Pago Pago, AMERIKA SAMOA

O le alii lea o lo o nofovaavaaia mo le 7 tausaga, e mafua mai i le faalavelave lea na tausala ai o ia i le gaoi ma le talepe fale i le 5 tausaga talu ai, ua toe aafia nei o ia i le Tulafono, ona o tu’uaiga i lona osofaia lea o se Faleoloa i Aua i le masina o Mati na te’a nei.

Ae ina ua pu’e faapagota e Leoleo le susuga a Frank Kelemete i le 2 vaiaso talu ai i luga o le alatele i Tafuna, e mafua mai i le faalavelave lea o lo o tu’uaia ai o ia i lona osofaia ma gaoia se Faleoloa i Aua, ae maua ai fualaau faasaina i lona tino.

O le vaiaso na te’a nei na tulai ai Kelemete i luma o le Faamasinoga Faaitumalo mo le taimi muamua. E 2 tagi tusitusia a le malo ua faila faasaga ia te ia.

O le tagi muamua, o lo o tu’uaia ai o ia i le moliaga e tasi o le gaoi, tasi le moliaga o le talepe fale i le tulaga muamua, tasi fo’i le moliaga o le faaleaga meatotino i le tulaga muamua, o vaega C uma ia o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala foi i le salatupe e le silia i le $5,000, poo le faasala fo’i i faasalaga uma ia e lua.

Ae i le tagi lona lua, ua molia ai nei Kelemete i le moliaga o le umia faasolitulafono o vaega o le pauta faasaina o le aisa, tasi le moliaga o le umia faasolitulafono o vaega o le laau faasaina o le mariuana, o solitulafono e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e amata mai i le $5,000 ae mafai ona oo atu i le $20,000, poo le faasala foi i faasalaga uma ia e lua.

E $35,000 lea ua faatulaga e le Fa’amasinoga e totogi ona faatoa mafai lea ona tatala Kelemete i tua. O le aso Faraile o le vaiaso fou lea ua faatulaga e faia ai le ulua’i iloiloga o lenei mataupu. Na taua e le loia a le malo le i ai o se fuafuaga mo le failaina lea o se talosaga i le Fa’amasinoga Maualuga, ina ia faaleaoga le nofovaavaaia a Kelemete, ona o lea ua ia le usitaia tuutuuga o lana nofovaavaaia.

TAGI A LE MALO

O le vaiaso muamua o le masina o Mati 2020 na agai atu ai se vaega to’atele o Leoleo e suesue le mataupu na aafia ai se Faleoloa i Aua, ina ua masalomia le talepe e se tagata ae ave faagaioi le tele o meatotino sa i ai i totonu. Sa faaleaga atu ai fo’i ma le ta’avale a le ali’i Asia e ana le Faleoloa.

I le ripoti na maua e Leoleo, o lo o manino ai i le ata sa pu’eina e le masini pu’eata a le Faleoloa, le ulufale faamalosi atu o le alii ua molia i totonu o le faleoloa pe tusa o le itula e 3:05 i le vaveao o le aso 7 o Mati, e ala i lona vane ese lea o le faamalama pito i tua o le fale.

E to’alua isi ali’i na maua i le isi masini pu’eata a le Faleoloa o lo o ma’alo solo i fafo o le vaega e paka ai ta’avale, peitai e le i mafai ona manino lelei i le masini pu’eata poo ni tagata na o atu ma le alii ua molia pe leai.

Ina ua taunu’u le alii ua molia i totonu o le Faleoloa, sa ia taumafai e talepe le faitoto’a e ulufale atu ai i le Ofisa o le ali’i Pule o le Faleoloa peita’i e le i mafai. O lea na fu’e ai loa e le ua molia le tele o oloa i totonu o le ato fa’a fafa lanu meamata na alu atu ma ia ma vaaia ai le toe ulufafo o le ua molia ma savali aga’i loa i le isi itu pogisa o lo o paka mai ai le ta’avale.

E pei ona taua e le malo i le latou tagi, e fa’atolu ona fo’i le ua molia i totonu o le Faleoloa ma le uta o oloa gaoi. O le uta muamua na fu’e i totonu o le ato faa fafa lanu meamata, ae o uta e 2 na mulimuli ane ai na fu’eina lea i totonu o ni atigi pusa tetele se lua.

O le tele o oloa na gaoia i lea osofaiga e aofia ai mea’ai tupu apa faapea ai ma ni oloa e alu i le uila e pei o se laptop e tasi, o ni telefoni feavea’i, faapea ai masini iPads. Sa gaoia fo’i e le ua molia uaea e mafai ona faaola ai masini e alu i le uila, e aofia ai ma ni totoga o masini computers.

E to’atele tagata e nonofo latalata i le nofoaga o lo o i ai le Faleoloa na aafia na sulu i ai Leoleo mo se fesoasoani, ma faaali i ai le ata o le alii ua molia pe mafai ona latou faailoaina mai. O le toatele o i latou sa latou faailoa i Leoleo, e fou le latou vaai i le alii ua molia, atonu o se tagata e le i leva ona nofo i le nu’u.

O le 2 vaiaso talu ai na mafai ai ona maua e Leoleo faamatalaga e faatatau i le ali’i ua molia, o ia e nofo i Vaitogi.

O le 2 vaiaso talu ai na aga’i atu ai Leoleo i Vaitogi na latou pu’e faapagota mai ai le ua molia mai le fale o sana uo sa lafi ai. A o le i auina atu le ua molia i le Ofisa o Leoleo i Tafuna, na saili e Leoleo lona tino poo ia tauaveina ni fualaau faasaina poo ni aupega malolosi.

Ina ua saili e Leoleo le tino o le ua molia, sa latou maua ai ni pepa iila se 2 i le taga agavale o lona ofu sa fai. O le isi pepa iila sa maua i ai vaega o le pauta pa’epa’e o le aisa, ae o le isi pepa iila sa maua i ai lau mamago o le laau faasaina o le mariuana.

Ina ua fesiligia e Leoleo le ua molia e tusa ai o fualaau faasaina sa maua ia te ia, na taua ai e le ua molia e fa’apea, o fualaau faasaina na avatu e lana uo e nofo i Malaeimi sa ia faatau i ai lana telefoni feavea’i. Na iloa mulimuli ane e Leoleo, o le telefoni lea na ave e le ua molia i lana uo i Malaeimi e faafesuia’i ma fualaau faasaina, o le isi lea telefoni na ia aumai faagaoi mai le Faleoloa na aafia i Aua.

Ina ua fesiligia e Leoleo ia Kelemete e faatatau i le Faleoloa lea na aafia i Aua, na malie ai loa le ua molia e faailoa le mea atoa sa tula’i mai ai. Na ta’utino le ua molia, e to’atolu i latou na auai i le faatinoina o le osofaiga, o ia ma ana uo e to’alua.

E nao Kelemete sa alu i totonu o le Faleoloa, ae o ana uo e to’alua e aofia ai ma se alii e 16 tausaga le matua na faatali atu i fafo e vaavaai ni tagata e o atu. Sa ioe atili fo’i le ua molia i Leoleo, o oloa na aumai faagaoi na vaevae ia tei latou e to’atolu.

O le tele o ana oloa sa maua e aofia ai mea’ai tu’u apa, o le laptop ma le telefoni feavea’i e tasi. Na musu le ua molia e fa’ailoa i Leoleo igoa o ana uo e to’alua sa fesoasoani ia te ia i le osofaiga o le Faleoloa na aafia.

I le tausaga e 2015 na ta’usala ai Kelemete i le moliaga o le gaoi ma le talepe fale i le tulaga lua, e mafua mai i le faalavelave lea na ia osofaia ai se fale o se aiga i Kokoland. O nisi o tuutuuga o lana nofovaavaaia e 7 tausaga, o lona tuliina lea o masina e 28 i le Toese i Tafuna. Sa fautuaina fo’i o ia e le Fa’amasinoga ina ia usita’i i tulafono a le malo, ma aua ne’i toe aafia i se isi solitulafono.