Ads by Google Ads by Google

Tasi le isi tagata fou maua i le misela i Amerika Samoa

Ua fa’ailoa e le Matagaluega o le Soifua Maloloina i le vaiaso ua te’a, e to’atasi le isi tagata fou ua fa’ato’a fa’amaonia mai ua maua i le misela mai i Amerika Samoa nei.

 

O le tamaititi e le 8 tausaga le matua, ma ua fa’amaonia lava na fa’ato’a maua lava o ia i le misela i Amerika Samoa, e le’i malaga mai se isi atunu’u pe na alu malaga fo’i i fafo.

 

Mai le 11 o fa’amaumauga mo suesuega na auina atu i Hawaii e fa’amaonia mai ai pe mata o le Misela o a’afia ai nisi o le atunu’u na mama’i ma avatu i le falema’i mo togafitiga, e to’atasi lava ua fa’amaonia mai o lo’o a’afia i siama o le misela, ua na’o lea tamaititi e 8 tausaga le matua.

 

O le fa’amaumauga lenei o loo maua sa’o mai lava i le Ofisa o le matagaluega o le Soifua Maloloina o Amerika Samoa mai le ali’i foma’i o Fa’ama’i Pepesi, Dr. Aifili John Tufa.

 

Ma ua atoa ai nei le to’a 10 o tagata i Amerika Samoa ua fa’amonia ua maua i le misela, ma e leai se isi o taofia i le falema’i a le LBJ talu mai le aso Faraile ua te’a.

 

Ua fa’ailoa e le Soifua Maloloina so’o se tasi lava e tau atagia mai ai auga o le ma’i misela, e vave lava ona tapena fa’amaumauga mo suesuega ma auina atu loa i Hawaii e faia mai ai suesuega ma toe fa’afo’i mai ai fa’amaoniga pe misela pe leai.

 

Ua fa’amaonia e le Soifua Maloloina e fa’apea o le malaga a le Hawaiian Air i le afiafi o le aso Tofi na te’a nei, ua to’ai taunu’u mai le 8,000 o vaccine mo le tui MMR lea e puipuia ai le mamalu lautele mai le a’afia i le Misela.

 

Ua fa’amalosia aiu nei ona faia tuiga mo i latou uma o lo’o i ofisa e tautuaina le mamalu lautele o le atunu’u i le malo ma kamupani po’o pisinisi tumaoti fo’i, ae maise o tagata matutua e silia ma le 62 tausaga e pei ona fa’atulaga i le atunu’u atoa.

 

E ese mai lea vaega o tagata uma, ua fa’atulaga fo’i ma tui puipuia mo le aufaigaluega uma lava a le Star Kist Samoa lea sa faia i le aso To’anai ua te’a ma e toe fa’aauau i le fa’aiuga o lenei vaiaso.

 

Ua talosagaina fo’i lo outou onosa’i i taimi umi o le a saofafa’i ai e fa’atali o outou tui puipuia ma ia utagia fo’i le taimi o le a mae’a ai tuiga i lea aso ma lea aso.

 

Ua toe toe lava a maea uma isi matagaluega o le Malo ona fesoasoani i le Matagaluega o le Soifua Maloloina e fa’atino lenei tuiga lea ua amata i le vaiaso lenei mo tagata lautele.

 

O le taeao nei, Tesema 17, e o’o atu ai le fa’asologa o tuiga o le misela i nofoaga fa’atulagaina e tolu: Faletalimalo a Leituala i Ili’ili; Hall a le EFKAS i Faleniu; ma le falema’i fa’aitumalo i Tafuna.

 

Ua le gata i lea, o lo’o tatalaina foi e nofoaga tuai o le Argosy i Ottoville mo le mamalu lautele o le atunu’u. E tatala nei nofoaga mai le 8a.m. i le 5 i le afiafi ma e tatau ona umia mai lou ID.

 

Fa’ailoa e le fa’atonusili o le Soifua Maloloina, Motusa Tuileama Nua, “O lea ua iloa nei e le to’atele ua fesoasoani mai le tigaina tele o lenei mea o le faigaluega i itula sa tatau ai ona malolo mai galuega masani o le aso.”

 

Peita’i ua ia fa’afetaia le Matagaluega o le Saogalemu Fa’alotoifale ma le Aufaigaluega a Foma’i o le VA, ma le vasega o Foma’i ma tausima’i mai le Falema’i tele i Faga’alu ona o le latou sao ua tu’uina mai mo lenei auaunaga ia sao ma uli le fa’amoemoe e fa’atofu tagata uma ma le tui o le misela i le atunu’u.

 

“Ua iloga mai ua toe telegese le pipisi o le Misela iinei, ona ua vave puipuia i tatou uma ona o le fa’asa a le malo ua fa’amalosia nei i so’o se taimi e fa’apotopoto ai le to’atele. Ua iloga fo’i ua le faia le tele o fa’atasiga aoga sa fuafua mo lenei vaitau, ae fa’afetaia ai le loto ma le agaga malamalama o tagata uma, ona o lenei taumafaiga,” o se tala lea a Motusa.

 

O le vave fo’i ona faia o nei gaoioiga fa’amalosi e le toe fa’atasitasi fa’atasi ai le to’atele o tagata o le atunu’u, lea ua tatou selesele i se fua lelei, e le o to’atele nisi ua maua i le misela i le tatou nei teritori.

 

I Samoa ua maua mai le fa’amaumauga o i latou ua maliliu i le misela ua to’a 72 ma e to’atele lava i le vasega o le fanauiti.

 

Lapata’ia pea le mamalu o matua ma aiga, a va’aia loa auga o le ma’i misela i se tasi o le fanau, o le vave lava ona fa’ao’o i le falema’i mo togafitiga o le mea sili lea e te faia mo lou alo.