To’a 25 maliliu i le mu tele i Los Angeles, Kalefonia
AMERIKA
E o’o mai i le aoauli ananafi, ua o’o le fuainumera o tagata maliliu i le mu tele o lo’o sosolo nei i le ‘a’ai o Los Angeles, i le Setete o Kalefonia, i le to’a 25. O se ripoti lata mai lena mai i le LA County Medical Examiner.
A’o faatalitali pea le to’atele o tagata i nofoaga o Los Angeles e le’i o’o atu ai le sosolo o lenei mu tele, sa fa’alauiloa mai e ofisa o le tau le fa’aauau pea ona sosolo o le afi i le taeao nei.
O lenei mu tele ua mafua ona o ni afi mai i a’ai ‘ese’ese e lima ma o le afi lea na amata mai i le a’ai o Eaton, na maliliu ai le to’a 17 o tagata, ae o le afi lea na amata mai i Palisade, sa maliliu ai le to’avalu.
I le taeao ananafi, na lata i le 88,000 tagata sa fautuaina le tu’ua o latou fale ae sulufa’i i nofoaga saogalemu. Ae ua fa’alauiloa mai e taitai o le malo, afai ae fa’aauau ai pea ona sosolo nei afi, o le a toe iai ni isi e 84,000 o le a faatonuina le tu’ua o latou aiga ma saili ni nofoaga saogalemu e faamautu ai.
O se tasi o popolega ua tula’i mai i lenei faalavelave matautia, o le saogalemu o vai taumafa on aua iai vailaau ua mafai ona ulufia tanoa vai taumafa ma e o’o lava i le fa’apunaina o nei suavai, o le a le toe saogalemu mo le taumafaina e tagata.
Ae o lo’o fa’aauau pea suesuega a vaega faapitoa a ofisa o le malo, i le mafuaaga o nei afi. Ae sa ta’ua i se tagi ua fa’auluina e se tasi i le aso Gafua, na mafua ona amataina le afi i Eaton, ona o ni masini a le Southern California Edison.
I se faatalanoaga a le Associated Press (AP) ma se tasi ua a’afia i lenei faalavelave tele, le susuga ia Javier Vega sa ia ta’ua ai le agai atu o le afi i lo latou nu’u i le aso Faraile o le vaiaso ua mavae.
Ma e o’o mai lava i le po anapo, o fesuisuia’i i la’ua ma lana uo teine, i le va’ava’ai ma faalogologo po o fea ua agai iai le sosolo a le afi.
Sa ta’ua e Vega vaitaimi ua tuanai, i lo latou le fiafia i le feoa’i o vaalele i luga a’e o latou fale, ae o le taimi nei, e pei o se faamafanafanaga ia i latou le lagonaina o le feoa’i o vaalele, ona o lo’o faamautuina ai le saogalemu o lo latou pitonu’u.
E le o iai so la mana’oga e tu’ua lo la fale, se’ia o’o lava ina sau se lapataiga ua tatau loa ona o la o ese. Ae ua o la sauniuni i le taimi lava e o’o mai ai lea lapataiga.
Ua faapea ona lapataia e le Pulenu’u a Los Angeles, o Karen Bass, ia tagata o lona ‘a’ai ina ia fa’aauau pea ona nofo sauna aua e le’i o’o latou i se tulaga e mafai ai ona faamautu le saogalemu o ona tagata.
Ma o le taimi nei, ua fautuaina e Bass ia tagata o le a’ai ina ia manatunatu i auala e mafai ona toe fa’aleleia ma toe fausia ai o latou maota ma laoa.
Na saunoa Bass, e le o se taimi muamua lea ua feagai ai lo latou ‘a’ai ma ni faalavelave tetele faapenei, sa iai foi faalavelave na mafatia ai Los Angeles i le 1992 ma le 1994 ma na mafai ona toe fausia ma faaleleia uma maota ma laoa.
O se tasi o auala o lo’o taumafai ai le tamaitai Pulenu’u e fesoasoani i tagata o lona ‘a’ai, o le fa’afaigofie lea ona fa’aavanoaina ni fale e 1,200 e faamautu ai le toatele o aiga ua mu o latou fale.