Ads by Google Ads by Google

Toe maua avanoa ali’i mai Samoa na ta’usala i le umia fualaau faasaina


[ata: foa'i]
ausage@samoanews.com

Pago Pago, AMERIKA SAMOA

 

Ua toe maua le avanoa o le ali’i mai Samoa na ta’usala i le umia faasolitulafono o fualaau faasaina o le aisa, ina ua manatu le Fa’amasinoga e faamalumalu lana poloaiga e tuua ai e lea ali’i le teritori ae toe fo’i atu i Samoa.

 

O le vaiaso na te’a nei na tula’i ai i luma o le Fa’amasinoga le susuga a Faavae Utulaelae mo le tuuina atu o lana fa’asalaga, i le mae’a ai lea ona faamaonia e le Faamasinoga o le solitulafono sa tu’uaia ai o ia e le malo.

 

Na ulua’i tu’uaia e le malo le susuga a Utulaelae i le moliaga mamafa e tasi o le umia faasolitulafono o vaega o le pauta faasaina o le aisa, tasi le moliaga o le umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000, faapea ai ma isi moliaga e pei o le faaoolima i le tulaga tolu, tu fua i le fanua o le isi tagata, atoa ai ma le faatupu vevesi i nofoaga faitele, o soitulafono mama o le vaega A e mafai ona faasala ai se tasi i le Toese mo le umi e oo atu i le tasi le tausaga, pe faasala i le salatupe e oo atu i le $1,000, pe faasala fo’i i faasalaga uma ia e lua.

 

Ae i lalo o se maliliega na sainia e le ua molia ma le malo, lea fo’i na talia e le Faamasinoga Maualuga i le masina o Novema o le tausaga nei, na malie ai Utulaelae e tali ioe i le moliaga na toe teuteu e le malo, le solitulafono o le umia faasolitulafono o vaega o le pauta faasaina o le aisa, o le vaega D lea o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe faasala foi i le salatupe e oo atui le $5,000, poo le faasala foi i faasalaga uma ia e lua.

 

I le tali ioe ai o le ua molia i le moliaga e pei ona ta’usala ai o ia e le malo, sa ia ta’utino ai e faapea, i se taimi o le aso 25 o Aokuso o le tausaga e 2019 i Amerika Samoa, sa ia umia faasolitulafono ai vaega o le pauta faasaina o le aisa. Na ta’utino atili le ua molia e faapea, ina ua saili e Leoleo lona tino i le aso na pu’e faapagota ai o ia, e mafua mai i se vevesi na aafia ai o ia ma se isi ali’i, na maua e Leoleo se paipa tioata o loo i ai vaega o le pauta faasaina o le aisa.

 

Ina ua maua lona avanoa mai le Fa’amasinoga, sa ia faatoese ai i le malo o Amerika Samoa e tusa ai o lona le usitaia o ana tulafono, atoa ai a lona umia o fualaau faasaina. Sa ia taua e faapea, o masina e 13 na taofia ai o ia i le Toese i Tafuna, ua ia a’oa’oina ai se lesona taua i lona olaga, e le o se mea lelei le soli o le tulafono.

 

Sa ia ta’utino atili fo’i e faapea, o ia o se tagata sa galue malosi mo le tausiga o lona aiga e aofia ai si ona Tina matua, o lona to’alua ma lana fanau, peita’i ina ua aafia o ia i le faafitauli o le tagofia o fualaau faasaina atoa ai ma le ‘ava malosi, sa faigata ai loa iina ona toe faatino ona tiute faa Tama i totonu o le aiga, ae ua amata loa ona alu lona taimi ma lona tamaoaiga i le sailia o fualaau faasaina e fafaga ai lona tu’inanau sa i ai.

 

“Ua ou lagona lo’u sese ma lo’u salamo mai la’u solitulafono sa faia ma ua ou iloa fo’i, ua tele lo’u taimi o a’u tupe ua alu ona o lenei faafitauli o le tagofia o fualaau faasaina. Faamolemole, se avanoa se tasi mo a’u ou te toe fo’i atu ai i tua se’i tausi lo’u aiga ma saili sa’u galuega e fafaga ai lo’u to’alua ma la’u fanau,” o le faatoesega lea a le ali’i ua molia.

 

Sa ia ta’utino fo’i e faapea, afai ae toe maua se isi ona avanoa, na te le toe solia se tulafono a le malo, na te le toe tagofia fo’i fualaau faasaina ma le ‘ava malosi, ae o le a faigaluega malosi e tausi ai lona aiga.

 

Na talosaga lana loia fautua i le Faamasinoga mo se faasalaga faanofovaavaaia. Na taua e le loia fautua e faapea, o Utulaelae o se tagata sa galue malosi i le tausiga o lona aiga. Na talosaga le loia a le ua molia i le Faamasinoga ina ia faaaoga masina e 13 na taofia ai Utulaelae i le Toese e fai ma ana faasalaga i lenei mataupu, ae tatala loa o ia i tua e faigaluega. Sa ia talosagaina fo’i le Faamasinoga, afai e i ai se fuafuaga e toe faafo’i le ua molia i Samoa, sa ia talosaga ina ia faamalumalu le faataunuuina o lea poloaiga, ae ia fa’aauau pea ona aumau le ua molia ma lona aiga i Amerika Samoa.

 

Na taua atili e le loia fautua a le ua molia e faapea, o Utulaelae, o se alii e fai lana ia lava pisinisi, o se Fale Inisinia i Aua, lea sa galue ai mo le silia i le 10 tausaga. Ae ina ua taofia faapagota o ia e Leoleo, sa tu’u atu loa le pisinisi e faaauau e se tasi o ana uo o loo galue ai o se inisinia.

 

Na lagolagoina e le malo le talosaga mo se faasalaga faanofovaavaaia, atoa ai ma le aua lea ne’i toe i ai se isi taimi faaopoopo e tuli e le ua molia i le Toese, ae fa’aaoga masina na taofia ai o ia e avea ma ana faasalaga.

 

Ao le i tuuina atu le Faasalaga a le Faamasinoga, na toe faatepa e le Faamasinoga itu e lua o lenei mataupu i mau faamaonia o le faalavelave na tula’i mai, lea ua mafua ai ona ta’usala le ua molia.

 

Na taua e le Faamasinoga e faapea, o le aso 25 o Aokuso 2019 na maua ai e Leoleo i le taga o le ofu a le ua molia se paipa tioata o loo i ai vaega o le pauta faasaina o le aisa, ina ua pu’e faapagota e Leoleo o ia i se vevesi na tula’i mai i luma o se Faleoloa i Tafuna.

 

O le aso 27 o Aokuso talu ona mae’a le ulua’i tula’i a le ua molia, na tatala ai loa o ia i tua ina ua mae’a ona ia totogi le tupe e $2,500 i lalo o tuutuuga e le tatau ona ia toe solia se tulafono a le malo.

 

Ae i le tuana’i ai o masina e 4 talu ona tuana’i le faalavelave e pei ona aafia ai le ua molia, na toe aafia ai fo’i o ia i le tulafono ina ua la vevesi ma se isi ali’i i se inugapia sa faia i le aso 12 o Tesema 2019, ma toe taofia ai loa o ia e Leoleo. Na sui e le Faamasinoga le tupe e tatala ai Utulaelae mai le $2,500 i le $10,000, ina ua ia le usitaia le tuutuuga na tatala ai o ia i tua.

 

Talu mai lava le taimi lea seia oo mai i le vaiaso na te’a nei, na taofia pea ai Utulaelae i le Toese ina ua le mafai ona ia totogi le tupe sa faatulaga e tatala ai o ia i tua.

 

E 5 tausaga i le Toese ma le $5,000 le faasalaga na manatu le Faamasinoga e faasala ai le ua molia, peita’i ua faamalumalu lona tuliina o lea faasalaga faa falepuipui, ae ua nofovaavaaia ai o ia mo le 5 tausaga i lalo o poloaiga e tatau ona ia usita’i i ai.

 

O ia poloaiga e aofia ai lona tuliina o masina e 20 i le Toese i Tafuna, peita’i ua manatu le Faamasinoga e fa’aaoga masina e 13 ua mae’a ona ia tuliina e fai ma ana faasalaga, ae faamalumalu le 7 masina o loo totoe ai. Lona uiga, o le vaiaso lava na te’a nei na tatala ai loa i tua Utulaelae mai le Toese i Tafuna i lalo o poloaiga e tatau ona usita’i i ai.

 

Sa manatu le Faamasinoga e tuua e le ua molia le atunuu, peita’i ua faamalumalu le faataunuuina o lea poloaiga, fuafua lava i le usita’i o Utulaelae i faatonuga a le Faamasinoga. E $3,000 le salatupe ua faatonu e le Faamasinoga le ua molia e totogi, aua ne’i ona toe tagofia fualaau faasaina poo le ‘ava malosi, a ia avea o ia ma tagatanuu lelei e tausisi i tulafono a le malo.

 

Ua poloaina fo’i o ia ina ia saili sana galuega poo le toe faaauau fo’i o lana pisnisi Fale Inisinia e tausi ai lona aiga.