Ua toe faaopoopo e le Faamasinoga Maualuga le faasalaga o se alii pagota o lo o tuli sana faasalaga faa falepuiopui i le taimi nei, ina ua ta’usala o ia i le solitulafono mamafa o le faaoolima i le tulaga lua.

E 5 tausaga lea ua faasala ai e le Faamasinoga Maualuga le susuga a Asofa Titio, e faaopoopo i lana faasalaga faa falepuipui o lo o tuli i le taimi nei. O Titio, o ia lea e to’atolu i ai alii pagota na molia e le malo i le faalavelave lea na latou fasi faamo’amo’a ai se isi alii pagota i le masina o Oketopa 2018.

O le vaiaso na te’a nei na tulai ai Titio i luma o le Faamasinoga mo le tuuina atu lea o lana faasalaga. O le alii Loia Fautua lagolago ia Rob McNeill na tula’i mo Titio.

Na ulua’i molia Titio i le moliaga e tasi o le faaoolima i le tulaga lua, faapea ai ma le moliaga e tasi o le faaaoga faasolitulafono o se aupega. Ae i lalo o se maliliega na sainia e le ua molia ma le malo, lea foi na talia e le Fa’amasinoga, na malie ai Titio e tali ioe i le moliaga o le faaoolima i le tulaga lua, ae solofua e le Faamasinoga le isi moliaga.

I le tali ioe ai o Titio, sa ia ta’utino ai e fa’apea, i se taimi o el aso 20 o Oketopa 2018 i totonu o le Toese, sa ia faaoolima ai i le alii pagota o Nick Mataia, faatasi ai ma le fesoasoani atu a isi alii pagota e to’alua o Manu Lefatia ma Reggie Vaavale.

Na ta’utino atili Titio e faapea, i le aso e pei ona taua, na alu ai i le sela na loka ai Mataia ma tauanau o ia la te o i le potu a Lefatia sei latou talanoa ma faasoa ai nisi o mataupu e faatatau i le mafuaaga na loka atu ai o ia e Leoleo. Na malie Mataia ma la savavali loa i le potu a Lefatia.

Ina ua la oo i totonu o le potu a Lefatia, na latou faaoolima ai loa ia te ia e ala i lo latou fasia o ia ma manu’a tigaina ai.

Ina ua maua le avanoa a Titio mai le Faamasinoga, na ia faatoese ai loa e tusa ai o lana solitlafono sa faia. Sa ia faatoese faapitoa foi ia Mataia ma lona aiga e tusa ai o le faalavelave e pei ona aafia ai o ia.

Na talosaga McNeill mo se faasalaga faanofovaavaaia, ae tuli faatasi ma le faasalaga a Titio o lo o tuli i le taimi nei. E ui i le matuia o le solitulafono ua ta’usala ai Titio, aemaise ai o lona faatino o le isi solitulafono ao tuli ai lana faasalaga i se isi foi solitulafono na ta’usala muamua ai o ia, na taua e McNeill, o Titio, o se alii talavou ua sese lana filifiliga, e mana’omia se isi avanoa mo ia.

Na tete’e le Loia a le malo i le talosaga mo se faasalaga mama, ae na ia finau i le Fa’amasinoga mo se faasalaga pito sili ona maualuga e tuu atu ia Titio. Na taua e le malo e matuia tele le gaioiga sa faia e Titio, o lona aumaia lea o le alii pagota na manu’a i totonu o le sela a le alii pagota o Lefatia ina ia latou faaoolima i ai.

Na taua e le Fa’amasinoga e fa’apea, o le mataupu lenei na tofu atu i le Vaega Suesue a Leoleo ina ua maua se ripoti mai Leoleo o le Toese faapea ai Foma’i i le Falema’i i Faga’alu, se alii pagota o lo o manu’a tigaina lona ulu, e mafua mai ina ua faaoolima i ai isi alii pagota.

E 3 aso na taofia ai le alii o Mataia i le potu tigaina (ICU), a o le i te’a atu i le potu mo taotoga e faaauau ai togafitiga mo ia.

E pei ona taua e le malo i le latou tagi, sa taupulepule Lefatia, Vaavale ma Titio e fasi Mataia, ma faatonu ai loa e Lefatia ia Titio e alu e fai ia Mataia e alu atu i lona sela sei latou talanoa i le mafuaaga ua loka atu ai o ia (Mataia).

(O Mataia na loka e Leoleo ona o tuuaiga i lo latou faia lea ma ni isi alii se to’alua o uiga mataga i ni tamaitai se to’alua e ta’i 14 tausaga le matutua).

Ina ua taunuu Mataia i totonu o le sela a Lefatia, na faafuase’i loa ona tu’i o ia e Vaavale ma pau ai i lalo. Sa oso atu fo’i Lefatia ma ta tu’i o ia, ma faaopoopo atu ai ma isi tu’i mai ia Titio.

Na faai’u le gaioiga a alii nei e to’atolu i le faaaoga e Lefatia o se filifili uamea e sasa ai le ulu ma foliga o Mataia, ao taofi e Titio ma Vaavale lona lima ma ona vae.

Na manu’a tuga le ulu o Mataia le vaaia ai fo’i tulaga faaletonu i ona foliga ma lona tino atoa, e pei ona taua e le malo i le latou tagi.

Na taua e le Faamasinoga e faapea, e le o toe i ai lava se avanoa e tuu atu i pagota e aafia i isi solitulafono a o tuli ai a latou faasalaga, poo i latou foi e toe aafia i isi solitulafono a o lo o nofovaavaaia i lalo o ni poloaiga a le Fa’amasinoga.

Na pau le ituaiga faasalaga e fetaui ma Titio e pei ona taua e le Fa’amasinoga, o le tuuina atu lea i ai o se isi faasalaga faa falepuipui.

E 5 tausaga lea ua faasala ai e le Faamasinoga Maualuga ia Titio e nofosala ai i le Toese i Tafuna, o lea faasalaga faatoa tuli pe maea ona tuli lana faasalaga o lo o tuli i le taimi nei i le Toese i Tafuna, tusa lea e 15 tausaga le umi.

Na faailoa e le Faamasinoga ia Titio ma lana loia, e leai se isi faasalaga e fetaui mo lenei solitulafono, se’i vagana ai le faasalaga tuli atoa e 5 tausaga.

O le tausaga na te’a nei na faasala ai fo’i e le Faamasinoga ia Lefatia ma Vaavale i faasalaga faa falepuipui, ina ua nofosala i laua i le moliaga o le faaoolima i le tulaga lua, e mafua mai i le faalavelave lea na manu’a ai Mataia.

Ae mo le susuga a Mataia, ua mae’a ona lau lana faasalaga faa falepuipui e 28 masina, o se tasi lea o tuutuuga o lana nofovaavaaia e7 tausaga, ina ua ta’usala o ia i le solitulafono o le faia o uiga mataga i se tamaitai e talavou i lalo o le Tulafono.