Pago Pago - AMERIKA SAMOA

Ua fa’alua nei, ona te’ena e le Komiti Faafoe a le Zoning a Amerika Samoa, ia se talosaga a le kamupani fau fale a le CTC (Continental Transport Corporation), ina ia se’e atu la latou kamupani, i se nofoaga fou.

I le talosaga muamua a le CTC, sa fuafua ai e se’e atu le latou kamupani i Leone, peitai, sa te’ena lea talosaga, ona toe talosaga lea, e ave le latou kamupani i Tula, peitai ane, o lea ua toe te’ena foi lea talosaga.

O le fuafuaga a le CTC, o le aofia i totonu o galuega a le latou kamupani, ia se faleoloa, o le la’uina o uta tetele ma le teuina o pefu, oneone, ma’a ma isi tulaga fau fale.  Sa talosagaina foi e le kamupani, ia le  fa’atagana mo le fausia o se fale e su’esu’e ai meatotino fau fale, o le ‘rental’ o a latou masini tetele, o se fale inisinia, faapea ma le gaosia o sima ma isi oloa fau fale.

I le iai o le latou ofisa autu i Pava’ia’i, ua silia ma le sefulu tausaga, o iai le latou fale faigaluega i Fogagogo, i luma mai o le Maliu Mai Resort.  Peitai, o le faaiuga o le tausaga e 2025, sa fa’amutaina ai le lisi a le kamupani, ma le toe fa’afouina.

O lea na taumafai ai le CTC, e saili seisi nofoaga fou, e se’e atu iai, mo le fa’aauauina o a latou galuega ma auaunaga.  Sa ripotia mai le apalai o le kamupani, mo so latou avanoa i le nofoaga i le paka Liona lea o lo’o iai le tele o pisinisi ma kamupani, peitai, sa le maua se fanua e alagatatau mo la latou faamoemoe.

Ae na pau le fanua a le malo, sa avanoa i lea taimi, o le fanua lea o lo’o i Leone, i luma mai o le faleaoga a le aoga maualuga a Leone.  Peitai, sa toatele tagata o lo’o nonofo i tafatafa ane o lea fanua, sa fa’aalia lo latou tete’e, i lea fuafuaga.

Ona e le gata ina tu latalata i nofoaga o iai maota ma laoa a aiga, ae o lo’o latalata foi i fale a’oga o le a’oga maualua a Leone, o le a’oga tulaga muamua a Leone Midkiff, o le falema’i a le itumalo i Sisifo, ma le ofisa a leoleo i Leone.

Sa faatumulia ia se iloiloga a le Zoning, sa tatalaina mo le mamalu lautele, ma o latou fa’aleoina o latou popolega, e tusa ai ma le pefu, o le pa’o, o le tetele o taavale tetele i luga o le auala, o le a’afiaga o le siosiomaga faapea ai ma le soifua maloloina, o tagata lautele.

Sa faapea foi ona fa’ao’oina atu i sui o le komiti faafoe a le malo, ia ni tusi sa tusia e nisi, e fa’aalia ai lo latou tete’e, i le talosaga a le CTC.

Ona o le to’atele o latou sa fa’aalia ma faaleoina lo latou tete’e i le fuafuaga a le CTC, o lea na te’ena ai e le komiti faafoe a le Zoning, ia Aukuso o le tausaga ua tuanai, ia le talosaga a le CTC mo le faatuina o le latou fale faigaluega fou, i Leone.

Peitai, ua le fa’avaivai ai le CTC, ma toe fa’aulu ai seisi a latou talosaga fou, i le masina ua tuanai, mo seisi o latou nofoaga fou, i Tula.

O lenei nofoaga fou, o le a fa’aaogaina ai se fanua a se aiga potopoto, a le susuga ia Tony Togia’i.

Ma ona sa i atunu’u i fafo ia le susuga ia Togia’i, o lea na auai atu ai lona faletua i le iloiloga, ma molimauina ia le tu’uina mai e le aiga o le faatagana ma le lagolagoina, o le fuafuaga a le kamupani, mo le fausiaina o sa latou fale gaosi sima, i lo latou fanua.

Sa fa’aleoina foi e le faletua, ia le galulue malosi o le pulega a le CTC, ina ia mafai ona mauaina le lagolago a tagata o le nu’u, ae e le’i fa’aulufaleina ia le latou talosaga.  Sa fa’aalia foi e le faletua, ia le mae’a ona fono o le kamupani, ma aiga, o lo’o nonofo latalata i le nofoaga ua fuafua e fa’atu ai le kamupani, ma o lo’o lagolagoina e ia aiga, ia lenei fuafuaga.

Ae le gata i lea, sa molimau foi le faletua, i luma o le komiti faafoe, ia le faatauina e le CTC, ia ni masini faapitoa, e aofia ai se masini gaosi piliki, ma fausisa se fale faapitoa, e fa’aitiitia ai le pa’o, i taimi o galuega.  Ma o le gaosiga o piliki, ua iai lava taimi faatulagaina o le aso, o le a faatino ai lea galuga, ina ia fa’aitiitia ia le fa’alavelave i tagata o le nu’u.

I le fa’atausi’usi’uga o le masina ua tuanai, sa o’o atu ai susuga ia Jim McGuire ma Fofoga Sagato, o nisi ia o totino o le komiti faafoe a le Zoning, e asiasi atu i le nofoaga lea ua faamoemoe e faatu ai le CTC i Tula.

Ma na o la maitauina, le leai o ni aiga, po o ni maota ma laoa, e latalata i le nofoaga e faatu ai le kamupani.  Sa iai ma le susuga ia Tony Togiai, i le taimi o le asiasiga a McGuire ma Sagato, ma na ia fa’amalamalamaina ia le aotelega o le galuega.  Ma sa ta’ua foi e Tony e faapea, e na’o le to’atasi ia le tuaoi lea o lo’o tete’e i lenei fuafuaga.

O le aso na soso’o ai, na asiasi atu ai McGuire, i le maota o le susuga ia Falaula Silivelio Vaoesea Aofia, lea o lo’o tete’e i lenei galuega.  Na iai foi ma le sui o le Samoa News, i lea fonotaga.

Ma sa faamatalaina e le alii fitafita litaea, ia le amataina o galuega a le kamupani, i lua tausaga talu ai, ma o ni galuega mamafa ma tetele, ma ua tele sa a’afiaga o ia ma lona aiga, i ia galuega.

Sa faamatala e Aofia, a agi mai le savali mai le sami, e ta’alao uma atu ai lava le pefu, o le sima, ma le pa’o, agai i lo latou fale.  Ma ua avea ma a’afiaga o o la soifua maloloina ma lona faletua.  Sa ia faamatala le le saogalemu o le ‘ea o lo’o latou manavaina.  Ma o le tele o taimi, e le mafai ona tatalaina a latou faamalama, pe o foi i fafo, e nofonofo ai.

Sa ta’ua e Aofia, o lona to’alua, e fa’aaogaina ia nofoa faataavale ma e fa’afaigata ona manava, ae o le a fa’ateteleina ona a’afiaga, ona o le pefu lea e alu atu, mai i le kamupani fou.

Na faamatala foi e le vetereni ia ona gasegase ma a’afiaga o lona soifua maloloina, sa amata mai i lana auaunaga i totonu o vaega’au a le malo.  E faateteleina i le pa’o ma le leotele o masini ma taavale tetele a le kamupani.

Sa fa’aleoina foi e le vetereni ia lona le fiafia, i le auala na fa’alauiloa atu ai i tagata o le nu’u, ia lenei kamupani fou.  I sona talitonuga, sa tatau ona fa’ailoa atu muamua, ae e le’i o’o se talosaga, i le komiti faafoe a le Zoning.

Ma na fesiligia ai e Aofia, ia le mafua’aga na le taumafai malosi ai le pulenu’u, e fa’ailoa atu ia i latou, ia lenei poloketi, lea e ono a’afia ai o latou soifua.  

Ina ua tagataga’i Aofia i le toatele o i latou na saini o latou suafa, e lagolagoina le poloketi, sa ia ta’ua e faapea, o le toatele o i latou, e masani iai, e aofia ai ma le pulenu’u – o lona tausoga.  

O leisi suafa sa i luga o le talosaga, o se tasi lea o ona tuaoi, e faigaluega i le Matagaluega o le Soifua Maloloina.  Lea sa ta’ua e Aofia, ua leva ona ia talosagaina, e fai se ripoti i le ofisa o le soifua maloloina, ona o a’afiaga o le soifua maloloina, i lenei poloketi.

Na fa’aalia le le fiafia o le alii vetereni, ona o le toatele o tagata sa sainia o latou suafa, o tagata o lo’o malamalama lelei, i popolega a lona aiga, ona o tulaga o le soifua maloloina.

O le aso Faraile o le vaiaso ua tuanai, sa feiloai ai le Komiti Faafoe mo le faia o se latou faaiuga, ma sa mafai ona auai atu ai le susuga ia Aofia, i lea iloiloga.

Na fa’ate’ia le toatele o le komiti faafoe, ina tau’a’aoina atu e Aofia, ia sana tusi e tete’e ai i le fuafuaga a le kamupani a le CTC.

I le faaiuga o le iloiloga fa’alua a le komiti faafoe, o lenei mataupu, sa o latou te’ena ai le talosaga a le kamupani.