Ads by Google Ads by Google

Toe soso’o le 100% fa’atupega Medicaid mo gasegase auina i fafo

O le afioga le Faipule o Amerika Samoa i le Konekeresi Aumua Amata na ia lipotia le soso’o o le alamanuia lea e totogia ai talavai mo i latou e malaga i fafo e sailia o togafitiga i o latou gasegase. O lo ua fa’ailoa mai ua toe soso’o lea fesoasoani e 100% o le Medicaid, mo le isi 30 aso, aua o lea sa motusia ia Novema 21, peita’i ua fa’aopoopo nei ma ua o’o atu ia Tesema 20, 2019.

 

O le soso’oga lona lua lea ua talosagaina ma fa’amatu’u mai e le Konekeresi i lenei lava tausaga.

 

Fa’ailoa e Aumua o loo fa’agasolo pea galuega a le Konekeresi ina ia fa’atulaga mai se fuafuaga fa’ataoto lelei mo le fesoasoani tumau a le Medicaid mo Teritori o Amerika ae maise ai lava Amerika Samoa, ina ia tau si’itia i luga le fesoasoani a le Medicaid e 55-45% le sao e totogia a le Medicaid mo pili ma’i a tagata uma e agava’a.

 

O le fesosoani lenei na toe talosagaina lea e fa’atulaga ai le 100% o tupe e toe fa’atumu mai e le Medicaid ua matua aoga tele i le sefeina mai o faitau miliona ma miliona o tupe a le falema’i, ae ua matua lelei ona tausia ma fa’afailele ai le soifua maloloina o i latou na aoga i ai, ma ua iloga le fiafia o le to’atele i o latou togafitiga i Niu Sila ma Hawaii lava fo’i.

 

“E ui ona o lenei fesoasoani ua maua na afua mai ona o afaina o le afa o Gita, ae fa’afetaia ua gaua’i lava le Konekeresi e fa’apasia mai aua ua fa’alua fo’i ona malaga mai i latou ma va’ai patino i le tatou falema’i i a latou asiasiga. Ua latou silafia le mana’omia o i ai, ua o gatasi teritori ma setete uma i tulaga o le tausiga lelei o le soifua maloloina ae maise lava o talavai ina ia fa’aumiumi le soifua laulelei o le atunu’u,” ose tala lea a Aumua.

 

“Ua ou fa’atauanau lava i le Konekeresi ina ia faapasia mai se suiga lelei mo le fesoasoani a le Medicaid e totogia ai pili ma’i o tagata sa saili togaifitiga i falema’i i fafo. Afai ae manuia mai o se fesoasoani tele lea i le tatou falema’i, ma le fa’aleleia atili o le tausia lelei o le soifua ma’ale’ale o nai o tatou tagata. O lea fo’i talosaga o lo’o finaua ai se fa’atelega o le pasene e toe totogia mai e le Medicaid mo pili o togafitiga o tagata fa’agasegasea o le atunu’u.”