Pago Pago, AMERIKA SAMOA

FAAGASOLO POLOKALAMA FA’AMASANI MATUA FA’ATAUTAIGA O A’OGA TAUSAGA A’OGA FOU

Ua tatou la’asia nei se tausaga ese lona fa’atautaiga o a’oga a le fanau pe afai ae toe a’e a’oga mo le tausaga a’oga fou 2020-2021. Ua fa’atonuina e le Matagaluega o A’oga a le Malo a’oga uma i le teritori, e aofia ai a’oga tulaga muamua ma a’oga maualuluga uma, na ia usita’ia le fa’atulagaga fou e fa’atautaia ai a’oga i le teritori o Amerika Samoa.

O le faiga fou ua tuuina mai, e auauai fanau a’oga i le aso ma lea aso fa’atulagaina i potu a’oga mo a’oga e faia mai e le faia’oga, peita’i ua i ai aso ua fa’atulaga e fa’aauau ai a’oa’oga mai o latou fale.

I le vasega o faia’oga uma i aoga tulaga muamua, ua fa’atonuina ina ia matele e faia kopi o lesona a le fanau a’oga ma fa’avasega lelei e taua’ao i matua, peita’i o a’oga maualuluga ua fa’atulaga ina ia faia so’otaga lelei lesona i potu a’oga o le fanau ma le taim e toe soso’o ai lesona i tua i aiga.

O le so’otaga i upega tafa’ilagi o le a fa’aaogaina tatau ma ia silafia lelei e matua ona fa’alogologo ai fo’i ma i latou, i taimi o vasega a le fanau i aoga maualuluga. O lo ua ai nei le polokalama ua fa’agasolo a Fagaitua High School, ua feso’ota’i ai ma matua uma o fanau a’oga i le latou a’oga maualuga, ma ua taumafai ona fa’amasani matua ia maua e i latou le so’otaga i upega tafa’ilagi lea o le a fa’atautaia ai a’oga i potu a’oga ma a’oga fo’i a le fanau i totonu o potu a’oga.

Ua vala’au fo’i i le a’oga a le Nuuuli Voctech High ina ia fa’ailoa mai se fuafuaga ua fa’atulaga mo le a’oga a le fanau i le tausaga a’oga fou lea o le a amatalia ia Aokuso 31, 2020. Ua fa’ailoa mai, o le fonotaga ia Aukuso 20 a le PTA o le a fa’ailoa mai ai fo’i le latou so’otaga i upega tafailagi i matua ina ia silafia e matua ala e siakia ai latou fanau i potu a’oga, ae maise o le so’otaga i emeli o le a fa’ailoa mai ai i matua galuega e faia e le fanau i le fale.

Ua fa’ailoa mai o lo ua fa’atulaga fo’i e le Matagaluega o A’oga le aso Gafua aso Lua ma aso Faraile e a’o’oga atu ai le fanau ua ulufale i le vasega 9 ma le 10, ae o aso Lulu ma aso Tofi ua fa’atulaga lea mo fanau i le vasega 11 ma le 12 o vaiaso ta’itasi. Ua laugatasia a’oga maualuluga uma i lena fa’atulagaga, ma ua tatau lava ona usita’ia.

O le vaiaso fo’i o loma o le a fa’aalu lea e a’o’oga ai faia’oga uma i le fa’amoemoe ua fa’amautu mai e le Matagaluega o A’oga e fa’atautaia ai a’oa’oga i potu aoga a le Aoga lenei o Matata Eseese, ma e tatau lava ona mua’i silafia e faiaoga a latou galuega e ao ina faia, ona fa’ato’a fa’auia mai lea mo le silafaga a Matua.

I le polokalama ua fa’agasolo nei a Fagaitua, o lea ua matua mafuli lava le vasega o ta’ita’i i le pulega ma le vasega o faia’oga ina ia fa’amautu a’ia’i le fa’atautaiga o aoga a le fanau e le gata i latou faia’oga, ae ua fa’apea fo’i ona fiafia e soloa’i mai lea fa’amoemoe i le vasega o matua uma.

O le a fa’ailoa atu le lomiga o le aso a taeao, le polokalama fa’atautaia a le a A’oga Maualuga i Fagaitua, ma ua i ai nei i latou i Aunuu i le aso Lulu, e feso’ota’i ma matua uma o lo’o alaala i lea motu, le faiga o le a feso’ota’i ai ma fanau a’oga. 

Peita’i i nei mea uma ua fa’aalia, ua tatau ai ona sogasoga matua ina ia maua lava le so’otaga fa’ainiteneti aua a’oga a le fanau. E le gata i lea, ae ua fa’ailoa mai e le vasega o faia’oga, ia alofagia e matua uma, fa’aavanoa lava le taimi mo a’oga a le fanau i aso ta’itasi, e tatau ai ona faia latou meaaoga i aso o a’oga i le vaiaso atoa, lea ua fa’atulaga e nonofo ai fanau i le fale.

O lona uiga, ua potu a’oga fo’i lou fale, ia tapena lelei le fanau mo se latou potu ma le laulau e fa’atino ai latou meaa’oga, ae sootaga atu i le faia’oga i le potu a’oga i aso ua nonofo ai i latou ma faia meaa’oga i aiga.

FA’ATULAGA MAI TOTOGI AMATA - LATOU UMIA FA’AILOGA AA / DIPLOMA:

Talu mai se taimi umi, ae o lea fa’ato’a fa’atulaga mai se totogi e amata faigaluega ai se tasi ua maua fa’ailoga AA mai le ASCC ma fa’ailoga High School Diploma, pe a maua se avanoa i galuega a le Malo.

Ua fa’avasega nei, afai o oe ua mae’a uma lou fa’aloga mai a’oga maualuluga a le Malo Diploma, o le a amata lou totogi faigaluega i le 12,000 i le tausaga. O le to’atele o lo’o amata i le $8,000 e aga’i atu i le $11,000 i le taimi nei ua siitia loa lava lou totogi i le $12,000  tusa lava pe fa’ato’a fa’ata’ita’i oe i tiute fai o le galuega ua e tula’i ai.

Peita’i mo i latou uma ua mae’a umia fa’ailoga AA mai le Kolisi Tuufa’atasi  i le mae’a ai o a’oga mo le lua tausaga,  ua fa’atulaga le totogi amata o i latou i galuega a le Malo i le $16,000. tusa lava fo’i pe leai sou iloa lelei ona fa’atino o tiute o lo ua e talosaga e te galue ai. O nei siitaga o totogi mo nei fa’ailoga ua fa’atulaga i le 5 la’asaga ua siitia ai.

Ua mae’a fa’atulaga le totogi e agava’a ai i latou ua maua fa’ailoga BA i le ta’i $23,000 i le tausaga ma le fa’ailoga MA ua faatulaga i le $27,000 i le tausaga.

Ua fa’ailoa fo’i le manatu fa’alauiloa o le afioga le Kovana Sili i lana lea fa’asalalauga fa’alaua’itele i le aufaigaluega a le Malo, “Ua avatu ai ma se una’iga malosi i le vasega o le aufaigaluega e le’i umia nei fa’ailoga, e fa’aaoga tatau le aoga ua fa’auia mai i lana feso’ota’i o Upega Tafa’ilagi ina ia sailia ai latou fa’ailoga ma aumaia i totonu e fa’amaumau, ina ia mafai ona siitia ai fo’i lou fa’ailoga ma lona totogi ua e agavaa ai.

Ua faia lenei si’itaga ina ia fa’amautu lelei le ituaiga o fa’ailoga e talia ai talosaga mo avanoa faigaluega amata a le malo, ma ua fa’apea fo’i ona va’ai toto’a i le taugata o le tau o le soifuaga ua i ai mo le atunuu i le taimi nei.

O lea siitaga o totogi o lo ua fa’avasega e amatalia ia Iulai 29, 2020 ma ua mae’a nei ona aeae ai le fanau talavou ua faigaluega i lenei vaitau i galuega a le Malo.