Ads by Google Ads by Google

Toe aafia fo’i se ali’i talavou i isi solitulafono mamafa


[ata: foa'i]
ausage@samoanews.com

Pago Pago, AMERIKA SAMOA

Ua toe aafia fo’i le ali’i talavou ia Aroni Iosua i isi solitulafono mamafa, ina ua pu’e faapagota o ia e Leoleo i tu’uaiga o le talepe fale ma le faaoolima, ae maua ai fualaau fa’asaina ia te ia.

Na faailoa atu e Iosua I leoleo, talu ai le tele o faafitauli ua aafia ai lona olaga ma ua tau valea atu ai ma lona mafaufau, faaopoopo atu ai ma le leaga o le auala o lo o tausi ai e le to’alua a lona Tama le aiga, ua ia manatu ai e faatino solitulafono ina ia umi ai se taimi e nofo ai i totonu o le Falepuipui.

Na taua e le malo i le latou tagi e faapea, o le po o le aso 10 o Novema 2020 na vala’au ai e se ulugalii se le Ofisa o Leoleo i Tafuna mo se fesoasoani, ona o se ali’i na la maua o ta’atia i tafatafa o le alatele i Fagaima, ua faamanu’alia, e o’o I ona foliga.

Na taunu’u Leoleo ma latou vaaia ai tulaga matuia o manu’a i le tino o lenei ali’i, ma valaau loa le EMS ma faanatinati atu ai le ali’i na manu’a i le Falema’i i Faga’alu mo togafitiga.

Sa taua e se molimau i Leoleo lona vaaia o se alii pe tusa o le 25 tausaga le matua, o lo o ia ofuina se miti afu lanu samasama ma se ofuvae pupu’u lanu uliuli, o loo tamo’e aga’i atu i le alatele i Ottoville. 

Na taumafai leole e siomia le nofoaga atoa ina ia mafai ai ona vave maua le tagata sa ia faatinoina o lenei solitulafono. Na vaaia e Leoleo se ali’i o loo savali atu i le alatele i Ottoville i le po lea, o loo ia ofuina se mitiafu lanu mumu ma se ofuvae vaepupu’u lanu uliuli. 

Na vaaia e leoleo le tutusa o foliga o le tagata sa faamatalaina atu e molimau ma le alii lea, na mafua ai loa ona o latou taumafai e taofi o ia.  Ae sa taumafai lenei ali’I e sola ese ma leoleo.  Ona o le vave o gaioiga a leoleo na mafai ona pu’eina o ia, ma aveina atu ai loa I le Ofisa Leoleo I Tafuna mo suesuega auiliili.

A o le i auina atu le ali’i lea i le Ofisa o Leoleo, na fesiligia muamua e Leoleo lona igoa, ma ia faailoa ai, o ia o Aroni Iosua, le ali’i ua molia i lenei mataupu.

A’o iai leoleo I le totonugalemu o su’esu’ega o le mataupu i Fagaima, ae taunu’u se valaau I le Ofisa o leoleo mai I se ulugalii I Kokoland, e tusa ai ma se tagata sa taumafai e osofa’ia lo la fale.  I faamatalaga a lenei ulugali, I foliga ma lanu o la’ei o le tagata, sa atagia mai ai I leoleo, le tutusa lelei ma le alii o Iosua.

Na saili e Leoleo le tino o Iosua mo ni fualaau faasaina po o aupega mata’utia ma maua ai i le taga o lona ofu sa faia se paipa tioata o lo o i ai vaega o le pauta.  Na faia se suega i le pauta ma faamaonia ai, o vaega ia o le pauta faasaina o le aisa.

Na faaauau le sailiga a Leoleo ma maua ai se pepa iila o i ai ni lau mamago o se laau e foliga o le mariuana. Na faia se suega ma faamaonia ai, o vaega ia o le laau faasaina o le mariuana. 

Na fesiligia e leoleo se ali’I na nofonofo I luma o le latou fale, faafesaga’I tonu lava ma le nofoaga na manu’a ai le ali’I ua aveina atu I le falema’I, ma sa ia ta’ua e faapea, a o faasavili i luma o le latou fale, na faafuase’i ona ia vaaia se alii talavou o lo o ia ofuina se mitiafu lanu mumu o lo o tamo’e mai Kokoland ma fa’aauau atu ai i le auala i Fagaima. 

Sa ta’ua e le molimau le tu o lenei ali’I I lalo o le moli ma e foliga mai o lo’o taumafai e koma ona fa’aauau lea o lana tamoega.  A’o tu le ali’I lenei I lalo o le moli, sa ta’ua e le molimau, se tagata e foliga mai ua oava le ‘ona o lo’o savali tonu atu lava I le le nofoaga o lo’o tu mai ai le ali’I tamo’e, I lalo o le moli.

Na mafai ona faamaonia, o le alii tamo’e lea sa tu I lalo o le moli, o Aroni Iosua, lea ua molia I lenei fa’alavelave.

Sa vaaia e le molimau le talanoa o Iosua ma le ali’i ‘ona mo sina taimi, ma faafuase’i ai loa ona vaaia ua palasi i lalo le ali’i ‘ona, ina ua ta e Iosua i se mea e tai foliga o se laau, sa u’u i lona lima. A o taatia le alii na manu’a i luga o le mutia, na vaaia e le molimau le ta kiki e Iosua o ona foliga atoa ai ma lona tua. Na umi se taimi o taumafai le ua molia e laga le tino o le ali’i o lo o taatia i lalo. Ina ua mae’a ona faaoolima Iosua i le ali’i na manu’a, na vaaia ai loa e le molimau le alu i le atoa e aga’i atu i le auala lea e ui atu i Ottovile. 

Na tamo’e atu le molimau ma taumafai e fesoasoani I le alii na matu’a ma sa afe atu foi se taavale a se ulugalii ma la taumafai e fesoasoani, atoa ai ma le fa’afeso’ota’ia o le Ofisa o Leoleo.  Ina ua su’esueina e leoleo ia lenei ulugali’I, sa la faamatalaina faamatalaga e tasi sa faia e le molimau muamua.

Ina ua fesiligia e Leoleo sui o le aiga mai Kokoland lea na osofa’ia lo latou fale, na ta’ua e le tina o le aiga e faapea, na fa’ate’ia o ia ina ua ia faalogoina se tagata o lo o pa’o mai i totonu o le latou fale, a’o le taimi lea o lo o tafao ai i le fale a lona tuaoi. E to’atolu le fanau a le Tina lea sa momoe i totonu o le fale, e aofia ai ma se tamaitai e 16 tausaga le matua.

Na faamatala e le tamaitai e 16 tausaga le matua i lona Tina na faateia o ia ina ua tago atu se tagata i lona itutinosa. O lona te’i tele na mafua ai ona nofo i luga ma ia vaaia ai Iosua o lo o savali i totonu o le fale. O le e’e leotele a le tamaitai na aafia, na mafua ai ona oso le alii lea i fafo o le fale e ui atui le faamalama, ma mafua ai ona pa’o le faamalama i le taimi na oso ai i fafo.

Na taua e Iosua i Leoleo e faapea, na mafaufau e osofa’i le fale o le aiga i Kokoland ma le faamoemoe e gaoi mai ai se tupe e faatau ai ana fualaau faasaina, peita’i na vave ona iloa mai o ia e le tamaitai sa moe i luga o le nofoa i le potu malolo, ma alu ai loa i le atoa.

A o tamo’e mai i le alatele, na faafuase’i ona ia vaaia se ali’i ‘ona o aga’i sa’o atu lava i le itu sa to ai lona sela. Na fefe ina ne’i fai e le tagata ‘ona se mea leaga ia te ia, na mafua ai ona ia faaaoga se tama’i naifi sa i totonu o le taga o lona ofu e ta tui ai le tauau ma le papatua o e ‘ona. 

Na ioe Iosua i lona kiki ma ta tu’i le ali’i na manua a’o taatia i luga o le mutia. Ina ua mae’a, sa tu loa i luga ma sola ese.

Ina ua fesiligia e Leoleo ia Iosua e uiga I fualaau faasaina sa maua ia te ia, na ioe Iosua, o ana mea totino ia.

O moliaga ua faila faasaga ia Iosua e aofia ai le taumafai e talepe fale i le tulaga muamua; tagofia o itutinosa o se tamaitai talavou; faaoolima i le tulaga muamua; umia faasolitulafono o vaega o le pauta faasaina o le aisa ma le umia faasolitulafono o vaega o le laau faasaina o le mariuana.

E $25,000 le tupe lea ua faatulaga e tatala ai i tua Iosua.