Ads by Google Ads by Google

TALA I VAIFANUA


[ata: SN]

Pago Pago - AMERIKA SAMOA

FAAMALOSIA E LE ‘ACA’ TULAFONO E LE FAAILOGA TAGATA MO AIGA LIMA VAIVAI

UASIGITONE, DC—O ni suiga fou ma le taua, ua faaopoopo nei i le Vaega 1557, ina ia mafai  ona puipuia ai aiga vaivai mai i uiga faailogatagata i totonu o le ‘Affordable Care Act’ (ACA), ma o se laasaga lelei lea mo le tutusa lelei o tautua i le tausiga o le soifua maloloina.  O se fa’aaliga lea mai i le NAPAWF (Faalapotopotoga Faavaomalo a Tamaitai/Tina Asia Pasefika ma Amerika).

 Na saunoa le Faatonusili Aoao a le NAPAWF, o Sung Yeon Choimorrow, e tu malosi le latou faalapotopotoga i mataupu e a’afia ai tina ma tamaitai Asia Amerika, Hawaii faapea le Pasefika (AANHPI), lea e tele ina galulue i galuega e le maualuga totogi, limiti le malamalama i le gagana Peretania ma o le toatele o i latou o lo’o avea ma tausi aiga i aiga toatele.

Sa fa’aalia foi e Choimorrow e faapea, o le a avea lenei suiga ma tulaga o le faapea ona tali fuaitau atu i faiga faailogatagata ma o le a faaopoopoina ai se puipuiga mo nei tina ma tamaitai, ina ia mafai ona maua gofie auaunaga ma puna’oa silisili ona maualuga, i tulaga o le tausiga o le soifua maloloina.

O tina ma tamaitai o le AANHPI e mai i itu lalolagi eseese ma e silia ma le 100 gagana eseese latou te fa’aaogaina.  Ua fa’ailoa mai i faamaumauga a le Census, le lata i le 50% o tina ma tamaitai sa soifua mai i atunu’u i fafo, e limiti lo latou malamalama i le gagana Peretania ma e fa’afaigata ai ona o latou fegalegalea’i ma falemai po o ofisa o le soifua maloloina ma avea ma tulaga e atili ai ona faigata ona sailia se fesoasoani tau i le soifua maloloina.

Na fa’aalia foi e Choimorrow le agaga fiafia ona o nei tulafono ua mafai ona pasia e mafai ona puipuia ai tagata mai i le fa’ailogalanu po o le fa’ailogataga, e aofia ai foi ma i latou i le faalapotopotoga a le LGBTQ+.  

AMATA ONA SAILI E LE MALO IA AIGA MA PISINISI O LO’O TELEGESE AI LE INITENETI

Ua iai nei se fuafuaga a le Malo o Amerika Samoa, ina ia taumafai e saili ia aiga ma pisinisi o lo’o feagai pea ma le faafitauli i le telegese o a latou initeneti, ma o i latou ia, e ono agava’a i se vaegatupe mai I le polokalama ua ta’ua o le BEAD (Broadband Equity, Access and Deployment).

O lenei taumafaiga mo le su’esu’eina o initeneti i totonu o aiga ma pisinisi, o le a mafai ona faamautuina ai po o ai tonu o iai ni initeneti, pe leai foi, i totonu o Setete ma Teritori.

O lenei polokalama o le BEAD, o se vaega o se polokalama a le malo feterale, ina ia faamautuina le tofutofusia o aiga uma i totonu o Amerika ma initeneti, e le gata e totogi gofie ae faapea foi le televave.

O lenei polokalama o lo’o fa’afoeina e le NTIA po o le Vaega o Feso’otaiga ma Faamaumauga  (National Telecommunications and Information Administration) i totonu o le Matagaluega o Fefa’atauaiga (DOC), lea o lo’o auala mai ai se vaegatupe e $37 miliona mo Amerika Samoa, ina ia mafai ona ausia lenei sini.

Ua fa’alauiloa mai foi e le BEAD, le fa’aaogaina e le teritori o lenei vaegatupe e mafai ona fesoasoani i ofisa telefoni ma initeneti ma ni isi faalapotopotoga, ina ia atina’e ma faaleleia atili tulaga o initeneti.

O le aofai o le vaegatupe ua faamanuiaina ai Amerika Samoa, e $37,564,827.53; ae o le $150,000 e mo le polokalama o le CMC (Connecting Minority Communities) ma le $2,994,869 e mo le Kolisi a Amerika Samoa (ASCC).  Ae e le i ma’oti mai le fa’asoasoaina o le paleni totoe o lenei vaegatupe.

FAAMAUMAUGA A LE SOSAIETE A LE KANESA A AMERIKA MO TAGATA AMERIKA I LE PASEFIKA

RNZ, Pacific—I se lipoti fou mai i le ACS (Sosaiete o le Kanesa a Amerika), o lo’o ua fa’amaonia mai ai le avea o lenei fa’ama’i maoa’e ma mafuaaga lona lua, ua tele ina maliliu ai tagatanu’u moni a Hawaii, o le mafuaaga lona tolu lea ua tele ina maliliu ai tagata Guam ma Samoa, i totonu o le Iunaite Setete.

O lo’o faapitoa le lipoti a le Sosaiete i tagata Asia-Amerika, tagatanu’u moni o Hawaii faapea tagata o le Pasefika, i le va o le 2024 ma le 2026.

O tagata ua ta’ua i totonu o le NHPI (Native Hawaiian and Other Pacific Islanders), e faatatau i tagata nu’u moni o Hawaii, Guam, Samoa, Tonga ma isi motu o le Pasefika, Micronesia ma Melanesia.

E ui i le maualalo o le pasene atoa o tagata maliliu mai i le kanesa, pe a faatusatusa i tagata papa’e, ae peitai, e 30% le maualuga o tagata NHPI e maliliu mai i le kanesa o le susu ae 75% e maliliu mai i le kanesa o le ate.

2.5 i le 3.3 pasene isi ituaiga kanesa a tamaitai.

O le kanesa lea e tele ina maua ai alii po o tama tane NHPI, seia vagana ai tama tane mai Guam, o le ‘prostate cancer’.  O alii Guam e tele ina maua i le kanesa o le mama.

Ae o le kanesa e tele ina maliliu ai tama tane NHPI, o le kanesa o le mama.  Mo fafine/tamaitai, o le kanesa o le susu.