Ads by Google Ads by Google

Tala I Vaifanua


O se vaaiga i tama’ita’i masaga 4 ua atoa nei le latou ta’i 9 masina le matutua ua tolu nifo o le tama’itai sa uii ai lava, ma le tamaitai matua, ae o le lona lua ua lua ona nifo, ma le tamaitai lona tolu e ma’ale’ale lava si ona loto, ua na’i le tasi lona nifo ua i ai. Peita’i e fa’afetaia le fa’aauau pea lava o le foa’i o Napekini ma Pepa Solo a le ituaiga o le Huggies mai le Pacific International Distributors Inc lea na amata mai lava i le fananau mai se’ia oo i le atoaga o le latou tasi le tausaga. [ata:Leua Aiono Frost]

Pago Pago, AMERIKA SAMOA - 

 

 

FA’AAUAU FOA’I ‘PACIFIC INTERNATIONAL DITRIBUTORS’ MO “ULUA’I MASAGA 4” - AMERIKA SAMOA:

 

O le aso Gafua na te’a nei sa oo atu ai le tama’ita’i o Christa Satele ma le foai o pusa o Napekini ituaiga o le Huggies ma Pusa Pepa Solo ituaiga lava lea e tasi e fa’ataunuu ai le latou foa’i ua mae’a ofoina mai le amataga, ina ua fa’amanuia le Atua i se masaga 4 o pepe teine lalelei ua soifua a’e i Amerika Samoa, ia Ianuari 2020.

 

Mai le amataga sa ta’i lua masina ma faia lenei foa’i, peita’i, in ua matauina ua amaga ona vave si’isi’i pauna o le fanau lalelei, ua manatu ai le pulega alolofa a le Pacific International Distributors Inc, o le a faia ta’i masina ma fa’ao’o le meaalofa, ina ia mautinoa ua ofi lelei i la’ua i ituaiga napekini anagata o le a fa’ao’o atu mo le latou tausiga lelei.

 

Ua molimau fo’i le tina o Filomena Sokimi, “O le matua aoga o lenei meaalofa mo le olaga o nei teine, ou te tatalo lava ia aoga i latou nei i nisi po’o lenei fo’i pisinisi pe a matutua mai ma ua ola saogalemu i le tatou atunuu. E matua leai se fa’aletonu o le oloa o lo’o aumaia mo le tausiga o le fanau, e anagata le ituaiga lea, ma ana faapea e le foa’ia mai e le Pacifi International Distributors Inc. mei ituaiga napekini latou te aumaia mo fefa’atauga’iga i le atunuu, ailoga ma te gafatia ma le tama ona fa’atau e i ma’ua lava mo le tausiga o le fanau. O le mea lea e fa’afetaia tele ai le Pulega ma le Aufaigaluega atoa a le PID ona o le agalelei ma le alofa i lenei aiga. O ai ea le tagata ua faia ai lenei meaalofa taua? Fa’afetai tele lava!”

 

Ua i ai se fa’amoemoe o le kamupani fa’apea le aiga, o le toe foa’i mo le fanau i le atoaga o le latou tasi le tausaga, masalo o le a faia tonu lea i lo latou aso soifua.

 

FAAMANATU E LE ROTARY CLUB PAGO PAGO- GALULOLO TELE I SAMOA

 

Na poto le aotelega o le Komiti Fa’afoe o le Rotary ma le to’atele o latou totino i le nofoaga o lo’o i ai le ma’a fa’amanatu o le Tsunami Setema 29, 2009 i le Paka Liona ina ia faia se latou sauniga lotu puupuu ma sina malu taeao e faamanatu ai le atoaga o le 11 tausaga talu ona lofia Samoa atoa i lea galulolo tele ma maliliu ai le toa 147 o Samoa na lua.

 

“Ua le misia lenei tausaga i lenei fa’amoemoe. O le Rotary lava latou sa fa’amaite mea i lenei fa’amanatuga taua. O tagatanuu o Samoa na lua na fa’ate’ia ma maumau le soifua fa’afuase’i, ona o lea galulolo tele, ma e tatau lava ona fai le tatou faamua, aua o le taua lea o le atunuu ma ona tagata ia i tatou uma, o sui taito’atasi o le Rotary,” o se tautalaga lea a le ali’i Perestene o le Rotary o lo’o tulai mai, Frank Barron.

 

Ua ia fa’amalosi fo’i i le to’atele o latou sui, o le a lava se latou galuega na fa’amati’e ia latou to’a’aga fo’i e faatino, “Ia tumau lo tatou naunau e fa’atasi ma fa’atino le tatou auaunaga mo le mamalu lautele o tagata fa’apea le malo. O le tatou anava tau’ave lena. Fa’amalo ia i tatou uma ua mafai ona auvaa potopoto mai i lenei aso, aua o se faalavelave sili lea ona mata’utia ua sofa’i ai le tatou nei malo i tausaga e le’i mamao tele atu. Fa’afetai o lo’o tumau pea ia i tatou le agaga fia fa’amafanafana atu i aiga uma sa maumau le soifua o nisi pele ma mamae mafutaga ona o lea fa’alavelave fa’afuase’i faanatura. Tau ina tatou galulue punoua’i pea mo nisi fesasoaoni eseese e tatou te gafatia ona fa’atino ma fa’ataunuu mo le mamalu lautele o Amerika Samoa,” o lana toe saunoaga lea ona tu’uina atu lea o le tatalo e si’itia e se tasi o tino iloga tamaitai o le Rotary.

 

Sa talosia le saogalemu ma le so’otaga fa’aauau pea a le mamalu lautele ma le Atua o atua ma o le e ona mea uma lava. Ua talosia foi pelega a i latou na amia le soifua ona o le Tsunami 2009. Ia faamafanafanaina i latou, ma gafatia e i latou ona soifua pea ma le mautinoa o loo tausia tutusa i tatou uma i lona alofa tunoa. O le talosaga fo’i ia fa’amanuia i taumafaiga o lo’o fa’atautaia e le Rotary ina ia fesoasoani i le soifua lautele o tagata uma, e ala i poloketi o lo’o latou fa’atautaia i le atunuu ma o lo’o taumafai pea ona fa’aauau ma le fiafia.

 

Na latou faasoa le malu taeao matagofie ma le felanulanua’i e fa’amae’a ai le latou fa’amoemoe i le taeao ananafi.

 

 

LE TOTOGIA SIAKIGA O LE FATU - FA’AMANATU AI LE “ASO FAAPITOA MO LE FATU I LE LALOLAGI:”

 

O Setema 29, ua avea foi ma le aso faapitoa o le Fatu i le lalolagi atoa ma ua fa’apea fo’i ona aofia ai Amerika Samoa i le faamanatuga o le aso e fa’ataua ai lou fatu, siakia lelei po’o i ai se gasegase o le fatu o lo’o ua e maua ai, pe ua faaolioli ona e maua ai.

 

Ua fa’ailoa mai, o le Ma’i Fatu o se tasi lea o ala ua matua to’atele o a tatou pelega i aiga ta’itasi ua maliliu ai. Ma afai fo’i ua maliu se tasi o le tou aiga i le ma’i fatu, ua fa’apena fo’i ona soloa’i mai fanau e ao lava ina matua tinou e va’ai toto’a o latou fatu, aua e ono maua ai fo’i i lea ituaiga o ma’i fatu.

 

Ua faailoa mai se meaalofa sili ua ofoina mai e le Matagaluega o le Soifua Maloloina, ua latou faatulaga le fa’atinoa lea o talavai i le falema’i i Tafuna ina ia soloa’i atu i ai tagata matutua ma fanau, ia faia latou talavai siaki o le fatu, ia mautinoa lelei poo lelei atoatoa lou fatu pe leai.

 

O le aso ananafi lea na faatulaga ai lea tautua mo le mamalu lautele o le atunuu ua sogasoga ia iloa patino poo lelei atoatoa o latou fatu pe leai, ae amata loa ona vaaia fomai faapitoa o le fatu mo togafitiga.

 

Manatua ua fautuaina lava, o le vave ona vaaia o lou fatu, o le aoga fo’i lea o togafitiga uma i so’o se tasi. O lona uiga, ua fautuaina le mamalu lautele o le atunuu, “A fautua atu loa le foma’i na va’aia lou fatu ua tatau ona e va’aia se fomai fa’apitoa mo le faaluaina o lana siakiga ma ua tau matauina ua a’afia lou fatu i se gasegase, e ao ina e fa’alogo ma faatino lea fautuaga. A vave ona togafitia lou fatu, o le aoga fo’i lea ia te oe poo le fanau talavou o togafitiga ma tauau e le oo ai oe i se taotoga o le fatu.

 

Ua fa’apea fo’i ona fautua mai le foma’i Dr Anaise Uso, i le mamalu lautele o le atunuu, “Alofagia le atunuu ma fa’aaoga tatau lenei avanoa ua tatou maua e faia ai talavai siakiga o le fatu e aunoa ma se totogi. Atonu o lou usita’i i lea fo’i tima’iga o le a fa’asaoina ai oe i se ma’i fatu o fa’aolioli mai e te a’afia ai.O outou fo’i ua matauina ni fa’aletonu i o outou alo, e mafai ona siakia le fatu o i latou i lenei taimi, ma iloa patino ai nai lo le oo mai o se ma’i oso faafuase’i ae le o nofouta i ai i tatou o matua.”