Pago Pago, AMERIKA SAMOA

O le ave ta’avale o le Pikiapu Lanumoana lea na taofi e Leoleo i le soona alu saoasaoa i luga o le auala i Vaitogi i le 3 vaiaso talu ai, ua molia nei o ia i lona le usitaia o tulafono Tau i Fualaau Faasaina a le teritori, e mafua mai ina ua maua e Leoleo vaega o fualaau fa’asaina i lona tino faapea ai totonu o le ta’avale.

E pei ona taua e le malo i le latou tagi e fa’apea, e to’alua ni ali’i na malaga atu i le Pikiapu Lanumoana lea na taofi e Leoleo i Faleniu e mafua mai i le soona alu saoasaoa i luga o le alatele, faapea ai ma le leai o se fusipa’u a le ave ta’avale sa faia.

O ali’i e to’alua sa i totonu o le ta’avale i le taimi na taofia ai e Leoleo e aofia ai Faavaeolefaamoemoe Isaia, poo Faavae Isaia fo’i, le ua molia i lenei mataupu, o ia fo’i o le ave ta’avale, ma le susuga a Michael Unasa lea sa ti’eti’e i le nofoa o le pasese. 

A o tiute ali’i Leoleo e to’alua mo le mataituina o le saogalemu o ta’avale ma tagata femalagaa’i i luga o le alatele i le afiafi o le aso 30 o Iulai, na laua molimauina ai se Pikiapu Lanumoana o lo o aga’i mai i luma o le Kolisi Tuufaatasi a Amerika Samoa e aga’i atu i Faleniu i le saoasaoa e ova atu ma maila faatulafonoina i luga o lea vaega o le alatele.

Na liliu le ta’avale a Leoleo ma tuliloa le Pikiapu ma faaola moli faailoilo e ta’u atu ai i le ave ta’avale, ua tatau ona taofi lana ta’avale. Na taua e Leoleo e fa’apea, e toeitiiti lava 50 mita le mamao o le vaega na latou taofia ai le pikiapu na alu saoasaoa, ma le vaega o le alatele na tu mai ai le pikiapu.

A o aga’i atu Leoleo e siaki poo ai o loo i totonu o le ta’avale pikiapu, na vaaia e Leoleo ni gaioiga i totonu o le ta’avale, e foliga mai o ni tagata o loo taumafai e nana se mea i totonu lava o le ta’avale. 

Na faailoa e Leoleo i le ave ta’avale le mafua’aga ua ala ai ona taofi lana ta’avale, ona ua ova maila ua alu ai lana ta’avale i luga o le alatele, peita’i sa tete’e le ave ta’avale ma faapea atu i Leoleo, e lei soona alu saoasaoa lana ta’avale i luga o le alatele, ae sa talafeagai lava lana alu ma maila faatulagaina.

Ina ua fesiligia le ave ta’avale i lona suafa, sa faailoa i ai e le ave ta’avale, o lona igoa o Faavaeolefaamoemoe Isaia, ao le pasese o le susuga a Michael Unasa. Ina ua fesiligia e Leoleo ia Isaia mo lana laisene ave ta’avale, na tali le ua molia, o lona laisene na leiloa i le 2  masina talu ai ina ua osofaia e se tagata lana ta’avale ma gaoia ai lana ato tupe sa i ai i totonu lona laisene.

Na saili e Leoleo faamaumauga o le laisene o le ta’avale piskiapu na latou taofia ma iloa ai, o le ta’avale lea o loo lesitala i lalo o le igoa o Vincent Jr Isaia, o le uso matua lea o le ali’i ua molia, ae o le laisene ave ta’avale a Isaia, na mae’a le aoga i le 3 tausaga talu ai, lona uiga, e le o tusa ma le tulafono lona faafoeina o se ta’avale i luga o le alatele a le malo.

Talu ai tulaga faaletonu i le laisene ave ta’avale a Isaia, na fautuaina ai loa e Leoleo o ia ina ia latou agai atu i le Ofisa o Leoleo i Tafuna mo isi suesuega. O le a taofia ai fo’i ma le ta’avale i lalo o le vaavaaiga a Leoleo, sei vagana ua sau se tagata o lona aiga o lo o lelei lona laisene ave ta’avale e aveese atu le ta’avale ona faatoa mafai lea.

A o faia talanoaga a Leoleo ma Isaia, sa iloa atu e le isi ali’i Leoleo se pepa iila e masani ona utu ai le pauta faasaina o le aisa o lo o taatia i le fola o le ta’avale i le vaega o loo i ai vae o le pasese. O iina na fautuaina ai loa e Leoleo ia le pasese ia Unasa, ina ia latou aga’i uma atu i le Ofisa o Leoleo i Tafuna mo isi suesuega.

A o le i auina atu le ua molia ma le pasese i le Ofisa o Leoleo i Tafuna mo isi suesuega, na muamua faia se suega faapitoa i le tino o Isaia ma le pasese ina ia faamaonia ai, la te le o tagofia fualaau fa’asaina poo ni aupega mata’utia e ono lamatia ai le saogalemu o Leoleo faapea ai fo’i i laua.

E leai ni fualaau faasaina poo ni aupega mata’utia na maua i le susuga a Unasa, ae ina ua saili e Leoleo le tino o Isaia, na maua ai i le taga o lona ofuvae sa faia ni pepa iila se 2 o loo i ai le pauta paepae i totonu. Na saili e Leoleo totonu o le pulou a Isaia ma maua i ai se pepa iila o lo o i ai lau mamago lanu meamata.

Na faasolo le sailiga a Leoleo i totonu o le ta’avale ma maua ai le ‘straw’ ua tipi tulimanu e tasi o lo o i ai vaega o le pauta faasaina o le aisa i lalo o le nofoa o le ave ta’avale. Ae o totonu o le vaega e tu’u ai lefulefu o sikaleti pe a ula, sa maua ai e Leoleo se afa sikaleti mariuana ua uma ona ula le isi afa ae totoe ai le isi afa.

Na molimauina uma lava e Isaia gaioiga a Leoleo i le taimi na saili ai o ia ma le pasese, faapea ai ma le taimi na saili ai totonu o le ta’avale.  O le mae’a ai ona faatino o le siaki faapitoa a Leoleo, na logoina ai loa le Vaega o Leoleo Suesue e iloiloina mataupu tau fualaau faasaina mo le fa’aauauina o le suesueina o lenei mataupu.

E eseese potu na ave i ai Isaia ma Unasa mo le faatalatalanoaina e tusa ai o fualaau faasaina sa maua i totonu o le ta’avale.

Ina ua fesiligia e Leoleo ia Isaia e tusa ai o fualaau faasaina sa maua ia te ia faapea ai totonu o le ta’avale, na taua ai e le ua molia e fa’apea, o fualaau faasaina sa maua ia te ia faapea ai totonu o le ta’avale, o mea na ia faatau mai i lana uo o Unasa, lea sa la ti’eti’e i totonu o le ta’avale. 

Na taua e Isaia i Leoleo e faapea, o ia sa fai lana galuega i le tau faaumaina o lona faasee ae na faateia o ia i le vili atu o Unasa e alu atu i lana pikiapu la te ti’eti’e ai i luga o le aega i Logotala e faatau mai ai se la aisa e ula. Na oso i le ta’avale ma alu loa ua piki mai Unasa mai lona fale i Tafuna, ae na te’i i le tu’u atu e Unasa o le pepa iila o loo i ai lau mariuana. 

Na la ti’eti’e aga’i i Logotala ma faatau mai ai pepa iila e 2 o le aisa faapea ai ma le straw e tasi ua uma ona tipi tulimanu. Na taua e Isaia i Leoleo lona popole tele ina ne’i maua i laua e Leoleo a o i ai fualaau faasaina i totonu o le ta’avale, o le mafua’aga lena na natinati ai lana ta’avale ina ia vave ona la taunuu i le fale, ae ua avea ma itu ua taofia ai i laua e Leoleo i Faleniu. 

Ina ua fesiligia e Leoleo ia Unasa e tusa ai o fualaau fa’asaina sa maua i totonu o le ta’avale atoa ai ma le tino o Isaia, na teena ai e Unasa le i ai o sona sootaga ma nei fualaau fa’asaina. Na taua e Unasa e fa’apea, o ia sa nofonofo i luma o le faleoloa i Tafuna ae te’i ina ua afe atu le ta’avale a Isaia ma piki o ia ma fai mai la te ti’eti’e e faasavili i le afiafi ona toe momoli ai lea o ia.

A o faia le la tietiega na faateia o ia ina ua fa’aali atu e Isaia ia te ia pepa iila e 2 o lo o i ai vaega o le aisa, faapea ai ma le isi pepa iila o loo i ai lau mariuana. Sa ia vaaia fo’i i totonu o le ta’avale le taatitia solo ai o pepa iila e fa’aaoga e utu ai le aisa.

O le mae’a ai ona fesiligia e Leoleo o i laua e to’alua, na toe tatala ai loa i tua Unasa e aunoa ma ni moliaga e faila faasaga ia te ia, sei vagana ai Isaia na taofia loa i le Toese i Tafuna e faatali ai le taimi e tula’i ai i luma o le Fa’amasinoga.

O le 3 vaiaso talu ai na tula’i ai Isaia i luma o le Faamasinoga Faaitumalo. Ua molia o ia e le malo i le moliaga mamafa o le umia faasolitulafono o le pauta faasaina o le aisa, faapea ai ma le moliaga mamafa o lona umia faasoltulafono o le laau faasaina o le mariuana, o vaega uma ia o solitulafono mamafa, lea e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e oo atu i le $20,000.

E $5,000 lea ua fa’atulaga e tatala ai Isaia i tua e faatalitali ai taualumaga o lana faamasinoga.