MALAGA MAI SUI KOMITI VERETENI  — ASIA NOFOGA V.A. & PENEFITI

Fa’ailoa mai le Laumua i Uosigitone DC, le toe pasia e le Komiti Fa’apitoa a le Konekeresi e tagai toto’a i tautua eseese mo Fitafita Tuai po’o Vetereni, le ali’i Taitaifono Mark Takano, ua ia fa’ailoa manino, “E asia e le Komiti teritori ma setete o Amerika i le Pasefika e aofia ai Guam, Phillipines, Northern Mariannas, Amerika Samoa ma Hawaii, ina ia va’ai toto’a i latou nofoaga fa’apitoa e fa’ao’o atu ai tautua ia latou, fa’apea ma latou penefiti o lo’o maua, pe agatonu lea tautua ma o latou mana’oga fa’apitoa. E le tatau ona avea le atunu’u o alaala ai i latou ma mafuaga e le ogatusa ai latou penefiti o maua, ia tutusa lava le tautuaina o vetereni uma, o e sa tautua i so’o se vaega o le vaeaga au a le Malo tele.”

I le asiasiga lenei ua fa’ailoa mai fo’i, e asia ai nofoaga e tautua mai ai vetereni uma, ae maise lava o le toe taga’i i penefiti tau le tausiga o le latou soifua maloloina ma talavai i gasegase o maua ai, pe o talafeagai.

“O lenei malaga asiasi i atumotu o Amerika i le pasefika, o le a maua ai se avanoa lelei mo a’u e talanoa sa’o ai i fitafita tuai,” se tala lea a Takano i le Komiti o VA a le Konekeresi.

AOAOGA MO LE TAOA — TOBACCO/ DIABETES MAFUAGA GASEGASE TUMAU

Mai le aso Gafua se’ia paia le aso Lulu o le vaiaso na te’a, na tapena ai e le Komiti Fa’afoe o le DOH Tobacco /Diabetes sui fa’apitoa latou te fa’atautaia le a’oa’oga mo le vasega o matua matutua i le Polokalama Tausiga Lelei o Tama ma Tina matutua o le atunu’u [TAOA].

O sui ua mae’a ausia tomai fa’apitoa i le kosi i le Iunivesite o Stanford, Farrah ma Daphne o le DOH Tobacco/ Diabetes, na fa’atautaia folasaga fa’apitoa e fa’alauiloa ai ma tima’ia tagata uma, ina ia fa’aitiitia le so’ona tausami i mea’ai e vave ai ona maua i gasegase tumau.

Ua le gata ina faia folasaga nei, ae ua tima’ia fo’i i latou i ituaiga o fa’amalositino e aoga tele ona faia e se tasi o i ai lona fa’amoemoe lelei, ia le vave maua i gasegase tau le Ma’i Suka, Toto Maualuga, Ma’i Fatu o so’o se ituaiga, Gssegase Fa’amama Toto, Gugu ma so’o se ituaiga o gasegase tau Kanesa, ma ua maua fo’i le laisene e fa’atautaia ai a’oa’oga nei i Amerika Samoa #2534, ma ua atoa ai i lea vasega le ono o vasega ua mae’a fa’atautaia e nei tama’ita’i o aoaoga nei i le atunu’u.

I lea vasega fa’apitoa na aofia ai ma sui e to’a 4 mai Samoa, 1 mai Ta’u e 20 sui o galulue mai ai, e to’atasi fo’i mai Ofu ae 15 sui o aofia ai. O le masina o Oketopa i le fa’ai’uga foi o lo ua fa’atulaga ai lea a’oa’oga e faia mo le mamalu o le atunu’u o lo’o alaala i Aunuu.

Pe a mae’a ona faia nei aoaoga fa’apitoa uma ma maua fo’i tusi pasi fa’apitoa o sui mai vasega eseese, ona o lea o sui nei ua agava’a, e aoao nei mea lelei ua latou maua mai a’oa’oga nei, e tima’i atu isi sui uma o latou afioaga ma ekalesia ma isi fa’alapotopotoga uma, ina ia nofouta i mea tausami paleni ma le aoga e fa’aitiitia ai le mamafa tele o tino, ma ia taofia fo’i le ulaula tapa’a ma inu i le ava malosi ma le pia, ae tausia lelei le soifua maloloina i le ‘ai mea’ai paleni ma fa’amalositino e manuia umi ai.