 31 o Me, 2018, o le taimi nei la, ua ta’ua oe o se tagata o lo o nofo fa’asolitulafono i Amerika Samoa. Ua poloaina oe e te totogiina le salatupe e $1,000 e tusa ai o lou musu e fa’afou lou ID.”

 

“O le isi vaega o le tulafono o Femalagaaiga ua e le usitaia, o le suia lea o le nofoaga ua te nofo ai, ma ua e alu ese mai lau sponsor e aunoa ma lou fa’ailoaina mai i le Komiti Fa’afoe. Ona o lea tulaga, ua fa’asala ai oe i le $1,000.”

 

“O vaega la nei o le fa’aiuga e tatau ona e aloaia, ia e tuua nei loa Amerika Samoa, ia le silia i le aso Faraile, Aokuso 3, 2018. E tasi le tausaga lea ua fa’asa ai ona e toe ulufale mai i Amerika Samoa. E tatau fo’i ona e totogiina lau salatupe e $2,000 ae e te lei tuua le atunu’u.”

 

O le fa’aiuga na sainia e le Taitaifono o le Komiti Fa’afoe, afioga Fanene Edda Wyberski, faapea ai ma ni isi o sui e to’atolu.

 

E le o manino i le taimi nei poo ai na te totogiina le salatupe a Intila lea ua tuuina e le Komiti Fa’afoe. I lalo o tulafono tau femalagaaiga, o le tiute tauave a le sponsor i lalo o le tulafono, e tatau ai ona ia fa’atinoina galuega uma mo le mautinoa e soifua manuia le tagata mai fafo sa ia aumaia i Amerika Samoa, e aofia ai ma le totogiina o ana pili i le malo.

 

Ae talu ai o lea ua mae’a ona tuuina atu le tusi a le sponsor, afioga i le tama’ita’i faipule ia Vui Florence Saulo i le Komiti Fa’afoe, e fa’ailoa aloaia ai le le toe avea o ia ma sponsor a Intila, ua tula’i mai ai loa se fesili, poo ai o le a ia totogia le sala a Intila.

 

Na taua e se sui o le Komiti Fa’afoe i le Samoa News, e manino lava le faaiuga a le komiti sa faia, e le gata o Intila ua le toe agava’a lona aumau i Amerika Samoa, ae ua i ai fo’i tulafono tau Femalagaaiga ua ia ta’utino sa ia soli.

 

“E leai la se isi auala e tatau ai ona toe nofo umi lenei tama’ita’i i le atunu’u, ua tatau loa ona ia tuua le atunu’u i se taimi vave lava. O ia o se tagata ua le toe agava’a ona aumau i Amerika Samoa, na musu e fa’afou lona pepa nofomau, ma ua tula’i ese fo’i ma lana sponsor. O itu ia e fa’amaonia mai ai lona le usitaia o tulafono tau Femalagaaiga a le teritori,” o se saunoaga lea a le sui o le Komiti e le i manatu e fa’ailoa lona saufa.

 

I lana tusi i le komiti fa’afoe, na talosagaina ai e Vui le tatau lea ona fa’asa ona toe ulufale mai Intila i Amerika Samoa mo le 10 tausaga, ona o lona le usitaia o tulafono tau Femalagaaiga. Sa ia taua atili fo’i i le komiti fa’afoe e fa’apea, o le latou tiute, o le puipuia lea o tulafono, pisinisi ma le atina’e manuia o le malo, mai tagata mai fafo o loo ulufale mai e saili galuega i le atunu’u, ma latou faia ai tulaga le manuia.