Pago Pago - AMERIKA SAMOA

I se ripoti fa’aletausaga o le soifua maloloina a tina ma tamaitai 2025, a Amerika Samoa, ua va’aia ai se tulaga ua avea ma faapopolega, ona o le si’itia o le fuainumera o tina ma tamaitai o le teritori, ua faapea ona a’afia i fa’ama’i gasegase, o le Chlamydia ma le Gonorrhea.

I lea ripoti, e pei ona sa fa’asalalauina e le Ofisa o le Soifua Maloloina a le Iunaite Setete (USDHHS), o lo’o ta’’ua ai, e o’o mai i le 2025, o le a faapea ona si’itia le pasene o tina ma tamaitai, i le va o le 18 tausaga ma le 44, ua faapea ona o’o atu i maota gasegase, i le 59%, o se fuainumera ua si’itia mai i le 47% na iai fa’amaumauga i le 2019,

E tusa ai ma ripoti i gasegase e mafua ona o feusua’iga, lea e tu’ufa’atasia e le ofisa o lo’o mataituina polokalama mo gasegase e aofia ai le HIV/STD/TB ma le Viral Hepatitis, i totonu o le teritori, e ala i su’esu’ega ma le fa’amautuina o fa’amaumauga, lea o lo’o galulue so’o tau’au ai ma foma’i ma falema’i.

O le Polokalama mo HIV/STD/TB/Viral Hepatitis, e latou te ofoina atu i le mamalu lautele, ia su’esu’ega ma fofo, e aunoa ma se totogi.  Ma a’o molimauina le si’isi’i pea o fuainumera o tina ma tama’itai o malo ‘ese’ese ua a’afia i nei ituaiga gasegase, ua faapena foi ona molimauina ai ma le si’isi’i fo’i o fuainumera a Amerika Samoa.

I le tausaga e 2023, sa ripotia mai ai e le Polokalama a le HIV/STD le to’a 268 o tina ma tamaitai, ua fa’amaonia le a’afia i le gasegase o le Chlamydia, ae 31 ua fa’amaonia ua a’afia i le fa’ama’i o le Gonorrhea.

O le to’atele o tina sa fa’amaonia ai nei ituaiga gasegase, o ni tina po o tamaitai ma’itaga, aua e fa’amalosia le faia o su’esu’ega mo nei ituaiga gasegase, i taimi o talavai a tina ma tamaitai ma’itaga.

Afai ae fa’amaonia le a’afia o se tina po o se tamaitai ma’itaga, i nei gasegase, ona faapea loa lea ona su’esu’eina ma o latou ta’ito’alua po o pa’aga.

I le tausaga e 2018, sa na o le 54.8% o tagata matutua a Amerika Samoa, sa fa’amuamua iai asiasiga a le soifua maloloina, pe a fa’atusatua i le fuainumera fa’avaomalo, e 70.4%.

I le tausaga tupe o le 2023, sa faapea ona galulue malosi uma polokalama a le Matagaluega o le Soifua Maloloina a Amerika Samoa, e tali atu i mana’oga faa soifua maloloina, o tina ma tama’ita’i.

O so’o se taimi e malaga atu ai se tina po o se tamaitai i so’o se ofisa a le ASDOH, e fa’apea ona toe fa’aauauina a latou a latou su’esu’ega i vaega po o polokalama uma lava a le Ofisa o le Soifua Maloloina ma le falema’i.

E tusa ai ma se su’esu’ega a le MCH, po o le vaega su’e toto, a le ‘Research Center’ a le Iunivesite o Chicago, lea sa faia i totonu o Amerika Samoa i le 2019, 2021 ma le 2024, na va’aia ai le aga’i i luga o fuainumera o tina ma tamaitai o le atunu’u, ua faapea ona agai atu e saili se fesoasoani i polokalama a le ofisa o le soifua maloloina ma le falema’i.

I le 2019, sa pa’u le fuainumera o tina ma tamaitai sa fa’aaogaina tautua ‘ese’ese a le ofisa o le soifua maloloina ma le falemai, sa na’o le 47%.  I le 2021, sa toe si’isi’i lea fuainumera, i le 55.6%.  Ma i le 2024, na o’o atu ai lea fuainumera, i le 58.4%.

Ae i le polokalama po o le tautua mo le kanesa o le susu ma le fa’au tama (BCCP – Breast and Cervical Cancer Prevention), o lo’o molimauina ai foi le tulaga lelei o a latou taumafaiga, e ala i le fa’alauteleina o a latou tautua.  Lea ua aofia ai le faia o su’esu’ega i le aso Toonai i totonu o nu’u ma afioaga.

E to’a 265 tina ma tamaitai, i le va o le 18 ma le 44 tausaga le matutua, ua faapea ona auai i su’esu’ega mo kanesa o le susu, 167 tina ma tama’ita’i ua faia su’esu’ega o susu, ae to’a 114 ua mae’a su’esu’ega i fa’au tama.

Ua fa’aalia mai ai le maualuga o le fuainumera o tina ma tamaitai ua faia su’esu’ega mo le kanesa i le fa’au tama, mai i le to’a 19 ia na fa’amaumauina i le 2022.  Ae peitai, ua va’aia le pa’u o le fuainumera o su’esu’ega mo le kanesa o le susu, mai i le 404 i le 2022.  

I le tausaga e 2023, sa faapea ona fa’ao’oina atu ai nei auaunaga i le Motu Sa.