Pago Pago - AMERIKA SAMOA

1,181 AOFAI O E UA MAUA AI LE VERUSI COVID-19 I LE ATUNUU - MAI LE AFIAFI O LE ASO TOONAI MATI 19:

I fa’amaumauga ua tuuina mai le aso Toona’i, ua fa’ailoa mai e to’a 795 i latou na faia suega o le Covid-19, e to’a 151 I latou na faamonia le iai o le vairusi , lea na o’o ai le fuainumera o tagata ua a’afia I le vairusi I le 1,181. E to’a 155 i latou ua mae’a kilia mai le fa’ama’i, ma ua maua fo’i le aofaiga o e ua totoe e tatau ona fa’akilia mai le covid e 1,026.

I se fautuaga mai I le alii foma’I ia Dr. Akapusi Ledua, ua u’unaia ai le tatau ona faatulaga lelei o se fuafuaga a aiga mo le faanofoesea o se tagata o le aiga, aua taimi e faamaonia ai se tasi o le aiga ua a’afia I le Covid-19.

“O se isi mea ua iloga mai, e le o tagata uma ua faamaonia suega Covid-19 e foliga ma’i pe ua a’afia tele. O i latou na e fa’anofoesea i aiga mo le 14 aso ma feso’ota’i mai lava i foma’i lautogia mo fa’amaumauga ma fa’atonuga i le aga’i ina mae’a ai o le 14 aso o lo’o fa’anofoesea ai i aiga.” O se toe tala mai lea a Dr Ledua.

Na fa’atino le tuiga tele i le Maketi i Fagatogo i le aso To’ona’i na te’a nei ma na fa’amae’a lelei i le itula e 2:00 i le aoauli, lea na maua mai ai le aotelega o e na tuia ua mae’a fa’ailoa atu i luga.

E toalua nisi ua taofia nei i le tatou falema’i fa’apitoa mo gasegase Covid-19 i Faga’alu. Peita’i ua leai lava se tasi ua fa’amauina ua maliu ona o le covid-19.

Peita’i o lo ua fa’aauau pea lava ona galulue malosi le malo ina ia tufatufaina atu mea tausami mo i latou uma ua mae’a ona fa’anofoesea i tua i aiga. Ua fa’ailoa mai o nei tausami uma o lo’o tapena mai e le SLP poo le polokalama o mea taumafa a le fanau a’oga. Ua fa’ailoa mai fo’i ua mae’a lelei ona tufatufaina pepa mea’ai mo fanau a’oga ta’ito’atasi i o latou matua ma aiga, lea ua fa’avasega ai le $200. mo le tamaititi e to’atasi.

Ua fa’aauau ona tufatufaina atu fo’i mea taumafa vela a le TAOA mo tatou tagata matutua, ma ua fa’atolu ona faia lea tautua i le vaiaso fou, peita’i o le vaiaso na te’a nei sa faia ai na’o le aso Lulu ma le aso Faraile. Ua fa’atulaga lea polokalama e tofusia lava afio’aga ta’itasi ma nofoaga ua mae’a fa’amautu e aga’i atu i ai tagata matutua mo latou taumafa vela.

Mo sui ua taofia i le falema’i i Faga’alu ua lipotia mai e Dr Ledua, “O le tasi o sui ua taofia nei e na’o le 56 tausaga le matua o le tina, ma ua taofia ona ua maua uma ai auga o le fa’ama’i, ua taofia seia faia uma ia te ia togafitiga e lima o le Covid-19, ma o lo’o ua sologa lelei lava ona suiga ua fa’amauina nei talu ona taofia. E le’i faia ni ona tui puipuia, o ia fo’i o se tina e tele nisi ona gasegase o lo’o inuvai ai, e tele lavelave o togafitiga  mo ia, ae fa’afetai ua solosolo lelei togafitiga mo ia.”

“O le sui lona lua o le tina e 71 tausaga, na taofia mai i le aso Lulu, Mati 16, ua togafitia o ia i le avatu ia te ia le okesene i nisi taimi ae le o taimi uma. Ua mae’a faia ona tui puipuia e lua, ae le’i faia sona tui o le Booster. Ua faia fo’i le togafitiga e lima ua fa’atulagaina mo sui uma ua maua i le Covid-19 ma fa’amautu fa’amaumauga o le aoga o nei togafitiga mo sui ua togafitia ai.”

Sa i ai fo’i se tasi sa taofia ae na toe fa’ate’a ae le’i mavae le 24 itula o lea lava aso. O le tasi o le tina ma’itaga ma ua mae’a nei ona fanaua e ia le pepe teine e le o a’afia i le Covid-19 peita’i na taofia o ia ona ua fa’a maonia lana suega o ia te ia le verusi o le Covid-19. Na fa’ate’a i la’ua ma lana pepe i le aso Faraile, ae ua mae’a faia le tui muamua o ona tui puipuia e lua o le tina failele.

O le isi e to’alua ai sui na taofia fa’atopetope ma toe faate’a, o se tamaititi e na’o le 7 tausaga le matua, e lei faia ni tui puipuia o le alo lea, ae manatua fo’i ua mae’a fa’atulaga tui mo fanau e 5 tausaga se’ia oo i le 11 tausaga le matutua.

“O i latou uma lava e maua ane ua i ai le verusi Covid-19, afai e le o iloga mai ai auga tigaina o le Coronavirus, e sainia le feagaiga ma le DOH, siakia ona fa’anofoesea lea i tua i le aiga, peita’i o i latou lava ua iloga mai e tatau ona mua’i faia ai togafitiga o le Covid ina ia toe fa’afo’i le malosi atoatoa, e taofia ma faia loa i ai togafitiga fa’atulaga mo le Covid-19.”

FA’AMAONIA A’IA’I ATALI’I SAMOA AVEA - CHIEF EQUITY OFFICER OFISA PULEGA ANCHORAGE ALASKA:

O se tasi o alo o le atunuu, Uluao Junior Aumavae mai Iliili Amerika Samoa, ua fa’alauiloa mai le fa’amaonia mai e le Pulega o Anchorage, Alaska  ina ia galue o se “Chief Equity Officer” mo le Ofisa o le Pulenuu o lea a’ai tele i Alaska. O ia fo’i o se ulua’i alo o Amerika Samoa ua mafai ona ausia le galue ai i lea ituaiga o tofiga.

O le tofiga lenei na mua’i tofia i ai Aumavae e faigaluega ai ia Oketopa 11, 2021.  O lea tofiga ua fa’atulaga i le Ofisa o le Pulenuu Mayor Dave Bronson, ma o ia fo’i lea sa ia fa’alauiloa aloa’ia mai lenei fa’aiuga a le Pulega o Anchorage ua fulisia ai e tulai Uluao e tautua ai lea a’ai atoa.

Na fa’ailoa le agaga  fa’afetai o Aumavae, i le avanoa lelei ua tuuina mai e le Pulega o Anchorage e tautua ai, ma fa’atino tiute ua tofia ai o ia e faia mo le a’ai atoa o Anchorage.

Ina ua feso’ota’i ma Uluao Junior Aumavae sa maua loa se fa’amaumauga e mafai ona fa’ailoa atu i le mamalu lautele o le atunuu e tusa o lona tupuaga. 

“O au na ou ola a’e lava i le Falemai LBJ Medical Center i Faga’alu, o ou matua o Uluao Jack Aumavae ma Enike Falemai Aumavae o Iliili Amerika Samoa. O i matou ma o matou matua e auai i le Ekalesia Aso Fitu o le Toe Afio Mai i Iakina Iliili, o le fanua lea o le aiga o si o’u tama o lo’o fa’atuina ai le Malumalu.”

Na tu’ua e le aiga o Aumavae ia Amerika Samoa mo Alaska, a’o itiiti o ia.  I le I’uga o ana a’oa’oga, sa faamanuiaina ai o ia i se sikolasipi I le Iunivesite I Uasigitone I Sasa’e (Western Washington University).

I le iuga o ana a’oga i lea Iunivesite, sa ia ausia ai le toe fa’aauau o lana ta’alo i le NFL, IFL ma le AFL ma sa ta’alo fa’apolofesa ai i le au malosi a le Dallas Cowboys ma le New York Jets i lona soifua ta’alo i le NFL.

O lo ua i ai lana Fa’alapotopotoga ua fa’aigoaina o le Elite Athletic Trend [EAT] lea e faufautua ma fa’amalosi’au i le vasega o fanau a’oga i fia ulufale i a’oga maualuluga ma Iunivesite e ala i lo latou ausia o sikolasipi mai a latou ta’aloga o fiafia e fa’atauva ai. Ua le gata i lena ae ua amata mai fo’i ona fa’aaoga e ia avanoa lelei e mafai ai ona fa’amalosi’au i le fanauiti e aoga ona a’otauina i so’o se fa’agatama e fia iloa ta’alo fa’atauva ai, ia oo ina avea ma talavou, ae ua mautu le silafia lelei o tulafono ma aga o ta’aloga e saili ai latou avanoa mo a’oa’oga maualuluga.

O se isi vaega tele o lana polokalama lea, ua ia taga’i toto’a ai i le soifua o fanau o lo’o lu’ia pea ma afaina ona o le tagofia o vaila’au o’ona ma fuala’au fa’asaina e nisi o latou aiga, poo i latou fo’i ae le’i taitai ona mae’a le pule fa’amatua ia i latou. O i latou ia e fesoasoani i ai o ia e avea o se faufautua, avatu fo’i se fesoasoani e taumafai ona tu’ua ai le amioga le tatau, ae alofaiva i ta’aloga e suia ai le olaga fa’atasi ma isi fanau o lo’o tutupu fa’atasi ane i totonu o Anchorage.

O fua o ana galuega ia, ua va’aia ma ua mafua ai fo’i ona avea o ia ma se tasi ua mau fa’atuatuaina e le Pulega o le a’ai o Anchorage, ia se’ei o ia i lea tofiga ua tula’i ai nei.

I le taimi nei, o lo’o tausia lava nai ona matua ma le aiga, e le’i fa’aipoipo le aloali’i Samoa lea, ma e le’i toe fo’i mai lava i fanua nei i Amerika Samoa talu ona malaga atu i fafo ao ititi lava.

Ua fa’ailoa mai fo’i, pe afai e i ai se mea e manatu ai se tasi e fia fa’afesoota’ia le susuga le Chief Equity Officer i Anchorage, ua fa’aulu uma atu fa’afesili ma tusitusiga i le ofisa o Corey Allen Young, sui fa’asalalau o le Ofisa o le Mayor Dave Bronson i le tuatusi emeli  corey.young@anchorageak.gov, poo le telefoni 1-907-229-4150.