O le vaiaso na te’a nei na tuuina mai ai le faaiuga a le afiogai le ali’i Fa’amasino ia Elvis P. Patea e solofua ai le tagi a le malo sa faia fa’asaga i le ali’i Leoleo Suesue ia Det. Justin Thomsen, ina ua le mafai e le malo ona fa’aauau le latou tagi fa’asaga i lenei ali’i.

O Thomsen, na molia e le malo i le moliaga o le tete’e atu i Leoleo ao taumafai e aveese mai le fana mai ia te ia.

Na tatala i tua Dt. Thomsen e aunoa ma se tupe e tatala ai i tua, ina ua mae’a lana iloiloga sa faia i le 3 vaiaso talu ai e faatalitali ai suesuega a Leoleo sa fa’agasolo.

O le vaiaso la na te’a nei lea na fa’atulaga e toe tula’i ai Thomsen mo le isi ana iloiloga. O le ali’i loia fautua lagolago ia Bob Stuart na tula’i mo le ua molia, ae o le tama’ita’i loia sili lagolago ia Christy Dunn na tula’i mo le malo.

Ina ua valaau le mataupu a Thomsen, na faailoa ai loa e Dunn le faila e le malo o se talosaga e solofua ai le latou tagi fa’asaga ia Thomsen, ina ua le mafai e le malo ona tu’u fa’atasia ni mau e lagolago ai le latou tagi.

Na vave ona talia e le afioga a Patea le talosaga a le malo, ma solofua ai loa le tagi fa’asaga i le ua molia.

E pei ona taua e le malo i le latou tagi e fa’apea, ia Setema 2, 2019, na logoina ai e se Leoleo Satini nisi o Ta’ita’i ma le aufaigaluega o le Ofisa o Leoleo i Tafuna, ina ia auina atu ni Leoleo e siaki le fale o Thomsen i Iliili poo i ai o ia.

E mafua lea talosaga ona o le feau lea na maua e se tama’ita’i Leoleo mai ia Thomsen, o loo taua ai le fa’atofa atu o Thomsen ia te ia i luga o le Facebook.

E lei maua atu Thomsen, se’i vagana ai lona Faletua na alu ane i fafo ma talanoa ma Leoleo, ma ia faailoa ai i Leoleo, e le o i ai Thomsen i le fale, ae sili pe a siaki le fale o le Tama’ita’i Loia Sili lagolago ia Laura Garvey, atonu e maua ai Thomsen iina.

O le popole tele o le faletua o Thomsen i le tulaga e pei ona ia maitauina i lea po, na mafua ai loa ona ia tago ma vili le telefoni a Thomsen. Ina ua tali mai e Thomsen le telefoni, na fa’alogoina e lona faletua leo o Ta’ifau o loo pisapisao.

Ina ua faailoa e le faletua o Thomsen i Leoleo le tulaga e pei ona ia faalogoina i le taimi na tali mai ai Thomsen i le telefoni, na faigofie ai loa ona mateia e Leoleo le nofoaga e ono maua i ai Thomsen, ma latou aga’i atu ai loa i le nofoaga lea, le nofoaga o le Kennel i Tafuna.

E to’alua Leoleo na aga’i atu e siaki le nofoaga o le Kennel i Tafuna poo i ai Thomsen. O le la molimau la lea sa tuuina atu i Leoleo Suesue ina ua fesiligia i laua e tusa ai o lenei fa’alavelave. O i laua e to’alua e aofia ai se tama’ita’i Leoleo Satini faapea ai ma se ali’i Leoleo Sinia.

Na taua e le tama’ita’i Leoleo Satini e fa’apea, pe tusa o le itula e 8:45 i le po lea, na fesootai atu ai Thomsen ia te ia i luga o le Facebook ma faapea atu, “Tofa Soifua.”

Na vave ona ia toe tali i ai ma fesili atu ia Thomsen, “O lelei mea uma,” ae na tali mai Thomsen, “E leai.”

O lona maua ai o le tali a Thomsen, na ia tago ai loa ma vili le telefoni a Thomsen ma ia fesili i ai poo i ai se mea o faaletonu, ae faapea mai le tala a Thomsen, “Ou te fia faailoa atu, ia manuia pea outou uma.”

O le tala mulimuli lea a Thomsen na taua e le tama’ita’i Leoleo Satini na oso ai loa ona masalosaloga, e i ai se mea o loo faaletonu, ma ia talosagaina ai loa le fesoasoani a Leoleo e saili ai le fale o  Thomsen i Ilili poo i ai o ia.

Ina ua le maua Thomsen i lona fale i Iliili, na la aga’i atu ai loa ma se tasi o ali’i Leoleo Sinia i le nofoaga o le Kennel i Tafuna e siaki poo i ai o ia. Ina ua taunu’u atu le la ta’avale i le nofoaga o le Kennel i Tafuna, sa la vaaia ai le ta’avale Leoleo o loo fealua’i ai Thomsen, o lo o paka mai i luma o le faitoto’a o le Kennel.

Ina ua la aga’i atu i totonu o le pa o le Kennel, sa la vaaia ai loa Thomsen o loo nofo mai i luga o le laulau, o lo o ia uu le fana ma tu’u i lona ulu.

Na taua e le tama’ita’i Leoleo Satini lona valaau atu ia Thomsen i le taimi lea, “Thomsen, tu’u ese le fana, aua e te faia lena tulaga.”  Na fiu le tama’ita’i Leoleo Satini e fai ia Thomsen e tu’u ese le fana, ae sa atili ai ona fealua’i solo Thomsen ma tu’u le fana i lona ulu, o le isi taimi ua ia tuu i lona fatafata.

A o faia e Thomsen lea gaioiga, o le taimi lea o lo o taumafai ai pea Leoleo e to’alua ia ua taunuu i le nofoaga lea e saili se auala e aveese mai ai le fana mai ia Thomsen. O le itu e pito sili ona faigata ai e pei ona taua e Leoleo ia e to’alua i le la fa’amatalaga sa tuuina atu i Leoleo Suesue, e le gata o loo fealua’i solo Thomsen ma le fana, ae o loo tu’u fo’i lona tama’i lima i le amoti o le fana, lona uiga o le taimi lava la te taumafai e aveese le fana, e ono avea lea ma itu e pa ai le fana ma lavea ai loa se tasi.

O autafa o le nofoaga o loo nofo ai Thomsen, o loo taatitia ai ni apa pia o le ituaiga o le busch-ice, o lo o inu e Thomsen. O loo taatia ai fo’i i ona tafatafa se atigi fagu malosi o le ituaiga o le Bacardi ua mae’a ona inu.

Mulimuli ane, na mafai ai loa ona tuli oso atu Leoleo e to’alua na taumafai loa e aveese le fana mai ia Thomsen. Ao latou tauivi ma Thomsen, sa faafuase’i ona pa le fana. E leai se isi na manu’a. Na vave gaioiga a le ali’i Leoleo Sinia ma ia aveese mai ai le fana mai ia Thomsen, ma ia aveese mai le pulu fana e tasi o loo i ai i totonu, ae taofia loa Thomsen e ala i le loka o ona lima ma auina atu loa o ia i le Ofisa o Leoleo i Tafuna.