Ads by Google Ads by Google

Ta’usala Galea’i moliaga ave ta’avale ua oo ai le maliu i se isi tagata


[ata: foa'i]
ausage@samoanews.com

Ua ta’usalaina le susuga a Folasa Galea’i i le moliaga mamafa o le ave ta’avale ua mafua ai ona oo le maliu i se isi tagata, i le mae’a ai lea ona tuuina mai e le vaega iloilo iuga o le latou faaiuga e nofosala ai o ia i lea solitulafono i le vaiaso na te’a nei.

 

O le moliaga mamafa o le ave ta’avale fa’atamala ua mafua ai ona oo le maliu i se isi tagata, e mafai ona fa’asala ai se tasi i le toese mo le umi e le silia i le 5 tausaga, poo le fa’asala fo’i i le salatupe e le silia i le $5,000, po’o fa’asalaga uma ia e lua.

 

E 3 aso na fa’agasolo ai le fa’amasino iloilo a Galea’i i luma o le Fa’amasinoga Maualuga i le vaiaso na te’a nei, ae tuuina mai loa le faaiuga a le vaega iloilo iuga ma ta’usalaina ai le ua molia.

 

O afioga i ali’i Fa’amasino Lagolago ia Faamausili Pomele ma Tunupopo Alalafaga na lagolagosua i le Faamasino Sili Michael Kruse i le taulimaina o lenei mataupu.

 

O le ali’i loia fautua lagolago ia Rob McNeill na tula’i mo Galea’i, ae o le ali’i loia sili lagolago ia Doug Lowe na tula’i mo le malo.

 

O lo o tumau pea le tatalaina i tua o Galea’i e fa’atali ai le lauina o lana fa’asalaga i le masina fou.

 

FOLASAGA FAAI’U

 

O folasaga faai’u o lenei mataupu, na taua e Lowe i le vaega iloilo iuga e fa’apea, e le o se alofaga le moe o se tagata a o fa’afoeina se ta’avale, ma, e leai fo’i se vaega o le tulafono e mafai ai ona sao mai se isi i lea alofaga pe afai ua soli le tulafono.

 

Ae na taua e McNeill i lana faafinauga faai’u e fa’apea, e tatau i le malo ona latou faamaonia i le latou tagi, sa i ai se gaioiga sa faia e Galea’i i le taimi a o le tula’i mai le fa’alavelave e pei ona maliu ai Lameko Lopesi, ina ua so’a e le ta’avale a Galea’i i le aoauli o le aso 9 o Iuni 2017 i Faga’alu.

 

Na faamanino e Lowe i le vaega iloilo iuga e fa’apea, o le gagana o le tulafono e pei ona soli e Galea’i, e le tau mana’omia ai le fuafua lelei e se tagata o se gaioiga ina ia faaoo ai le oti i se isi tagata e ala i le fa’afoeina o le ta’avale.

 

Fai mai le tulafono e pei ona finau Lowe, tusa lava pe le o se gaioiga na fuafuaina pe na mafaufau e fa’atupu, ae afai ua oo le maliu i se tagata ona o se ta’avale sa fa’afoeina e le ua molia, e tatau ona nofosala le sa faafoeina le ta’avale i le tulafono.

 

O le itu e laki ai lenei fa’alavelave e pei ona finau le itu a le malo, e na o le to’atasi le tagata na maliu, ae le to’a 4 e pei ona maua i molimau sa folasia i le taimi o le fa’amasinoga.

 

Na taua e le toalua o le Tama ua maliu i lana molimau e fa’apea, e to’afa i latou sa i totonu o le ta’avale, o lona to’alua o Lopesi ua maliu, o ia, faapea ai ma fanau a lana fanau e to’alua.

 

Ina ua oso Lopesi i fafo ma le ta’avale ae alu e siaki le vaega sa faaletonu i le afi o le ta’avale, sa totoe ai loa na o ia ma fanau a lana fanau e to’alua i totonu o le ta’avale.

 

Na finau Lowe e fa’apea, o le fa’atamala tele o Galea’i na mafua ai ona oo le maliu ia Lopesi. E le gata na saoasaoa lana ta’avale, ae sa ia fa’afoeina fo’i le ta’avale i se auala faatautala, e ala i le tuu o le laina e tatau ona alu ai, ae ua oso lana ta’avale i le isi laina.

 

O le faamaoniga o le taofi o le malo sa ova le saoasaoa o le ta’avale a Galea’i, o le molimau a le to’alua o Lopesi, lea sa ia taua e fa’apea, e pei e lele le ta’avale a Galea’i i lana vaai i le taimi na aga’i atu ai i le itu o lo o paka ai le latou ta’avale.

 

Na taua fo’i e Lowe e fa’apea, e le i moe Galea’i i le taimi na tula’i mai ai le fa’alavelave. E faamaonia lea tulaga i le molimau a le to’alua o Lopesi, lea sa ia taua lona vaaia o Galea’i o loo pupula ona mata a o ia taumafai e mimilo le foeuli o lana ta’avale.

 

Na fesili Lowe, pe aisea na taumafai ai Galea’i e mimilo le foeuli o le ta’avale, ae sa tatau ona tago e taofi.

 

E leai se faaletonu i taofi o le ta’avale e pei ona taua i le molimau a le ali’i Inisinia o lo o galue i le Ofisa o Leoleo mo le fa’aleleia o ta’avale a le Matagaluega e fa’aletonu.

 

E ui i le alofaga a le itu tete’e fai mai sa moe Galea’i i le taimi na tula’i mai ai le fa’alavelave, peita’i na taua e Lowe e fa’apea, soo se tagata lava e moe ao ia faafoeina se ta’avale, e fa’afuase’i ona pau ese le vae o lea tagata mai le vae penisini, ma lemu ai loa le alu a le ta’avale.

 

Na taua e McNeill i lana faafinauga faai’u e fa’apea, e na o le 2 lava sekone na suia ai olaga o aiga e to’alua, e mafua mai ona o le fa’alavelave na a’afia ai Galea’i ma Lopesi.

 

Na faamanino e McNeill i le vaega iloilo iuga e fa’apea, e tatau ona faamaonia e le malo le elemeni taua o le solitulafono lea ua molia ai Galea’i, ina ia faamaonia ai sa faatamala o ia i le taimi o le fa’alavelave.

 

O lea elemeni, e tatau i le malo ona faamaonia sa i ai se gaioiga sa faia e Galea’i i le taimi ao le’i tupu le fa’alavelave.

 

Na finau McNeill e fa’apea, sa tatau i le malo ona latou suesueina poo a mea a Galea’i na faia i le po ao lumana’i ai le aso o le faalavelave. Sa tatau fo’i ona latou suesueina poo a mea a Galea’i na faia i le taeao ao lumana’i ai le aoauli na tula’i mai ai le fa’alavelave.

 

E oo lava fo’i i le taimi na aga’i atu ai le ta’avale a Galea’i i luga o le auala, sa tatau i le malo ona suesue poo a ana mea sa fai atu i luga o le auala ao lei tupu le fa’alavelave.

 

E talitonu McNeill, e leai ma se galuega a le malo na faia e sailiili ai gaioiga sa faia e Galea’i ao lei tula’i mai le fa’alavelave. E oo lava fo’i i tuuaiga a le malo fai mai sa talanoa Galea’i i le telefoni ao lei tupu le fa’alavelave, e talitonu le itu tete’e, sa tatau i le malo ona aami le tagata sa talanoa ma Galea’i i luga o le telefoni ina ia faamaonia ai la latou mau o lo o tauaveina nei.

 

Na finau atili McNeill e fa’apea, e tele vaega e le o mafai e le malo ona faamautu atu i le latou tagi, e le gata e ese le leoleo na amataina le suesuega, ese fo’i le leoleo lea na latou valaau e molimau, ae le o mafai fo’i ona latou faamaonia nisi o vaega o le molimau a le to’alua o le Tama na maliu

 

I le faaiuga o le folasaga a McNeill, sa ia talosagaina ai le vaega iloilo iuga ina ia latou faafo’iina mai le faaiuga, e le nofosala Galea’i i le moliaga o le ave ta’avale faatamala ua mafua ai ona oo le maliu i se isi tagata.