Ads by Google Ads by Google

Taofia i le faia o sau’aga i totonu o lona aiga ae alia’e ai isi moliaga mamafa


[ata: SN]
ausage@samoanews.com

Pago Pago, AMERIKA SAMOA

 

O le ali’i lea na pu’e faapagota e Leoleo i le masina na te’a nei ona o tu’uaiga i lona faaoolima lea i lona to’alua, ua molia nei o ia i le moliaga mamafa o le umia faasolitulafono o vaega o le pauta faasaina o le aisa, ina ua pu’e faapagota o ia e Leoleo ae maua i ai vaega o fualaau fa’asaina.

 

Na musu le ali’i ua molia e talanoa i Leoleo e tusa ai o fualaau faasaina na maua ia te ia, ina ua fesiligia ma suesue o ia e Leoleo e uiga i lenei mataupu. Na pau lana faamatalaga na tuuina atu i Leoleo, o fualaau faasaina na maua ia te ia na faatau mai lea i se ali’i ave pasi e le masani i ai.

 

O le masina lava fo’i na te’a nei na tula’i ai loa Faapu’e Tafito i luma o le Fa’amasinoga Faaitumalo mo lana ulua’i iloiloga. O le ali’i Loia Fautua lagolago ia Ryan Anderson na tula’i mo ia, ae o le ali’i Loia Sili lagolago ia Robert Morrison III na tula’i mo le malo.

 

O moliaga faasaga i le ali’i ua molia e aofia ai le moliaga e tasi o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000, poo le faasala foi i faasalaga uma ia e lua. 

 

O lo o tu’uaia fo’i o ia i le faaoolima i le tulaga tolu faapea ai ma le faatupu vevesi i totonu o lona aiga, o le vaega A lea o solitulafono mama, lea e mafai ona faasala ai se tasi i le toese mo le umi e oo atu i le tasi le tausaga, pe faasala foi i le salatupe e le silia i le $1,000, poo le faasala foi i faasalaga uma ia e lua.

 

E $5,000 lea ua faatulaga e le Faamasinoga Faaitumalo e tatala ai le ua molia i tua. Na teena e le afioga i le alii Faamasino ia Elvis P. Patea le talosaga na faaulu e le alii Loia ia Stuart, mo se avanoa e faaitiitia ai le tupe e tatala ai le ua molia i le $2,000. 

 

Na taua e le Loia Fautua lagolago ia Anderson e fa’apea, o le ua molia e faalagolago i ai le tausiga o lona aiga, o le ulua’i taimi fo’i lenei ua aafia ai o ia i se solitulafono. Afai ae taofia pea le ua molia i le Toese, o le a i ai se aafiaga i le tausiga o lona aiga. Na tete’e malosi le loia a le malo i le talosaga a le itu tete’e. 

 

Na taua e le ali’i loia ia Morrison III e fa’apea, e matuia le tu’uaiga fou lea ua faia faasaga i le alii ua molia, i lona umia faasolitulafono lea o vaega o fualaau faasaina o le aisa. Sa ia talosaga i le Faamasinoga ina ia faatumau le tupe ua maea ona faatulaga e tatala ai i tua le ua molia, lea fo’i na talia e le Fa’amasinoga.

 

Afai ae tatala i tua le ua molia, ua fautuaina o ia e le Fa’amasinoga ina ia auai i soo se taimi e valaau ai lana mataupu, ma ia fesootai fo’i ma lana loia i soo se taimi. E le mafai ona ia taumafai e tuua le atunuu pe sola ese foi, sei vagana ua tuuina atu se poloaiga a le Faamasinoga. 

 

E le mafai ona ia taumafai e faafesootai molimau a le malo poo i latou o loo aafia i lenei mataupu, e aofia ai lona to’alua. A ia avea o ia ma tagatanuu e tausisi i tulafono a le malo.

 

TAGI A LE MALO

 

E pei ona taua e le malo i le latou tagi e fa’apea, o le aso 15 o Iuni, 2021 na taunu’u ai i le Ofisa o Leoleo i Tafuna se telefoni mai se Tina i Leone, e talosagaina ai se fesoasoani ona o se faalavelave na tula’i mai i lona aiga, i le va o ia ma lona to’alua.

 

E to’atele Leoleo na tali atu i le valaau ma maua ai le avanoa e feiloa’i ai ma le Tina na talosagaina se fesoasoani, ma amata loa suesuega e faatatau i le faalavelave e pei ona tula’i mai i le va o ia ma lona to’alua. O le mae’a ai ona fesiligia e Leoleo o le Tina na aafia, na auina atu ai loa le ua molia i le Ofisa o Leoleo i Tafuna mo isi suesuega faaopoopo.

 

E pei ona masani i auala e faatino ai galuega a Leoleo, soo se tasi lava e taofia i lalo o le latou vaavaaiga, e tatau lava ona saili lona tino i ni aupega poo ni fualaau fa’asaina, ina ia mautinoa le tulaga saogalemu o Leoleo faapea ai le tagata ua taofia. 

 

Ina ua saili e Leoleo le tino o le ua molia, na latou maua i ai se malo i le taga pito i tua o lona laei sa faia. Na fesili Leoleo i le alii ua molia poo le a le mea o lo o i totonu o le taga o lona ofu, na lulu le ulu o le ua molia ma tali atu i Leoleo, “ou te le iloaina”.

 

Ina ua saili e Leoleo le tagao o le laei a le ua molia, na maua i ai se paipa tioata e masani ona fa’aaoga e ula ai le pauta faasaina o le aisa. I totonu o le paipa tioata, o lo o i ai ni nai vaega o le pauta paepae. Na faia se suega i le pauta paepae ma faamaonia ai, o vaega ia o le pauta faasaina o le aisa.

 

Na taua e le malo e fa’apea, ao uu e le Leoleo le paipa tioata ina ua faatoa mae’a lava ona aveese mai i le taga o le laei a le ua molia, na faafuase’i ona aapa atu le ua molia ma aveese mai le paipa tioata mai le aao o le Leoleo ma taumafai e faaleaga, o le mafua’aga lena na ta’e ai le pito o le paipa tioata, e pei ona taua e le malo i le latou tagi.

 

Ina ua mae’a ona faailoa aia tatau faaletulafono o le alii ua molia, na ia faailoa ai i Leoleo, e le mana’o e fai sana faamatalaga e faatatau i le paipa tioata na maua ia te ia. Pau lana faamatalaga na fai i Leoleo, sa ia faatoese e tusa ai o lana gaioiga sa faia i lona to’alua, lea ua mafua ai ona loka o ia.

 

ULUA’I ILOILOIGA

 

I le taimi na tula’i ai le ua moila mo le taimi muamua, na ia faailoa ai i le Faamasinoga lona mana’o e fa’ataunu’u lana ulua’i iloiloga.

 

I le taimi o le ulua’i iloiloga, e to’atasi le molimau na valaau e le malo mo le latou itu, o ia fo’i lea na autu i ai le suesueina o lenei mataupu.

 

Na taua e le Leoleo Suesue i lana molimau e faapea, o le paipa tioata lea na maua i le tino o le ua molia, na mafai ona faia i ai se suega faapitoa mo vailaau oona, ma faamaonia ai, o le pauta paepae sa i ai i totonu, o le vaega lea o le pauta faasaina o le aisa.

 

Na fesili le loia a le alii ua molia ia Anderson i le molimau, pe aisea e su’e ai e Leoleo tino o tagata e taofia i soo se tulafono, poo se faiga masani lava lea a Leoleo ina ia saili ai ni fualaau fa’asaina.

 

Na tali le molimau, e mafua ona saili le tino o le tagata ua taofia i lalo o le vaavaaiga a Leoleo, mo le puipuiga lava o le saogalemu o Leoleo faapea ai le tagata ua taofia, ina ia mautinoa e le o umia e le tagata ua taofia ni aupega poo nisi mea maai e ono aafia ai le soifua o se tagata.

 

Na fia malamalama le alii Loia ia Anderson pe na faapefea ona taumafai le ua molia e faaleaga le paipa ina ua maua e Leoleo. Na taua e le molimau e fa’apea, ao uu e le Leoleo le paipa tioata, na faafuasei ona tago atu le ua molia ma se’i ese mai le paipa tioata mai le lima o le Leoleo ma taumafai e gagau. 

 

O le mae’a ai o le ulua’i iloiloga o lenei mataupu, na finau ai loa le itu a le malo i le Fa’amasinoga ina ia tuu atu loa le mataupu a le ua molia i luma o le Fa’amasinoga Maualuga e faaauau ai ona taualumaga, ona o lea ua manino mau sa latou folasia e lagolago ai lana solitulafono.

 

Na faamalieina le Faamasinoga Faaitumalo i mau na folasia e le malo, ma faia ai loa e le afioga Patea le faaiuga ina ia tuuina atu le mataupu a le ua molia i luma o le Fa’amasinoga Maualuga.

 

O le vaiaso talu ai na tula’i ai le ua molia i luma o le Faamasinoga Maualuga, ma ia teena ai le tagi a le malo. O le masina fou o Aokuso lea ua fa’atulaga e toe valaau ai lana mataupu.

 

O lo o taofia pea le ua molia i le Toese i Tafuna i le taimi nei, se’i vagana ua totogi le tupe ua faatulaga e tatala ai o ia ona faatoa mafai lea ona tatala o ia i tua.

 

E le fou le ua molia i luma o le Fa’amasinoga Maualuga. I le tausaga e 2014, na faamaonia ai e le Fa’amasinoga Maualuga le moliaga o le talia o ni oloa na ave faagaoi e nisi tagata faasaga i le alii ua molia, ma faanofovaavaaia ai o ia mo le 5 tausaga, i halo o tuutuuga e sofia ai lona tuliina o masina e 20 i le Toese i Tafuna. 

 

O le tausaga e 2019 na mae’a ai le nofovaavaaia a le ua molia.