(w/ banner)

Pago Pago - AMERIKA SMAOA

FA’ATA O FATU MO FANAU E AUNOA MA SE TOTOGI

Na amatalia i le aso Faraile, Me 3, 2024 ia se auaunaga a le Ofisa o le Soifua Maloloina, o lo’o galulue so’otau’au ai ma le Ofisa o Aoga, aua le faia o fa’ata o fatu mo fanau a’oga, e aunoa ma se totogi.  

O le a fa’aauauina lenei auaunaga taua se’ia o’o atu i le aso 16 o Me, 2024 ma o lo’o ua u’unaia matua uma o le atunu’u, o iai alo ma fanau aoga, i le va o le 5 ma le 18 tausaga, ina ia faapea ona tatalaina le avanoa, i se aumalaga faapitoa mai i le BYU RHD, e latou te faatinoina ai lenei auaunaga e faamautu ai le maloloina o fatu o le fanau.

Mo nisi faamatalaga auiliili i lenei auaunaga, e mafai ona valaau le 633-4008 po o le 633-7733 po o le 2-1-9.

 FA’AI’UI’U TAPENAGA MO LE FA’AALIGA LONA 13 O TU MA AGAIFANUA O LE PASEFIKA (FESTPAC 2024)

E to’a 100 totino o le aumalaga a Amerika Samoa, lea ua foufou atu mo le Fa’aaliga lona 13 o Tu ma Agaifanau o le Pasefika (FESTPAC 2024), lea ua faamoemoe e faia i Honolulu, Hawaii ia Iuni 6-16, 2024.

O lenei aumalaga o le a faapea ona totogia nofoaga e faamautu ai faapea ma taumafataga, e le komiti a le malo o lo’o gafa nei ma le tapenapenaga o lenei faigamalaga.

Ua mae’a foi ona vaevaeina ofisa ma matagaluega a le malo, e gafa ma nofoaga e faamautu ai le aumalaga faapea a latou taumafataga.

O lenei faigamala, o le a taitaia e le susuga ia Loa Tauapa’i Laupola ma le Faatonusili o le Arts Council, ia Male Tiumalu.

O le faatupeina o lenei faamoemoega, e aumai i le $700,000 o tupe maua e le’i fa’asoasoaina, mai i le tausaga tupe o le 2022.

Ua fa’alauiloa mai, e $200,164.50 o le  tau aofai lea o le pasese a le aumalaga.  Ma e ui ina o le toatele o le aumalaga ua lava tapena mo le faigamalaga, ae peitai, o lo o iai nisi o le aumalaga e le o ni tagatanu’u o Amerika Samoa po o sitiseni o Amerika, o lo’o apalai ni a latou visa.

O le aso 3 o Iuni, ua faamoemoe e malaga ese atu ai le aumalaga ma toe taliu mai i le aso 17 o Iuni, 2024.

FA’AALIA LE AGAGA FIAFIA O MANASE JESSE SAPOLU I LE TOATELE O ALII PASEFIKA UA FILIFIILA I TOTONU O LE NFL

Na fa’aalia e le susuga ia Manase Jesse Sapolu, o se alo o Samoa ua lauiloa ona o lona vaitaimi sa ta’alo ai i le ‘au football faapolofesa, a le San Francisco 49ers, lona agaga fiafia tele ona o le va’aia o le toatele o alo ma fanau a le Pasefika, ua filifilia i lenei tausaga e ta’a’alo i lenei fa’agatama faapolofesa.

E pe a ma le 115 alii ta’a’alo ua filifilia mai i le Pasefika, ma o se tulaga maoae lea, pe a faatusatusa atu i le to’afa (4) lea na iai a’o ta’alo le susuga ia Sapolu, i le 1983.

O Sapolu, o se tasi na amatalia se polokalama i Amerika ua fa’aigoaina o le “Polynesian Football Hall of Fame- PFHOF)” ma o lo’o galulue so’otau’au nei ma le ‘Pasifika Rugby Hall of Fame – PRHOF’, i le sailiga o taleni talavou e mafai ona piki e ta’a’alo i Amerika.

I se faatalanoaga ma le vaega fa’asalalau a le RNZ Pacific i le vaiaso ua mavae, sa tolaulauina ai e Sapolu suafa o alo ma fanau ua filifilia e ‘au football faapolofesa, ma o le to’atolu o i latou, sa piki i le ta’amilosaga muamua, lea na ta’ua e Sapolu, ua okomeki lava ona milionea i latou.

O nei alo ma fanau, ua aofia ai Taliese Fuaga (New Orleans Saints); Laiatu Latu (Indianapolis Colts); Troy Fautanu (Pittsburgh Steelers); Kingsley Suamataia (Kansas City Chiefs); Jonah Ellis (Denver Broncos); Dominick Puni (San Fransisco 49ers); Marist Liufau (Dallas Cowboys); Giovanni Manu (Detroit Lions); Sione Vaki (Detroit Lions); Sataoa Laumea (Seattle Seahawks); Darius Muasau (New York Giants); Jonah Laulu (Indianapolis Colts) ma Devaughn Vele (Denver Broncos).

Ina ua fesiligia Sapolu po o le a le auala e mafai ai ona filifilia alo ma fanau o le Pasefika o lo’o fiafia i lenei fa’agatama.  Na saunoa Sapolu, o le ala i lenei manuia, o le auai lea i ‘au football i totonu o aoga maualuga, i le va o le 14 ma le 18 tausaga.  Ona fa’asolosolo atu ai lea i totonu o kolisi.

E ui ina iai nisi o fanau, e pei o le susuga ia Jordan Mailata, lea sa auala atu i kalapu lakapi a Ausetalia.  Faapea foi ma Louis Rees-Zammit lea sa ta’alo lakapi i Wales, ae o lea na faato’a mae’a ona saini lana konakarate ma le Kansas City Chiefs

Sa fa’aalia foi e Sapolu e faapea, o tausaga uma lava e latou te malaga mai ai , i le masina o Iuni e fai ni a’oa’oga po o toleniga ma fanau a’oga ma e masani ona o latou filifilia mai ai ni alii ta’a’alo tulaga ese i le latou taga’i, e fa’aauau a latou a’oga i atunu’u i fafo.

Ma afai ae iai ni ali’i ta’a’alo tulaga ese, e o’o lava le latou piki i le to’a 21, ma tu’uina sa’o atu lava i totonu o le NFL.