Ads by Google Ads by Google

Talia Komiti a le Palola talosaga a se alii pagota e vave tatala o ia i tua


[ata: SN]
ausage@samoanews.com

 Pago Pago, AMERIKA SAMOA - Ua talia aloaia nei e le Komiti o le Palola a Amerika Samoa le talosaga a se ali’i sitiseni Amerika o loo loka i le Falepuipui i Tafuna, mo se avanoa e vave ai ona tatala o ia i tua ae toe fo’i atu i lona aiga, i le mae’a ai lea ona ia tuli o le silia i le lua-o-vae-tolu (2/3) o lana fa’asalaga faa falepuipui.

 

I se feiloaiga ma le Samoa News i le vaiaso nei, na fa’amaonia mai ai e le ali’i Loia ia Thomas Jones o loo tula’i mo le ali’i pagota ia James Barlow lenei fa’amatalaga.

 

Na taua e Jones e fa’apea e fa’apea, e le gata ia Barlow ua talia e le Komiti o le Palola lana talosaga ina ia vave ona tatala o ia i tua, ae aofia ai fo’i ma nisi o pagota sa iloiloina fo’i e le Komiti a latou talosaga. 

 

“E tele vaega na aofia i le iloiloga a le Komiti Faafoe, e le gata i le umi na taofia ai Barlow i le Toese i Tafuna, ae sa aofia ai fo’i le tulaga i lona soifua maloloina, o le matua o tausaga o lona soifua, atoa ai ma le suiga ua vaaia ia te ia talu ona mae’a lenei mataupu,” o le saunoaga lea a Jones i le Samoa News.

 

Ina ua fesiligia poo le a le isi laasaga lea o le a sosoo nei mo le susuga a Barlow, pe afai o lea ua talia lana talosaga ina ia vave ona tatala o ia i tua, na saunoa ai Jones e fa’apea, o le a faatali loa Barlow mo le faamautuina uma lava o ona pepa malaga e aofia ai lona pasese, aemaise ai fo’i o le faatali i le avanoa e toe tatala ai malaga a va’alele i le va o Amerika Samoa ma Hawaii, ma sauni ai loa e toe fo’i atu i lona aiga i Amerika. 

 

O le tausaga e 2012 na ta’usala ai e le Faamasinoga Maualuga ia Barlow i lona faia o uiga mataga faafeusuaiga i ni alii talavou se to’atolu i lona fale i Tafuna, ma faasala ai loa o ia e le Fa’amasinoga e nofosala i le Toese i Tafuna mo le 24 tausaga.

 

Talu mai le 2012 faasala ai Barlow, ua tusa nei ma le 8 tausaga o lana faasalaga ua mae’a ona tuli i le Toese i Tafuna. 

 

O le tagi e pei ona tu’uaia ai e le Fa’amasinoga ia Barlow, na alia’e mai ina ua taofi e Leoleo lana ta’avale i lona le usitaia o tulafono i luga o le alatele, ae maua ai o loo ia tagofia le ‘ava malosi ma faafoe le ta’avale. 

 

Na maua ai fo’i e Leoleo i totonu o le ta’avale a Barlow ni ali’i aoga e talavou i lalo o le tulafono o loo i ai ma Barlow i totonu o le ta’avale, o loo latou tagofia fo’i le ‘ava malosi ae le i atoa le ta’i 21 tausaga le matutua.

 

TAGI A BARLOW FAASAGA I LE MALO O AMERIKA SAMOA

 

Ua i luma nei o le Fa’amasinoga Maualuga se tagi na faaulu e Barlow, tauala mai i lana loia muamua ia Mark Ude faasaga i le malo o Amerika Samoa, ona o le faalavelave lea na aafia ai o ia a o taofia i le Toese i Tafuna, lea ua ia talitonu ai, ua le amanaia ai e le malo ona aia tatau faa-le-tagata soifua.

 

O le tausaga e 2015 na faila ai e le ali’i Loia ia Ude le tagi a Barlow faasaga i le malo i luma o le Fa’amasinoga.

 

O le masina o Aperila o le tausaga nei, i le tuana’i ai lea o tausaga e 5 tausaga talu ona faila lenei talosaga, na manatu ai loa le afioga i le alii Faamasino Sili lagolago ia Fiti Sunia ina ia toe tuu lenei mataupu i luga o le Kalena a le Faamasinoga, ma vaavaai ai loa le tulaga tonu o le a taoto ai lenei mataupu.

 

I le iloiloga sa faia i le masina o Aperila, na talosaga ai loa le loia a le malo ia Jason Mitchell e solofua le tagi a Barlow faasaga i le malo, ona ua fai si umi o ta’atia lenei mataupu ae leai lava ni mau faamaonia fou e lagolago ai lana tagi.

 

O le mae’a ai o le iloiloga sa faia i le masina o Aperila o le tausaga nei, na toe faatulaga ai loa le isi iloiloga i le vaiaso nei.

 

Ina ua valaau le mataupu a Barlow i luma o le Fa’amasinoga, na tula’i ai loa lana loia fou ia Jones mo ia, ae o le ali’i Loia Sili lagolago ia Jason Mitchell na tula’i mo le itu a le malo.

 

Ina ua amata taualumaga o lenei mataupu, na faailoa manino ai e le afioga i le ali’i Fa’amasino Sili lagolago ia Sunia, le teena e le Fa’amasinoga o le talosaga a le malo ina ia teena le tagi a Barlow faasaga i le malo o Amerika Samoa.

 

Saunoa Sunia e fa’apea, o se tasi o mafua’aga na ala ai ona teena e le Faamasinoga le talosaga a le malo, ona o lea ua manino i le talosaga a Barlow, e i ai mau faamaonia fou e lagolago ai le tagi o loo fuafua e faaulu i luma o le Fa’amasinoga.

 

Saunoa atili Sunia e faapea, o le aso 29 o Aperila o le tausaga nei na tuuina mai ai le faaiuga a le Faamasinoga e teena ai le talosaga tete’e a le malo. Na fautuaina fo’i e Sunia alii loia a itu e 2 ina ia saili le kopi o le faaiuga a le Faamasinoga ina ia mafai ai ona malamalama i le mafua’aga o le teena o le talosaga a le malo.

 

TAGI A BARLOW

 

Na taua e Barlow i lana talosaga faasaga i le malo e fa’apea, a o taofia ai o ia i le Falepuiopui i Tafuna e faatali ai le faaiuga o lana mataupu, na faaoolima ai se alii pagota ia te ia ma manu’a tigaina ai lona tino. E faa 17 ona faaoolima lenei alii pagota ia te ia. 

 

E le gata i lea, sa tele fo’i isi faiga le alofa ma le faatautala sa faia ia te ia, ma mafua ai loa ona alia’e mai lagona fefe, popole ma le le manutonu i lona mafaufau. Ae sili ai i lo ia mea uma, na aafia fo’i o ia i le manu’a na toetoe lava a aafia ai ma lona ola, peita’i na mumusu Leoleo o le Falepuipui e auina atu o ia i le Falema’i mo togafitiga.

 

O manu’a na oo i lona tino e aofia ai le gaui o ona ponaivi, faaletonu atu ai ma lana faalogo, aafia atu ai ma lona mafaufau. O nisi foi o taimi e le avatua ai e le Falepuipui ni fasimoli e taele ai, e leai ni toilet paper mo le Fale Taele (tulou), faaletonu le moega na moe ai, faaletonu le potu na loka ai o ia, e tutulu i nisi o taimi, atoa ai ma le faaletonu o mea’ai e fafaga ai o ia.

 

E talitonu fo’i Barlow, o le mataupu e pei ona ta’usala ai o ia e le Fa’amasinoga Maualuga, na mafua mai i faiga pepelo ma le le faamaoni a le tamaitai loia sa tula’i mo le malo i lea vaitaimi, le susuga ia Terri Bullinger, ina ua ia faatalatalanoa ma fesiligia alii aoga e to’atolu i se auala faalilolilo ina ia latou faia ni tu’uaiga sese faasaga ia te ia.

 

TALI A LE MALO

 

Ae na taua e le malo i le latou tali e fa’apea, talu ai ua silia i le 4 tausaga o loo nofo pea lenei mataupu e le i toe tuuina atu i luma o le Fa’amasinoga, o le mea lea e tatau ai i le Faamasinoga ona solofua lenei tagi e aunoa ma se mafua’aga tatau.

 

Na finau le malo e fa’apea, ua leva ona tuua e le alii loia ia Ude na tula’i mo Barlow le atunuu, e le o toe i ai fo’i se fuafuaga e toe malaga mai o ia i le atunu’u. E oo lava fo’i i ni mau faamaonia fou e lagolago ai le tagi a Barlow, e leai lava se mea ua tapena i ai le itu tagi.

 

I le mae’a ai ona iloilo e le Fa’amasinoga o le tagi a Barlow atoa ai ma le tali a le malo, na teena ai loa e le Faamasinoga le talosaga a le malo.