Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

E MAE’A LE NOFO VA’AVA’AIA FAIA TUI PUIPUIA COVID-19 A LE AUMALAGA

 

Ua fa’ailoa e Kovana Lemanu Peleti Mauga e fa’apea e faia tui puipuia o le COVID-19  o le aumalaga o lo’o nofo vaava’aia i le Tradewinds Hotel, pe ma’ea le nofo va’avaia mo le 14-aso. 

 

O le saunoaga lea a Lemanu i le fonotaga ma le au tusitala i le aso Faraile ua te’a i le potu fono i le Ofisa o le Kovana. 

 

“O le aumalaga ua to’ai taunuu mai uma ma fa’anofoia le faletalimalo o le Tradewinds, o lo’o manuia uma latou suega na faia, e leai se tasi o lo’o maua i le Covid-19, e tusa ai o iuga o latou suega na faia,” o se tala lea a Lemanu. “E toe faia le isi a latou suesuega a’o le’i mae’a le 14 aso o le latou nofo va’ava’aia.” 

 

Ua fa’atolu ona faia o suega nei i le aumalaga muamua lenei ua toe foi mai i Amerika Samoa, a’o nofova’ava’aia i Honolulu, ona fa’ato’a malaga mai ai lea. Ua ia fa’ailoa fo’i lona agaga fiafia tele, ua va’aia le saogalemu pea lava o le atunuu mai lenei fa’ama’i.

 

“O le fa’anaunauga numera tasi i so’o se ta’ita’i o malo, o le toe fa’afo’i mai lea o pelega a le atunuu ma aiga i ona laufanua, ia toe mafuta ma aiga, ae ia mautinoa muamua lava o le mana’o i le I’a, aua lava ne’i masaesae ai le upega.Ia taofiofi lava lenei fa’ama’i mai le a’afia o le mamalu lautele o le atunuu i lona lotoifale,” o le tala lea a le kovana. 

 

Na fa’aauau lana saunoaga e tusa o le aumalaga e tatau ona faia tui puipuia o le Covid-19, “A’o le’i tu’ua fo’i e i latou nei uma le nofoaga o alaalata’i ai nei mo suesuega, o le a mua’i faia o latou tui puipuia muamua o le Covid-19, ae ua aofia i lenei aumalaga, nisi o fanauiti ma e talavou ua le aofia i ni tuiga nei e puipuia mai le Coronavirus.”

 

O le aso Tofi o le vaiaso na te’a, ua mafai ona oo ane nisi o aiga o le au malaga e fa’ao’o ane ni mea’ai mo i latou ma e fa’aaoga lava le vasega o leoleo faitoto’a i luma o le faletalimalo, e tuu i ai ma fa’ailoa ai le suafa o le pasese, ona toe fo’i lea o i latou i le fale, ae o le a molita’i e le aufaigaluega latou fa’amomoli ma le agalelei.

 

Ua fa’afetaia e Lemanu le mamalu uma o le aufaigaluega o lo’o fa’amalosia ma va’aia toto’a mea uma e tusa o le nofova’ava’aia ai o lenei pasese e to’a 159.O le vasega fa’apitoa fo’i sa latou tuufa’atasia lenei fuafuaga o le tausiga ma le puipuimalu ai o le saogalemu o le atunuu atoa. O nei faiva e le faigofie ma o le fa’ataunuuina fo’i o le isi lea vaega sili ona taua, fa’afetaia ai i latou uma o galulue ai i taimi uma.

 

O le isi fa’afetai fa’apitoa o le afioga le Kovana o Hawaii, le alo o Amerika Samoa Nikolao Pula ma le latou ofisa fa’alotoifale Lydia Faleafine Nomura o le DOI, le au galulue mai mo lenei fa’amoemoe i Hawaii, fa’afetai tele. O nisi e to’atele o le augalulue lea e ofo mai le latou tautua, o se auaunaga sili ona taua i le loto i latou na, fa’afetai. Le aufaigaluega a le tatou Malo mo le Ofisa i Hawaii malo lava le fa’atoatoa.

 

Fa’ailoa e Lemanu ua amatalia fo’i “ona fuafua le isi malaga e soso’o mai e toe fa’afo’ia mai ai nisi o tatou pelega i fanua ma aiga.”

 

O le a matua fa’amama a’ia’i le nofoaga lenei mo le fa’amoemoe e soso’o mai, fa’ato’a toe fa’aaogaina ai, ma ia va’ai toto’a fo’i i le aotelega o le sapalai o so’o se ituaiga o mea e faaaoga mo le nofova’ava’aia ia lava ma totoe le fa’asoa. O i latou uma sa galulue ma fa’aaoga tele i lenei nofova’ava’aia, o le a faia sina malologa ae toe fotua’i mai le isi fuafuaga e soso’o mai.

 

MAUTU I OFU - LE LATOU FAIFE’AU FOU [EFKAS]

 

O lo ua silafaga le atunuu i le tula’i mai o le susuga le Faife’au EFKAS fou i le afio’aga ma le ekalesia i Ofu Manu’a, le susuga Rev. Solomona Ierome Tai’i ma le Faletua o Senira Tai’i ma o laua alo.

 

E to’ai taunu tonu atu lava i la’ua ae amata loa fo’i ma tapenaga a le autalavou i Ofu mo le latou so’o ma le ekalesia i Olosega lea o lo’o galulue ai le susuga Rev. Elder Lamese Faafili ma le faletua ma le fanau.

 

O le susuga le Faife’au ma le faletua o mamoe na fa’afailele e le Ekalesia Fa’apotopotoga Kerisiano i Pago Pago, e le susuga le Rev Richard Fa’avae ma le faletua o Mafo’e Fa’avae faapea le Ekalesia atoa.

 

O le fa’afeagaiga na soifua a’e i Safa’ato’a Lefaga i nai ona matua o Ielenimo ma Sefulu Pasefika Tai’i. Na oo mai o ia i Amerika Samoa nei i le atoaga o le 2 o tausaga o le soifua ma fa’amautu i Faga’alu.

 

O lona uiga o le olaga atoa o le talavou mai o lo’o ua alaala pea i Fagaalu. Na amata aoga i Matafao Elementary, ma soso’o ai ma le a’oga maualuga i Samoana. 

 

Peita’i na amata tapui lona olaga fa’aleagaga e Rev.Ioelu Taeoatui ma Valasi Taeotui, soso’o lea ma le tima’ia o ia e Rev. Fa’atui ma Elisapeta Laolagi i Fatumafuti. Na mae’a lena ae mafuta o ia ma Rev. Togilau ma Apofua Taula’i. O le fa’afeagaiga fo’i sa tele sona taimi ma Solomona Ierome o Rev. Elder Logovii  Polu ma Konesane Polu, lea na fa’ato’a soso’o mai ai loa ma Rev. Lalomauga ma Saifagaloa Pa’au o lo’o galulue pea i Faga’alu EFKAS.

 

O le soifua galue lea i le afio’aga na fa’afailele maia le soifua talavou o lana susuga le Faife’au Samoa Solomona Ierome Tai’i ona mau paolo mai lea i le afio’aga o Pago Pago ma avea ai fo’i matua fa’aleagaga o i ai, Rev. Richard ma Mafoe Fa’avae ma o la’ua fa’amoemoega i le taumafaiga ina ia ulufale i le A’oga Fa’afaife’au i Kanana Fou.

 

E 15 tausaga o lo’o galue i le ASPA i le vaega a le Toso Laina, [Leadman Lineman Crew] i lalo o le pulega ma le va’ava’aiga mau a le afioga Utu Abe Malae.

 

Ona tuua lea o le galuega i le 2015 ina ua lagonaina le musumusuga a le Agaga Pa’ia e fia galue mo le Ali’i e ala i le tofiga o le Faife’au Samoa. Na su’e ai lava i le tausaga lea i le a’oga fa’afaifeau a le Seminare i Kanana Fou ma sa tele se taimi na fesoasoani ai Rev. Orekene Taofi i lea taumafaiga ia manuia ma ulufale loa.  O lea fo’i le fa’afeagaiga sa ia va’aia le Ekalesia a’o fai malologa le Faife’au ma le faletua ma le aiga.

 

Ina ua ma'ea mai taumafaiga ile laumua le tausaga e 2019, sa tatalia loa se ekalesia e fa’anofonuu ma tausia. Peita’i, o le taimi lelei lea na maua ai loa le avanoa ile kamupani a le Nana's Construction, e avea ai ma supervisor mo nai masina e tausia le aiga ma fai ai taulaga o le galuega a le Atua.

 

Ina ua maea sa maua le isi avanoa e faigaluega ai i totonu o le Ofisa o le Ekalesia i le Ofisa o A’oga a le Fanau i le Laumua. E tusa pe tolu lava masina talu ona faigaluega i lena tofi, ae vala’auina loa e sauni ua mana’omia i ma’ua i le galuega i Ofu, Manu’a.

 

O le tina o le galuega, o ona matua o Mulufualava Maiava mai Masefau ma Senira Tuuao Tiu o Pago Pago. Fa’au’u mai le a’oga a Matafao Elementary i ana a’oa’oga tulaga muamua ma fa’asolo mai fo’i i Samoana High ma fa’au’u mai ai.

 

O Oketopa 19,2006 na fa’aipoipo atu ai o ia i le susuga le Fa’afeaiga Taulagi a le afioaga o Ofu i le taimi nei, Rev. Solomona Ierome Ta’i’i.

 

Sa mua’i galue o ia o se Faia’oga i Pago Pago ma Matafao i le ECE, po’o fanau a’oga laiti fa’ato’a amata a’oa’oga. Na faato’a malolo mai lea tofi ina ua amata le a’oga ua ulufale i la’ua ma le A’oa’o i le aoga fa’afaife’au a le Seminare i Kanana Fou i le tausaga e 2015.Na maea lelei le la’ua fa tausaga i le a’oga fa’afaife’au i le tausaga e 2019 ma fa’au’u mai ai.

 

Ua fa’amanuiaina foi le la’ua aiga i le fanau e to’a fa lea e aofia ai tama: Jared, Jerome, Hansel le uii ma le teine e to’atasi o Sefulu. Na faigaluega fo’i le Tina o le galuega i le vaega a le Aiga Manuia po’o le MIECHV o le Maternal Infant Early Childhood Home Visiting, i le va’ava’aiga a le tamaitai pule o Merenaite ae o lo’o avea pea le susuga Motusa Tuileama Nua ma fa’atonu sili o le Matagaluega o le Soifua Maloloina.

 

Na tuua atu lava e i la’ua le galuega i Pago Pago ma soso’o atu ai loa ina vala’auina mo le galuega i Ofu, Manu’a. “Ua ma’ua fa’afetaia i latou uma sa tofusao i le ma’ua taumafaiga, tau ina ia vi’ia le Atua i se mea ua faia mo ia e ala i lenei tofi. Fa’afetai tele lava.” O se tala lea a le susuga le Faife’au Samoa Solomona Ierome Tai’i.