Ads by Google Ads by Google

Toe aafia fo’i i le tulafono se ali’i o lo o nofovaavaaia i le gaoi


[ata: SN]
ausage@samoanews.com

 O le 2 vaiaso talu ai na pu’e faapagota ai e Leoleo se ali’i o loo nofovaavaaia, ona o tu’uaiga i lona gaoia lea o meatotino a lona aunty na nofo ai ae ave faatau ina ia maua mai ai tupe e fa’atau ai fualaau faasaina mo ia ma ana uo.

 

Ina pu’e faapagota e Leoleo le susuga a Chris Aveolela, e le gata na maua i ai fualaau fa’asaina, ae na maua ai fo’i ma le ato tupe a lona aunty na ia gaoia mai i totonu o le fale.

 

O le vaiaso na te’a nei na tula’i ai Aveolela i luma o le Fa’amasinoga Faaitumalo. Ua molia o ia i le moliaga o le umia faasolitulafono o vaega o le laau faasaina o le mariuana faapea ai ma le moliaga e tasi o le gaoi, o vaega ia o solitulafono mamafa, faatasi ai ma le moliaga e tasi o le faatupu vevesi i nofoaga faitele, o le vaega A lea o solitulafono mama.

 

E $10,000 lea ua fa’atulaga e le Fa’amasinoga e tatala ai i tua Aveolela. Afai ae tatala o ia i tua, e le mafai ona ia toe taumafai e faafesoota’i molimau a le malo e aofia ai ma lona aunty sa nofo ai mo le silia i le 4 masina, e le mafai ona ia toe tagofia le ‘ava malosi poo fualaau fa’asaina, a ia avea o ia ma tagatanu’u lelei e tausisi  i tulafono uma a le malo.

 

TAGI A LE MALO

 

Na pu’e faapagota e Leoleo le ua molia i luma o se fale i Kokoland, faatasi ai ma sana uo, ina ua talosagaina e le Tama e ana le fale le fesoasonani a Leoleo, i ni ali’i se to’alua o loo inupia i luma o lana pa ma pisapisao ai. 

 

E uma atu le telefoni a le Tama mai Kokoland ae vili e le aunty a le ua molia le Ofisa o Leoleo i Tafuna ma talosaga i ai mo se avanoa i lona fale ua osofaia ma gaoia e lona nephew. Na muamua aga’i Leoleo i le fale o le Tina matua ma maua ai le avanoa e faamatala ai e le Tina mea uma sa tutupu i lona fale talu ona la nonofo ma lona nephew (le ua molia).

 

Na taua e le Tina e fa’apea, ao le i ulufale atu le ua molia i lona aiga, sa tulaga lelei mea uma i lana nofo ai na o ia i lona fale. Ae talu lava ona aga’i atu le ua molia, ua tele meatotino ua masalomia le aveesea mai i totonu o le fale, e aofia ai ma mea faigaluega e alu i le uila a lona to’alua o loo teu i le Fale Taavale. Na taua fo’i e le Tina le ave faagaoi e se tagata o meatotino a lana fanau o loo teu i totonu o le isi potu o le fale.

 

I le masina o Fepuari o le tausaga nei e pei ona taua e le Tina, na alu ai ma siaki mea faigaluega a lona to’alua o loo teu i totonu o le Fale Ta’avale, ae na faateia o ia ina ua alu atu ua i ai mea faigaluega e alu i le uila e pei o ili laupapa e 2 faapea ai ma le moa vao tuai e tasi ua aveesea mai totonu o le nofoaga sa i ai.

 

Sa ia fesiligia lona nephew e uiga i mea faigaluega ae na tali lona nephew, na te le iloa ni mea faigaluega, e le i tago ai fo’i i ai.

 

O le masina o Aperila e le i leva atu, na tuu ai e le Tina le $50 i luga o le laulau i totonu o lon potu. O lana tupe na aitalafu e se tasi o fafine o le aulotu, ae na alu atu le fafine ma toe totogi atu i se tasi o afiafi. I le taeao na sosoo ai, e toe alu atu i luga o le laulau i totonuo lona potu, ua fiu e su’e le $50 sa tuu ai. Ina ua ia fesiligia Aveolela, sa ia tali mai, na te le iloaina se tupe, e le i tago fo’i i ai.

 

Na taua atili e le Tina i Leoleo le faateia o ia ina ua alu atu i totonu o le potu a lana fanau o loo i Amerika i le taimi nei, ma ia vaaia ai le gasu uma o totonu o le potu. Sa ia vaaia le tele o lavalava, o pea seevae faapea ai ma le masini laptop a lana tama matua ua aveese mai totonu o le pusa toso. Ina ua ia fesiligia Aveolela, na faali’i o ia ma tali leotele atu ia te ia, na te le i gaoia ni meatotino a lana fanau.

 

Na avea le ita o Aveolela i lona fesiligia soo o ia i meatotino a lona aiga ma itu na faalii ai o ia ma teva ese loa ma le fale i le po o le aso 22 o Me, 2020. Sa i ai lona manatu e toe fo’i atu Aveolela i le fale ae o le taeao na sosoo ai, Me 23, na ia ala mai ai ma siaki le potu o Aveolela ma ia iloa ai, e le i ai se isi i totonu o le potu. 

 

Na manatu le Tina atonu o loo alu Aveolela e koleni e pei ona masani ai, peita’i e po ane lava le aso lea e lei oo atu lava Aveolela i le fale. 

 

Pago Pago, AMERIKA SAMOA - Sa faamatala uma e le Tina i Leoleo foliga o Aveolela faapea ai ma ona ofu sa fai i le aso mulimuli na ia vaai ai. 

 

Pe tusa o le itula e 10:00 i le po o le aso lava lea, Me 23, na telefoni mai ai se Tama matua mai Kokoland ma talosaga i Leoleo mo se fesoasoani, ona o ni alii se toalua o loo inupia i luma o lona fale ma pisapisao ai. 

 

Na aga’i atu Leoleo ma latou vaaia ai alii se to’alua o loo savavali aga’i atu i le isi itu o le auala i Kokoland, o se tasi o i laua nei e fetaui lelei ma foliga o le tagata lea na faamatalaga atu e le Tina matua ia te i latou. Na fesili Leoleo i ali’i e to’alua poo ai o i laua e suafa ia Aveolela, ae na tali le ua molia, o ia tonu lava lea.

 

Talu ai le faatupu vevesi o alii uma ia i luma o le fale o le Tama matua na faasea, na mafua ai loa ona auina atu i laua e Leoleo i le Ofisa o Leoleo i Tafuna mo nisi suesuega. A o le i auina atu i laua, na muamua saili o laua tino poo i ai ni fualaau poo ni aupega mata’utia.

 

E leai ni fualaau faasaina na maua i le tino o le uo a Aveolela, ae ina ua saili e Leoleo le ofu o Aveolela sa faia, na maua i ai sikaleti mariuana e 2 ua uma ona tai, atoa ai ma se ato tupe tama’ita’i o loo i ai i totonu le $93.

 

Ina ua fesiligia e Leoleo ia Aveolela, na ia ioeina ai, o le ato tupe sa maua i lana taga, o le ato tupe lea a lona aunty na ia gaoia. Ina ua fesiligia i marijuana, na tali le ua molia, o mealele na ia faatauina mai i le isi ana uo i Le Filifili i Vaitogi.

 

Na ta’utino le ua molia i Leoleo, e faamaonia tu’uaiga faasaga ia te ia, i lona gaoia lea o le ato tupe a lona aunty ma ia maua i ai le tupe $410 i totonu, ona ia fa’aaoga lea o le isi vaega o le tupe e fa’atau ai pia, mea’ai ma mariuana mo laua ma lana uo, ae o le isi $100 na ia tago ma tu’u i lana uo.

 

E 5 tausaga o loo nofovaavaaia ai Aveolela ina ua ta’usala o ia e le Faamasinoga Maualuga i le 2018 i le moliaga o le gaoi. E na o le 12 masina na ia tuli o lana faasalaga faafalepuipui e 20 masina, ma tatala ai loa o ia i tua i lalo o tuutuuga e aofia ai le aua lea nei ona toe solia se tulafono.

 

O le masina o Fepuari o le 2019 na toe aafia ai fo’i le ua molia i le tulafono, ina ua loka o ia e Leoleo i le ona i nofoaga faitele ae maua ai e Leoleo se paipa tioata o loo tumu i vaegao le pauta o le aisa.

 

E le i faaleagaina e le Faamasinoga le nofovaavaaia a le ua molia, ae na toe tuuina atu i ai le avanoa e tasi e nofovaavaaia ai i lalo o tuutuuga faapitoa e ao ona ia usita’i i ai, ae talu ai o lea ua toe aafia le ua molia i le tulafono, ua sauni ai loa le malo e talosaga i le Fa’amasinoga ina ia faaleaogaina loa tuutuuga na tuuina atu mo le nofovaavaaia a le ua molia.