Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA

 

KAMUPANI MA PISINISI UA SILI LE A’AFIA I LE CORONAVIRUS 

 

Mai tala eseese ua tusia ma fa’asalalauina i so’o se atunuu ua a’afia i le coronavrus, ua iloga ona tapunia faitoto’a o nisi o kamupani sa sili ona olaola lelei ma tautina tagata lautele e ala i femalaga’iga mai lea malo i lea malo.

 

O le vasega o le au fa’apisinisi e fa’atulaga ai malaga, e tusi ai pasese ma fa’atulaga taimi e femalaga’i ai, o le isi lea tautua ua sili ona a’afia i le atunuu i le taimi nei.

 

Ua iloga le fa’aitiitia ma ua i’u lava ina le toe fa’aaogaina i latou i lenei vaitau, ua tapunia va’alele mai le faimalaga mai i le atunuu, ma o atu fo’i o tatou tagata malaga i fafo.

 

Na latou maua se avanoa e talanoa fa’apitoa ai ma le tatou Faipule i le Konekeresi i le vaiaso ua te’a, ma ua fa’ailoa mai fo’i e Tali Aumua Amata, “Ua i ai nisi o mataupu ua latou aumaia ia te a’u, ua iloga ai  lo latou fo’i sogasoga i o latou faiva, ma ua fautuaina ai fo’i a’u i nisi ala e finaua ai le taumafaiga ia maua mai se latou fesoasoani tautupe e fesoasoani e fa’aolaola ai latou pisinisi se’ia oo ina toe fa’aleleia feoa’iga a le mamalu o le atunuu.”

 

Ua i ai le avanoa e talosaga ai i latou o se pisinisi mo le fa’atupega tau fesoasoani tupe mo pisinisi, peita’i mo i latou o tagata faigaluega, e tatau fo’i ona agava’a i le talosagaina o latou totoogi ua matua leai lava se alagatupe o toe maua mai. 

 

O nisi o pisinisi ua iloga le a’afia o le vasega o Faletalimalo, lea e alaala ai i latou e malaga tafafao. O l taimi nei ua fa’asaga atu nei i latou e tautuaina na’o latou lava tagata i le atunuu o fa’atula’ia ai. Ua le toe gasolo mai nisi mai fafo atu o malo ta’itasi ina ia tautuaina. Ua tapunia femalagaiga ua taofia fo’i le toe malaga mai o malo asiasi ma tafafao mai i le atunuu.

 

O nisi o pisinisi sa a’afia o le vasega o ta’avale la’u pasese, lea sa limiti taimi e mafai ai ona tautuaina tagata feoa’i i le atunuu, peita’i ua toe tatala teisi le fa’asa ia i latou, ma ua iloga ona toe fo’i lava lea tulaga ina toe lelei mai, ae ua va’aia ai lava le fa’aletonu ua alia’i mai pea, ua tau leai ni pasi la’u pasese. Ua i ai fo’i ta’avale la’u pasese, ae limiti i le 9:00 i le po le taimi e toe femalaga’i ai mo pasese felaua’i.

 

O nisi o pisinisi ua tapunia mau lava talu mai ona fa’asa mo le Coronavirus, o Faletifaga mo le fa’afiafiaina o le atunuu.  E le’i toe tatalaina lava faitoto’a o lea pisinisi talu ona tapunia.

 

O Kamupani Va’aele ua ootia tele. O feoa’iga sa pisi ai le lalolagi o tagata soifua, ua te’i fa’afuase’i ona taofia ona o le fefefe o atunuu i le to’atele ua amia e le Coronavirus. O le taofiga o le pipisi fa’alaua’itele o lea fa’ama’i, ua taofia ai malaga nei. Ua soso’o atu ai ma Ofisa o Va’a La’u Pasese tetele o Meli. 

 

Ua oso maualuga le fa’aaogaina o pisinisi tau Cargo po’o Oloa fela’ua’i aua o loo tatala pea lea faitoto’a. Ua le toe maua gofie atigipusa meli sa faufaulala’i e avea i tau togipau. Ua matele ina auga lea tautua e fa’aaogaina so’o se atigipusa aua e fuapauna ma tele na’ua le totogi e ave ai lena mamafa o le fa’amomoli nai lo atigipusa nei ua togipau tau e meli ai.

 

I le vaitau lenei ua toe taofia le tautuaina o tagata e lafo meli i aso Toona’i ta’itasi ae se’i tuu avanoa i le aufaigaluerga e toe taumafai ona soti a latou meli ina ia tuumamaina le fa’ateleina o le meli fela’ua’i e le’i oo i pusameli. Ua fa’amaonia lea tulaga ia i latou ua gasolo atu ma pepa ua fa’ailoa mai e le  tuatusi o le falemeli i le initeneti ua mae’a oo mai le afifi i Amerika Samoa, ae le’i i ai se pepa fa’ailo mai le aufaigaluega a le falemeli i le pusa meli a le sui e ona le afifi.

 

Ese mai lea fo’i, ae talu mai ona i ai le a’afiaga o le Coronavirus, ua le toe mafai ona meli atu se afifi i so’o se setete o Amerika ua loka mai i le fa’asa o le Coronavirus. Ua le toe mafai ona meli atu se afifi se’i vagana ua toe tatala fo’i lea setete. I le taimi nei o le setete o Texas lea ua fa’asa ona ua toe pipisi tele ai le Coronavirus.

 

Ua fa’aaogaina tele fo’i le Initeneti ina ia feso’ota’i ai le fanau a’oga ma latou a’oa’oga i lenei vaitau, ma ua fa’amalosia atu ai ma matua, ia vave lo latou silafia lelei o so’otaga uma e mafai ona oo i ai le fanau ao nofonofo i ou autafa ma fai meaaoga. O ala nei sa fa’atuai ona mana’omia e matua ona oo i ai, ae o lea ua mana’omia ona silafia e i latou i le taimi nei. O se mea taua fo’i i le fanau, ona maua lea so’otaga tau initeneti i lona aiga e fa’aaoga i a latou meaaoga i lenei tausaga a’oga ua fa’aolioli mai i le fa’aiuga o Aukuso 2020.

 

FEAGAI LE HAWAIIAN AIR MA LE VAEGA O LE AUFAIGALUEGA

 

Ua iloga ona a’afia le tamaoaiga maua a le Kamupani Va’alele o le Hawaiian Air, ma ua le sao mai fo’i i latou mai le a’afia o latou tagata faigaluega  sa fa’amoemoeina i le latou tautua.

 

Ua fa’atulaga nei e le pulega ina ia vaea nisi o le aufaigaluega ina ua fa’aitiitia le tupe maua a le Kamupani Va’alele e silia ma le $100miliona i le kuata lona lua o le tausaga fa’aletupe 2020, lea ua mae’a auiliilia nei.

 

E tusa ai la ma le saunoaga fa’apitoa a le Peresetene o le Kamupani Va’alele, Peter Ingram, sa ia fa’ailoa ai, “O le a fa’ailoa i le vasega o le aufaigaluega i latou o le a vaea i lenei taimi.”

 

“O le toe vaea ese o nisi o i latou sa matua galulue fa’amaoni i le taumafaiga a le Kamupani e atina’e lana tautua lautele, o se mea e tiga alofa ai, aua e leai se sala po’o se sasi i le fa’atinoga o le tautua, ae ua a’afia ona o le vaivai o le tupe maua a le kamupani e toe totogia ai galuega ua fai.”

 

“Peita’i, o lenei fa’aiuga ua faia, e ao ina malamalama lelei fo’i le tagata faigaluega, o se ala e mafai ai ona fa’aauau pea le auaunaga a le Kamupani, ia lelei atoatoa le tautua e fa’atusa i nisi  o kamupani o lo’o tamomo’e fa’atasi i lea ituaiga o auaunaga, ma e ao fo’i ona fa’aauau pea le tautua a le Hawaiian Air tusa lava po’o le a fita feto’ai mai i latou i le ala.” O se tala lea a Peresetene Peter Ingram.

 

Ua fa’ailoa e Ingram, “O le kamupani atoa o le a fa’aitiitia pe tusa o le 15% i le 25% lana aufaigaluega a’o le’i oo atu i le isi taumafanafana i le tausaga fou. Peita’i ua tuu atu le faitalia i le tagata faigaluega lava latou o lo ua fia malolo mai le galuega ina ia fa’ailoa mai lona taofi. Peita’i ua i ai fo’i nisi ua filifilia e le pulega e ao ina vaea o le a fa’ao’o lava i ai latou tusi fa’ailo.”

 

Ua lipotia mai i nisi o fa’asalalauga, “O le taofiga o tagata malaga mai i Hawaii e nofovaava’aia mo le 14 aso, ua sili atu ai ona to’atele ai nisi ua le manatu ina ia malaga mai i Hawaii.”