Ads by Google Ads by Google

Teena talosaga Letuligasenoa e solofua tagi malo fa’asaga ia te ia


[ata: foa'i]
ausage@samoanews.com

Ua solofua e le Fa’amasinoga Maualuga le talosaga na fa’aulu e le susuga i le ali’i Loia ia Marcellus Talaimalo Uiagalelei, ina ia solofua le tagi a le malo fa’asaga i le susuga ia Togamamao Letuligasenoa.

 

O le masina o Me o le tausaga nei na finauina ai i luma o le Fa’amasinoga le talosaga a Uiagalelei, ae o le vaiaso na te’a nei na fa’atoa tuuina aloaia mai ai loa le fa’aiuga tusitusia a le Fa’amasinoga e faailoa mai ai le teena aloaia o lea talosaga.

 

O le susuga a Letuligasenoa, lea o lo o tatala i tua ina ua ia totogi le $2,000 sa fa’atulaga e le fa’amasinoga e tatala ai o ia, o lo o tu’uaia i le moliaga mamafa e tasi o lona umia fa’asolitulafono lea o vaega o le laau fa’asaina o le mariuana.

 

O lea moliaga na afua mai i le fa’alavelave lea na tula’i mai i le po o le aso 13 o Setema 2018 ina ua malaga mai Letuligasenoa i le Hawaiian Airlines mai Hawaii, ae maua ai e sui o le Ofisa o le Tiute ni fagu o lo o i ai le ituaiga suavai o lo o maua ai elemeni o le laau fa’asaina o le mariuana.

 

Na taua e Uiagalelei i le taimi na finauina ai lana talosaga i luma o le fa’amasinoga, o le ituaiga suavai lea na aumai i totonu o fagu, e le o maua ai elemeni o le laau faasaina o le mariuana.

 

Ona o lea tulaga, na finau ai loa Uiagalelei, e tatau ona solofua le tagi a le malo, ona e le o i ai se vaega o le tulafono ua ia solia.

 

Na faamanino atili fo’i e Uiagalelei e fa’apea, o le tulafono o fualaau fa’asaina a Amerika Samoa, e le o manino mai ai le ituaiga vailaau lea na maua i fagu na sau ma Letuligasenoa. O le tulafono fo’i ua fai si leva ma ua tuai, e le tatau fo’i ona toe fa’aaogaina i Amerika Samoa.

 

Na tete’e le loia a le malo, le tama’ita’i loia sili lagolago ia Christy Dunn ma ia taua, e manino le tulafono a Amerika Samoa e fa’atatau i fualaau fa’asaina, o le vailaau lea na maua i totonu o fagu na sau ma le ua molia i le teritori, o lo o aofia ai elemeni o le laau fa’asaina o le mariuana.

 

Na faamanino atili fo’i e Dunn e fa’apea, o le tulafono o fualaau fa’asaina o loo fa’aaogaina e Amerika Samoa, na siitia mai lea i le tulafono a le malo feterale, lea fo’i o lo o fa’aauau pea ona fa’aaoga e le malo feterale i le taimi nei.

 

FAAIUGA A LE FA’AMASINOGA.

 

Na faamanino e le Fa’amasinoga i lana Faaiuga e fa’apea, soo se tagata lava e aumau i Amerika Samoa, e i ai lona aia tatau na te silafia ai tulafono o mea e fa’ataga i le teritori, atoa ai ma mea e le fa’atagaina. E tatau fo’i ona malamalama tagata uma i tulafono ta’itasi a le malo, lea e aofia ai ma le tulafono e fa’atatau i fualaau fa’asaina, atoa ai ma le tulaga matuia o le solitulafono e tu’uaia ai se tasi na te solia tulafono tau fualaau fa’asaina.

 

“I le tulafono fualaau fa’asaina, e manino le tulafono e fa’atatau i le umia faasolitulafono o le mariuana, atoa ai ma ituaiga elemeni uma o lo o i totonu o le mariuana e le tatau ona umia e se tasi.”

 

Na faamanino e le Fa’amasinoga i lana faaiuga e fa’apea, o le vailaau o le “Cannabidiol” (CBD) lea na maua i totonu o fagu na sau ma Letuligasenoa, sa faia i ai ni suesuega ma faatusatusa fo’i i le tulafono o fualaau fa’asaina a le teritori, ma fa’amaonia ai, o le suavai o le CBD, o le isi lea elemeni e maua i totonu o le laau o le mariuana.

 

“Lona uiga la, o lo o tusa ma le tulafono le tagi a le malo fa’asaga ia Letuligasenoa i lona umia fa’asolitulafono o le laau fa’asaina o le mariuana,” o le faaiuga lea a le Faamasinoga.

 

I le faafinauga a Uiagalelei fai mai ua tuai ma le toe aoga le tulafono o lo o i ai nei, na teena e le Fa’amasinoga lea fa’afinauga. Na fa’amanino e le Fa’amasinoga i lana faaiuga e fa’apea, o lo o manino ma malamalama lelei vaega uma o le tulafono tau i le umia o fualaau fa’asaina i le teritori.

 

“O le vailaau lea na maua i totonu o fagu na sau ma Letuligasenoa i le tausaga na te’a nei, o lo o i ai i totonu elemeni o le laau fa’asaina o le mariuana, le ituaiga o le CBD. Ua manino fo’i i suesuega a le Fa’amasinoga sa faia, o lo o tusa ma le tulafono le tagi ua faia fa’asaga i le ua molia.”

 

“Ona o lea tulaga, ua teena ai loa e le Fa’amasinoga le talosaga a le itu tete’e, ina ia fa’aleaoga le tagi a le malo fa’asaga ia Letuligasenoa.”

 

Na faamanino atili e le Fa’amasinoga i lana faaiuga e fa’apea, o le aso 19 o Setema 2018 na logoina ai le Ofisa o Leoleo e le Ofisa o Tiute mai le Malaevaalele, e fa’atatau i se mataupu e masalomia le a’afia ai o fualaau fa’asaina.

 

O lea mataupu, e fa’atatau lea i le ali’i o Letuligasenoa lea na malaga mai i le va’alele o le Hawaiian Air i le po o le aso 13 o Setema, ma masalomia le maua i ai o vaega o fualaau fa’asaina.

 

I le taimi o siaki masani a le Ofisa o Tiute mo pasese e ulufale mai i le atunu’u, na maua e sui o le Ofisa o Tiute ni fagu se 4 i totonu o le ato a le ua molia. I totonu o ia fagu o sa suesueina ma maua ai se ituaiga suavai e tai foliga o se suauu. O lea suavai o loo i ai elemeni o loo maua i le laau fa’asaina o le mariuana.

 

O se tasi o itu na taumafai le malo e saili ina ua alia’e mai lenei mataupu, o faamaumauga e faatatau i taimi sa faimagala atu ai le ua molia i fafo atu o Amerika Samoa.

 

I le faila sa ia mauaina mai i le Ofisa o le Loia Sili, lea o loo i ai lona suafa atoa ma lona ata, sa taua mai ai, o le po o le aso 10 o Setema 2018 na tuua ai e Letuligasenoa Amerika Samoa mo Hawaii, ae toe taliu mai o ia i Amerika Samoa i le po o le aso 13 o Setema, o le po lava fo’i lea na maua ai loa e sui o le Ofisa o Tiute vaega o fualaau fa’asaina i totonu o lana ato sa aumai.

 

O paipa e 4 sa maua i totonu o le ato a Letuligasenoa, lea e fa’aaoga e ula ai le mariuana i nisi o vaega o le Iunaite Setete, e tau le maua i Amerika Samoa nei.

 

O vaega sa maua i le ato a le ua molia, sa maua i ai se suega i le Ofisa o Leoleo, ma fa’amaonia ai i lea suega, o vaega nei o loo i ai le vailaau o loo maua i totonu o le laau fa’asaina o le mariuana.

 

Talu ai o lea ua teena le talosaga a le itu tete’e, o le masina fou la lea ua fa’atulaga e toe valaau ai le mataupu a Letuligasenoa i luma o le fa’amasinoga.