Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

 

GALUEGA KOMITI FA’AFOE COVID-19 I LENEI VAITAU

 

I se pepa o fa’amatalaga mai le faigamalo, ua fa’ailoa ai o le vaiaso ua te’a na talanoaina ai e le Komiti Fa’afoe o le COVID-19 le tulaga o le fa’ama’i o le Covid-19 i le Teritori, o isi laasaga mo le komiti fa’afoe, ma le toe tatalaina aloaia o tuaoi e aofia ai tagata tafafao maimoa.

 

Mo le vaiaso o Novema 14 - 20, na lipotia e le Matagaluega o le Soifua Maloloina e fa’apea e tasi le tagata o le atunu’u sa fa’amonia i lea taimi ua maua i le COVID. 

 

O lo’o lipotia foi e le Komiti Fa’afoe e fa’apea, talu mai le taofia o le fa'atagaga a'o le'i malaga ma fa'atonuga o tui puipui o le COVID ia Novema 15, e le'i fa'ailoa ni fa'afitauli tetele mo pasese o lo'o ulufale mai ma matagaluega a le malo. 

 

O fa'amaumauga lata mai o tagata malaga mai le aso 15 o Novema - 22, o lo'o fa'aalia ai e silia ma le 800 tagata malaga na tu'uina atu se ta'utinoga a tagata malaga i luga ole laiga po'o ua uma ona lesitala ile TalofaPass.

 

O tagata malaga uma o lo'o malaga mai e matua fa'amalosia e fa'amae'a a latou su'esu'ega fa'alesoifua maloloina i luga o tuatusi o upega tafa’ilagi (http://travelerdeclaration.as.gov) ina ia fa'avavevave ai lenei mana'oga. ile numera. Peita'i, o le a fa'aauau pea ona tu'uina atu fo'i pepa tusi i pasese pe a taunu'u.

 

Ua fautuaina e le Komiti Fa’afoe a le Covid-19 i le ali’i Kovana, ina ia toe tatala atoa le malaga mai i Amerika Samoa e aofia ai va’a  turisi o meli,  i le amataga o le 2023. I nai tausaga ua mavae, na a’afia ai le utiuti o pisinisi tau turisi a le Teritori ona o le taofia o le ulufale mai i Amerika Samoa. 

 

O le toe tatalaina o Amerika Samoa o le a mafai ai e matagaluega a le malo, pulega, ma kamupani tumaoti ona sauni mo le toe amataina o tagata tafafao maimoa mai meli.

 

O lo'o fa'agasolo mai se fa'aaliga aloa'ia i le aso e toe tatala ai ma le va'a turisi o meli e toe ulufale mai i uafu a Amerika Samoa.

 

MALAGA FAIA’OGA TAFUNA I SAMOA - SAILIGA TOFAMANINO FA’ALEAOAOGA

 

E to’a 20 faia’oga mai le Aoga Maualuga a Tafuna na malaga i Samoa, e sailia nisi metotia fou e fa’amalosia atili ai i latou i le a’otauina o fanau a le teritori.

 

O nisi o mea sa latou mataituina e aofia ai ala eseese e fa’aleleia ai mea e fa’aaogaina i a’oa’oga i totonu o potu a’oga, o mea lava o lo’o mafai ona maua gofie e i latou i le siomaga. Ua le gata i lea ua latou sailia fo’i ala e mafai ai ona fesoasoani mai Faiaoga Samoa i le polokalama o lo ua amata ona faatautaia nei: Faitau ma Ia Malamalama Lelei!

 

Ua faatulaga lenei sootaga o faiaoga e saunoa fa’apitoa ai nisi o le Matagaleuga o Aoga a Samoa, ma ua faapea fo’i ona i ai sui o le Iunivesite o Samoa i lea faatasiga mo a latou folasaga fa’apitoa. Ua faailoa foi sa auai ai le Sui Pule Sili o le Iunivesite Dr Emma Kruse Va’ai ma Leota Velma Galuvao.

 

O le ta’ita’i o lea vaega o faia’oga na malaga atu le susuga le Sooupu mai Tafuna High i le polokalama, Joseph Zodiacal, sa ia fa’ailoa, “Sa matou fiafia lava e fefa’asoa’i i mea e mafai ai ona fa’aleleia atili le polokalama Faitau Tusi fou, ma ua fiafia fo’i faia’oga Samoa e fa’asoa mai le aoga tele fo’i o le “Atoa O Samoa” e fa’aleleia atili ai lea sootaga i le lumana’i.”

 

“O le atamai e le o le poto lea e taofiofi mamau ai, ae o le poto lea e fefaasoa’i ma isi, o le atamai moni lea.” Ua matua mafuli le aotelega o faia’oga mai Samoa fa’apea fo’i ma faia’oga sa malaga atu i Samoa ina ia fa’aleleleia atili sootaga nei ua amatalia, ina ia mautu le silafia o le fanau aoga “Ia faitau ma ia Malamalama Lelei!”

 

“O le taumafaiga lenei o le a fa’aauau pea lava ma ua tofu naunau uma itu na lua o faia’oga, ia lelei sootaga uma mo le aga’i i luma o le fa’aaogaina o le polokalama ua amata talanoaina nei, Faitau ma ia Malamalama Lelei,” o se tala lea a Zodiacal.