Ads by Google Ads by Google

Tolu aso tapunia StarKist Samoa, aso malolo; asiasi pule sili o le kamupani


[ata: foa'i]

E tolu aso o le a malolo ai le StarKist Samoa i le vaiaso lenei, ma e amata atu i le aso Lulu, Aperila 17, le aso o le Sisiga Fu’a a Amerika Samoa. Ma o le StarKist Samoa o se tasi o kamupani tua e auai i le Fu’a i lenei tausaga.

 

Ma ua fa’ailoa mai e le StarKist e fa’apea o le vaiaso lenei o le a afea ai e le pule sili o le kamupani a le StarKist Inc., le teritori mo sana asiasiga.

 

O le aso Tofi o le vaiaso ua te’a na fa’amaonia mai ai e le so’oupu a le StarKist, le tamaitai ia Michelle Faist i le Samoa News e fa’apea o le aso Gafua (Aperila 15) ma le aso Lua (Aperila 16) e faia ai galuega masani a le kamupani, ae o le a malolo galuega mai le aso Lulu, Aperila 17 e o’o atu ia Aperila 20.  E toe amata galuega ia Aperika 22.

 

“Tusa i le 2,000 tagata faigaluega a le StarKist Samoa o le a auai i le svaliga o le Sisiga Fu’a i lenei tausaga,” o se tala lea a Faist, ma ia saunoa e fa’apea e fa’amanuia atu le StarKist i le fa’amanatuina o le Sisiga Fu’a 2019 ae maise le Eseta - i le fa’aiuga o lenei vaiaso.

 

Talu ai le malolo o galuega a StarKist, o le a malolo foi galuega a isi kampuani lea e tautuaina fale ‘ia, e pei o le kamupani i Satala e gaosia le apa.

 

O le aso ananafi sa fa’amaonia mai ai e le StarKist i lona ofisa autu i Amerika, e fa’apea o lo’o asiasi mai i Amerika Samoa i le vaiaso lenei le pulesili ia Andrew Choi, fa’atasi ai ma sui sinia o le kamupani e fono ma ta’ita’i o le StarKist Samoa ma auai i le Fu’a i lenei tausaga.

 

I se pepa o fa’amatalaga o lo’o taua ai e Choe lona naunau e galulue ma ta’ita’i o le StarKist Samoa ae maise ta’ita’i o Amerika Samoa.

 

O lo’o fa’ailoa mai foi le fa’amoemoe o Choe e asiasi i ta’ita’i o le malo ae maise pisinisi. Ma sa ia fa’afetai le faigamalo a Lolo ma Lemanu, le afioga i le faipule i le Laumua, Aumua Amata, ma ta’ita’i o le Fono Faitulafono, ae maise tagata nu’u o Amerika Samoa i le galulue fa’atasi e fa’atumau pea le StarKist i lenei vaitau ona o le tele lu’itau.

 

ASO MALOLO

 

O le vaiaso ua te’a sa fa’alauaitele ai le afioga i le Lutena Kovana, Lemanu Palepoi Sialega Mauga, i se poloaiga e alo’aia ai le aso Lulu, o le aso malolo a le malo mo le Sisigafu’a, e ui lava e toatele tagata faigaluega a le malo o lo’o auai i le komiti o le Fu’a.

 

O le toatele o kamupani tua e galulue pea i le aso Lulu.

 

Fa’ailoa e le Ofisa o le Kovana, nisi o malo valaaulia ua talia tusi valaaulia o le Fu’a, e aofia ai le Ao Mamalu o le malo o Samoa, Tuimalealiifano Vaaletoa Sualauvi II ma le Palemia, Tuilaepa Sailele Malielegaoi; Ulu o Tokelau; Aumua Amata; ma le ta’ita’i o le US Coast Guard mai Honolulu, le susuga ia Kevin Lunday.

 

Ua ma’ea foi ona fa’amautu i se tasi o poloaiga a le Lemanu, o ia foi lea o lo’o avea ma taitai o le malo i lenei vaitau, e fa’apea o le aso Faraile, Aperila 19 - Good Friday - o le aso malolo a le malo.  O nisi o kamupani tua o le a tapunia i lea aso.

 

Mo faletupe, e tatala ina pea Bank of Hawaii i aso malolo e lua, ae o le ANZ Amerika Samoa Bank e tapunia i le aso Lulu ae afa-aso i le aso Faraile. Mo le Territorial Bank of American Samoa, e tapunia i aso malolo e lua - Aperila 17 & Aperila 19.

 

Ina ia aloaia le aso malolo i le aso Faraile, o le a leai se lomiga a le Samoa News i lea aso, ae fa’atoa toe faia i le aso 22 o Aperila.