Apia - SAMOA

Ua mae’a ona lauina le fa’asalaga a se fafine Filipaina na malaga atu mai Amerika Samoa mo lona atunu’u ia Iulai o le tausaga ua tuanai, tauala atu i Samoa, ae na faapea ona lokaina ina ua maua ai se vaega o fualaau faasaina, o le Aisa.

O le aso Lulu (aso Lua i Amerika Samoa) sa lauina ai e le Fa’amasinoga Maualuga ia le fa’asalaga o Arianna Fae Timblique, ma o le a le tulia sona fa’asalaga fa’afalepuipui, ae ua na o se sala tupe e $4,000WST, na faatonuina Timblique e totogi.

Ina ua tula’i Timblique i luma o le faamasinoga i le tausaga ua tuanai, sa ia te’ena Moliga e lua na faasaga ia te ia, ae peitai, sa i’u ina ia toe tali ioe i ona moliaga, 

I le lauina o le faasalaga a Timblique, sa toe fa’amanatu atu ai e le susuga i le Faamasino Sili Vui Clarence Nelson ia Timblique, e le faapea ua na ona sala tupe o ia, ona faapea lea e le o manatu mamafa le faamasinoga i lana mataupu.

Na mua’i molia Timblique i le umi fa’asolitulafono se vaega o fualaau faasaina, po o taga pepa i’ila e fa, o le Aisa, faapea ma ni pulufana.

Sa saunoa le susuga i le Faamasino Sili, o le mafuaaga ua tu’uina atu ai i lenei tagatanu’u Filipaina ia se sala tupe, ona ua ia tali ioe i moliaga uma e lua, o lana ulua’i solitulafono lenei ma sa ia fa’aalia lona agaga salamo i lana solitulafono sa faia.

E tusa ai ma fa’amaumauga a le malo, na taunu’u Timblique i Faleolo i le masina o Iulai, ae o le aso na soso’o ai, na ia toe tu’ua ai Samoa.  Ma o le taimi na agai atu ai e fa’ata ana ato, sa ‘e’e ai le masini fa’ailo, ona o le pulufana sa i totonu o lana ato.

Ma ina ua su’esu’eina o ia e leoleo o le malae vaalele, o iina na maua ai pepa ‘I’ila e fa o Aisa, i lana ato.

E $2,000 le sala tupe a le na molia, e totogia mo le umia faasolitulafono o vaega o fualaau faasaina, faapea ma le $500 o pili a lana loia, o le $250 e tatalaina ai o ia i tua, ma le $250  o pili a le faamasinoga, ae a le totogia, o le a tuli lana ono masina i le falepuipui.

I le solitulafono o le umia fa’asolitulafono o pulufana, e $500 na sala ai Timblique, ae $300 le pili mo loia, $100 e tatalaina mai ai i tua, ma le $100 mo pili a le faamasinoga.  E tolu masina i le falepuipui pe a le totogia lea sala tupe.

E fa vaiaso ua tu’uina ia Timblique e totogi ai lana sala.