Ads by Google Ads by Google

Tima’ia fanau a'oga maualuluga - Tulaga o military academy mo ta'ita'i


O le va’aiga lea i le taimi o le vasega muamua o le taeao ananafi, lea sa tula’i ai le tama’ita’i Litaea Genera o le USArmy Tavai-Yahn, Ina. [ata: Leua Aiono Frost]

Na tula’i le tama’ita’i pule i tagata faigaluega a le Ofisa Autu o le tatou Faipule i le Konekeresi i Uosigitone DC, Fa’avaina Tavai Yahn, mo lana saunoaga fa’amalosi ma tima’iga lelei mo le fanau a’oga maualuluga ua filifili i latou e fia ulufale i Military Academy mo le isi fa tausaga pe afai ae mae’a latou a’oga maualuluga iinei.

 

O i latou na vala’auina fa’apitoa e auai i le Malae o le Suigaula i Utulei, e fa’atalanoa lea fo’i la’asaga aoga tele mo le soifua taumafai o fanau a’oga, pe a mae’a fa’au’u mai a’oga maualuluga i le tatou nei teritori. Ua fa’ailoa atu iai le fa’agasologa o le talosaga ina ia mafai ona ulufale.

 

E lua ai talosaga e fa’atumu lelei, o le tusi talosaga i le Military Acaemy e te fia ulufale i ai e tusa o lau lava filifiliga, ma lau tusi i lou Sui Faipule i le Konekeresi ina ia taga’i i lau talosaga, ma fesiligia e lona lava sui, pe mafai ona ia fa’aulu atu se fa’atalosaga ina ia talia lau talosaga e fia ulufale i le Military Academy lea ua e filifilia.

 

A maea le filifiliga toto’a a lau sui i le Konekeresi, ona ia avea sa’o lea o lana fa’aiuga i le Military Academy lea sa e talosaga i ai. Afai e toai taunu’u lea tusi sapai a lau Sui i le Konekeresi, ona fa’ato’a se’i ane lea i luga o lau talosaga e le Militaru Academy sa e talosaga i ai, ma va’aia toto’a ou togi, o lau galue fa’ata’ita’i i lou olaga a’oga, atoa ai ma lou malosi fa’aletino pe ua e agava’a ai mo latou koleniga e fa’atino.

 

O le talosaga e faia lava e le tamaititi aoga lana filifiliga o le Military Academy e fiafia o ia e a’oga ai. E totogia atoa lea a’oga e le Feterale, ina ia a’otauina le tupulaga talavou o le Iunaite Setete o Amerika o le a talia, i tiute fa’ata’ita’i, tomai fa’ata’ita’i, ae maise o le tino malosi fa’ata’ita’i ma le mafaufau ia gafatia ona fa’atino tiute fa’at’ita’ia ma filifiliga tatau fa’ata’ita’i.

 

I le taeao ananafi, sa va’aia ai le usupo mai o le fanau a’oga mai le Manumalo Baptist Academy, Pacific Horizons ma le South Pacific Academy. E talitonu i latou nei o faia’oga ma matua ae maise o fanau aoga nei, i le malosi o le usupo e sailia fa’amanuiaga.

 

Peita’i e ta ane le 10:00 i le taeao ae fa’ato’a va’aia le o’o ta’itasi mai o sui mai Tafuna, Leone ma le to’atasi lava mai Samoana Hign. O i latou na sa tomua i lea fo’i sailiga manuia.

 

O le avanoa lenei e fa’apupula atili, faasoa mai fo’i e le tama’ita’i Retired General o le USArmy Ina Tavai-Yahn, e fa’ailoa atu ai ituaiga o a’oa’oga, koleniga ma lu’iga fo’i e fesaga’i ma oe pe a e ulufale i lea fo’i ituaiga o a’oa’oga fa’amiliteri.

 

Sa saunoa fo’i o ia e fa’apupula ituaiga o avanoa faigaluega e mafai ona maua e le fanau, pe afai o le a tutumau ma ia fa’ai’uina lava faiva i lea aoga. “O fa’amanuiaga e te maua e manuia ai fo’i nai ou matua, e te toe fa’afo’i atu ai le fa’afetai i lou aiga, ona o le latou sapaia ma le tapua’ia o ou faiva a’o e tausinio fa’atini o tausala i au sailiga.”