Ads by Google Ads by Google

Taofia i le Toese se alii talavou ona o tu’uaiga i le gaoi ma le talepe fale


[ata: foa'i]
ausage@samoanews.com

Pago Pago, AMERIKA SAMOA

 

E 23 tausaga o se ali’i talavou na pu’e faapagota e Leoleo i le 2 masina talu ai ma taofia ai i le Toese i Tafuna, ona o tu’uaiga i le talepe fale ma le gaoi, faapea ai ma loa faaoolima i se isi tagata e ala i lona fa’aaoga o se a’upega mata’utia e faaoo ai manu’a i le ali’i na a’afia.

 

Ae ina ua fesiligia e Leoleo le ali’i ua tu’uaia i le mafua’aga na ia faia ai nei gaioiga e pei ona tu’uaia ai o ia, na taua ai e le susuga a Anthony Edward, poo Tony Edward fo’i e pei ona iloa ai o ia e le to’atele, i Leoleo e fa’apea, o lona ita tele i le to’alua fou o le uso o lona Tina na mafua ai loa ona ia faia nei gaioiga faasolitulafono, se’i aafia ai lona olaga i ituaiga solitulafono eseese ma alu ese atu ai ma lona aiga ae nofo i le Falepuipui, ona ua le toe fia nofo i lona aiga.

 

Sa ia taua atili i Leoleo le fai tama faapito o le uncle i le latou mafutaga, ai ona o le manatu e le o ia o sona atali’i moni.

 

O lenei mataupu na tofu atu i le Ofisa o Leoleo i le po o le aso 24 o Fepuari, 2021, ina ua talosagaina e se alii le fesoasoani a Leoleo, ona o se tagata na ia maua atu o loo taatia lona tino i autafa o le alatele i Fogagogo o lo o manu’a lona ulu ma ona foliga, faatoa  mae’a lava ona faaoolima i ai ni tagata.

 

Na taunuu Leoleo faatasi ai ma le ta’avale a le EMS, ma auina atu loa le alii na aafia i le Falema’i i Faga’alu mo togafitiga, ae amata loa suesuega a Leoleo e uiga i lenei mataupu.

 

A o talanoa Leoleo i le alii lea na ia faafesoota’iina le Ofisa o Leoleo mo se fesoasoani, ae o le taimi fo’i lea na maua ai e Leoleo se telefoni mai se aiga i se vaega o Iliili, e fa’atatau i le latou fale na taumafai se tagata e osofa’i ma gaoi, e ala i lona talepeina o le faitoto’a pito i tua o le Fale. 

 

O foliga o le tagata lea o loo taua mai e le aiga mai Iliili na taumafai e osofa’i ma talepe le latou fale, e tutusa lelei lava ma foliga o le tagata lea o loo faamatalaga mai na vaaia o ia faaoolima i le alii na maua lona tino o taatia i autafa o le auala i Fogagogo.

 

Na taua e le ulua’i molimau a Leoleo e faapea, ina ua tu lana ta’avale i le vaega tonu na taatia ai le tagata na manu’a, ae ona vaaia loa se alii e ofu i se mitiafu lanu mumu ua tamo’e aga’i atu i le itu i Sisifo o le auala i Iliili, e foliga mai o loo aga’i atu i le itu i sasa’e.

 

Na vave gaioiga a Leoleo ma latou taamilo ai loa i le vaega atoa o Iliili ma faasolo atu ai i le isi itu o Tafuna i le tau sailia o le tagata o loo masalomia i lenei faalavelave, ma latou maua atu ai se alii o loo ia laeiiina se mitiafu lanu mumu o loo savali atu i luma tonu lava o le Faletalimalo o le Tradewinds Hotel.

 

Na tu le ta’avale a Leoleo ma tulioso i fafo alii Leoleo e to’afa sa i ai ma latou pu’eina loa le alii lea ma auina atu i totonu o le ta’avale Leoleo, ma momoli atu ai loa i le Ofisa o Leoleo mo suesuega. Sa maitauina e Leoleo le pisia o le tino o lenei alii i le toto, faapea ai ma lona lima agavale o loo lavea, e foliga mai o se mea ma’ai na lavea ai.

 

E to’atolu molimau faatuatuaina lava na fesiligia e Leoleo e iuga i lenei mataupu. Na taua e le molimau muamua, o se alii talavou sa nofonofo i luma o le latou fale lona vaaia o se alii e miti afu lanu mumu o tamo’e mai i le alatele mai Vaitogi ma le fa’amoemoe e aga’i atu i le auala i Iliili pe tusa o le itula e 11:00 i le po. 

 

Na vaaia e le ulua’i molimau le alii na tamo’e mai i le auala i Vaitogi ua tu i lalo o se vaega pogisa o le pou uila a le malo, e foliga mai o loo koma ai i lona sela. E lei umi ae vaaia loa e le molimau se alii e foliga mai e ‘ona ma lana savali, o loo savali mai i le auala i Vaitogi, ae ui tonu atu lava i le vaega pogisa o loo tu mai ai le alii ofu mumu. 

 

Na ona taunuu atu lava o le alii ‘ona i le vaega pogisa o loo tu mai ai le alii ofu mumu (le alii ua molia), na vaaia ai loa e le molimau le palasi i lalo o le alii ‘ona ua ta e le alii ua molia i se mea umi sa uu i lona lima. Na ona uma lava ona faaoolima o le alii ua molia i le alii na aafia, tamo’e loa i le atoa ae tia’i ai le mea umi sa uu i lona lima i le vaega na taatia ai le tagata na manu’a. 

 

Na maua e Leoleo se paipa u’amea umi pe tusa ma le 6 futu o taatia ai i autafa o le vaega na taatia ai le tino o le alii na manu’a. 

 

Na taua e le molimau lona lua i Leoleo lona vaaia o le alii ua molia ua alu i le atoa i le taimi na tu ai lana ta’avlae e fesoasoani i le tagata sa manu’a o loo taatia lona tino i luga o le alatele. Na fesili le molimau lona lua i le tagata na manu’a poo ai lona igoa, ae tasi lava le tali ai le tagata na manu’a, “fia maua se fesoasoani faamolemole”.

 

O le isi molimau na fesiligia e Leoleo, o le Tina e ana le fale lea na osofa’i e le ua molia i Vaitogi. Na taua e le Tina i Leoleo e faapea, na faateia o ia ina ua ia faalogoina le pao mai o le pito i tua o le latou fale. Sa ia tula’i e autilo ma ia vaaia ai se alii o loo ia taumafai e talepe le faitoto’a pito i tua o le fale. Ina ua ia valaau atu i le tagata e alu ese ma le fale, sa ia vaaia ai loa le alu i le atoa o le alii lea i luma o le auala. Sa ia vaaia se alii miti afu mumu o tamo’e ese mai i tua o le latou fale.

 

A o le i auina atu e Leoleo le ua molia i le Ofisa mo suesuega, na muamua faia se suega i lona tino pe maua ai ni aupega poo ni fualaau fa’asaina. Na saili e Leoleo le tino o Edward ma maua ai se paipa tioata o loo i ai vaega o le pauta paepae. Na faia se suega i le pauta paepae ma faamaonia ai, o vaega ia o le pauta faasaina o le aisa.

 

Na ta’utino le ua molia ina ua fesiligia e Leoleo, o vaega o le pauta faasaina o le aisa o loo i totonu o le paipa tioata sa maua i le taga o lona ofu. Sa ia taua atili fo’i e fa’apea, o le paipa na avatu e lana uo ma ia, peita’i e le i uma ona ia ulaina.

 

Sa ia ioeina fo’i lona faaoolima i se alii i luga o le auala, atoa ai ma lona taumafai e osofa’i se fale o se aiga i Iliili.

 

O le 2 masina talu ai na tula’i ai Edward i luma o le Fa’amasinoga Faaitumalo, i le mae’a ai lea ona pu’e faapagota o ia e Leoleo i le po na tula’i mai ai lenei fa’alavelave.

 

Ua molia nei e le malo ia Edward i le moliaga e tasi o le umia faasolitulafono o vaega o le pauta faasaina o le aisa; tasi le moliaga o le faaoolima i le tulaga 2; faapea ai ma le moliaga e tasi o lona taumafai lea e talepe ma osofa’i se fale i le tulaga 2, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, faasala i le salatupe e le silia i le $5,000, pe faasala foi i faasalaga uma ia e 2.

 

E $15,000 le vaega tupe lea ua fa’atulaga e tatala ai i tua le ua molia. Afai ae tatala o ia i tua, ua poloaina o ia e le Fa’amasinoga ina ia fesoota’i vava lalata ma lana Loia Fautua, auai i soo se taimi e valaau ai lana mataupu, ma ia avea o ia ma tagatanu’u lelei e tausisi i tulafono a le malo. 

 

E le mafai ona ia taumafai e tuua le atunuu i se soo se taimi se’i vagana ua tuuina atu se poloaiga a le Fa’amasinoga, e le mafai fo’i ona ia taumafai e faafesoota’i molimau a le malo, e aofia ai ma i latou na aafia i lana solitulafono, e le mafai fo’i ona ia toe tagofia le ‘ava malosi poo fualaau fa’asaina.