Ads by Google Ads by Google

Pu’e faapagota se alii ona o tuuaiga i le faaoolima ma le umia fualaau faasaina


[ata: SN]
ausage@samoanews.com

Pago Pago - AMERIKA SAMOA

 

O le ali’i ave pasi lea na tu’uaia e le malo i lona fa’aoolima lea i ni ali’i se to’alua, ua molia nei fo’i o ia e le malo i le solitulafono o lona umia faasolitulafono lea o vaega o fualaau fa’asaina.

 

O le masina na te’a nei na tula’i ai le susuga a Taavili Lemalu i luma o le Fa’amasinoga Fa’aitumalo mo lana ulua’i iloiloga.

 

O moliaga ua faia fa’asaga ia te ia e aofia ai le moliaga mamafa o le umia fa’asolitulafono o vaega o le pauta faasaina o le aisa, faapea ai moliaga mama e 2 o le faaoolima i le tulaga tolu, ma le moliaga e tasi o le tu fua i le fanua poo le fale o le isi tagata e aunoa ma se fa’atanaga.

 

E $10,000 le vaega tupe lea ua fa’atulaga e le Fa’amasinoga e totogi, ona fa’atoa mafai lea ona tatala Lemalu i tua mai le toese i Tafuna. Afai ae mafai ona tatala o ia i tua, ua fautuaina o ia ina ia aua nei taumafai e sola ese ma le atunu’u, a ia tuuina atu lona tusi folau e taofi e le loia a le malo. E le mafai fo’i ona ia taumafai e faafesoota’i molimau a le malo, e aofia ai ma i latou o loo aafia i lenei mataupu, a ia avea o ia ma se tasi e usita’i i tulafono uma a le malo.

 

Na teena e le Faamasinoga le talosaga a le loia fautua na tula’i mo Lemalu, mo se avanoa e faaitiitia ai le tupe e tatala ai Lemalu i tua i le $2,000.

 

Na taua e le Loia a le itu tete’e e fa’apea, o Lemalu, o se tagata e to’a 4 lana fanau, e galue malosi fo’i mo le tausiga o lona aiga. A o le i tula’i mai lenei fa’alavelave, sa galue o ia o se ave pasi mo le silia i le 10 tausaga.

 

O Lemalu fo’i e pei ona taua lana loia, e le o se tagata e ono sola ese ma le atunu’u, e nonofo ma lona aiga i Tafuna, e leai fo’i se faanaunauga o ia na te tuua le atunu’u ae aga’i atu i se isi atunu’u.

 

Na tete’e le malo i le talosaga a Lemalu ma lana loia, ma latou talosagaina ai loa le Fa’amasinoga ina ia teena le talosaga.

 

Na taua e le Loia a le malo e fa’apea, o le tupe lea ua fa’atulaga e le Fa’amasinoga, ua talafeagai lelei ma le mamafa o le solitulafono o loo tu’uaia ai le ua molia.

 

E le gata sa ia fa’aoolima i ni tagata se to’alua, ae na toe maua ai fo’i e Leoleo fualaau fa’asaina ia te ia i le taimi na pu’e fa’apagota ai o ia. Na taua atili e le loia a le malo e fa’apea, e ono i ai le avanoa e sola ese ai Lemalu ma le atunu’u pe afai ae tatala o ia, o le mafua’aga lena e tatau ai ona taofia pea o ia i le toese, ina ia mautinoa e i ai pea o ia i le atunu’u a o fa’agasolo ai lana mataupu.

 

I le mae’a ai ona iloilo e le Fa’amasinoga o faafinauga a itu e lua, na tuuina mai ai loa e le faamasinoga lana faaiuga e teena ai le talosaga a le itu tete’e. Saunoa le faamasinoga e fa’apea, 

 

O le aso Faraile o le vaiaso fou lea ua fa’atulaga e le Fa’amasinoga e faia ai le ulua’i iloiloga o lenei mataupu i le itula e 10:30 i le taeao.

 

TAGI A LE MALO

 

O lo o taua i le tagi a le malo e fa’apea, i le itula e 8:40 i le po o le aso 30 o Tesema, 2021, na tauaaoina ai e le Ofisa o Leoleo i Tafuna se telefoni mai se ali’i faipisinisi Asia i Nu’uuli, e talosagaina ai se fesoasoani a Leoleo, fa’asaga i sana tagata faigaluega na faaoolima i ai se isi tagata.

 

E to’atele Leoleo na aga’i atu e tali i le valaau, ma mafai ai loa ona latou fesiligia le ali’i faipisinisi Asia e tusa ai o lenei fa’alavelave. I le mae’a ai ona fesiligia e Leoleo o le ali’i faipisinisi, na manino ai loa, o le ali’i na aafia, o se ali’i Samoa e galue ai i lana faleoloa, lea o lo o tu’uaia na faaoolima i ai le ua molia, le susuga a Lemalu.

 

Na taua e le ali’i faipisinisi Asia i Leoleo e fa’apea, i le afiafi o le aso na tula’i mai ai le fa’alavelave, na aga’i atu ai le ua molia ma ni ali’i se to’alua i se pikiapu lanu moana, ma faia ai sa latou inugapia i autafa o lana faleoloa.

 

Pe tusa o le itula e 6:30 i le afiafi o le aso lea, na amata ai le inuga pia a Lemalu ma ana uo e to’alua, e ala i le faatau mai o a latou pia mai totonu o le faleoloa ma inu i tua o le keli o le pikiapu.

 

A o faia le inugapia, sa maitauina le pisapisao o i latou nei, ma ua soona ki fo’i i luga o le laau o le ta’avale, ma ua fai lea ma auala e fa’alavelave ai i tagata fegasoloa’i mo fa’atauga.

 

E le i umi se taimi o le afiafi lea ae tula’i mai loa se vevesi i le va o Lemalu ma se tasi o ali’i sa latou inu, ma vaaia ai le faaoolima o Lemalu i le ali’i na la tau upu e ala i lona tu’iina o ona foliga ma palasi ai lea ali’i i lalo. O le taimi lea na aga’i atu ai loa se ali’i Samoa e faigaluega o se teu oloa i le faleoloa Asia ma fautuaina Lemalu ma ana uo ina ia tuua le nofoaga ae aga’i ese atu i isi nofoaga e fa’aauau ai le latou inugapia.

 

I ni nai minute mulimuli ane ai, na vaaia ai loa le aga’i atu o Lemalu i totonu o le faleoloa ma le fa’amoemoe e toe faatau mai nisi a latou fagupia, ae o le taimi lea o lo o galue ai le ali’i faigaluega Samoa i le teuina o ana oloa, faapea ai ma le soloina o le fola o le faleoloa.

 

Ina ua tau atu le vaai a Lemalu i le ali’i Samoa lea o lo o galue mai le teuina o oloa i le isi tulimanu o le faleoloa, na tuu ai loa lana faatauga pia ae aga’i atu i le itu o lo o i ai le ali’i Samoa, ma tu’i loa o ia ma palasi ai i lalo. Na ona mae’a lava ona faatino e Lemalu o le solitulafono, savali loa i fafo ma le faleoloa, oso i lana taavale ma alu ese loa, ae tuu ai ana uo e to’alua sa latou inu.

 

Na maua le avanoa e fesiligia ai e Leoleo ali’i e to’alua na aafia i lenei mataupu, le uo a Lemalu faapea ai ma le ali’i faigaluega i le faleoloa Asia.

 

Na taua e le uo a Lemalu e fa’apea, ao faia le latou inugapia, sa ia fautuaina Lemalu e ki i lalo le leo o le laau o lana ta’avale. Sa lei fiafia Lemalu i lana fautuaga sa faia, ma faafuase’i ai loa ona ia tu’iina ona foliga ma ia pau ai loa i lalo. Na vaaia e Leoleo se manu’a i le mata taumatau o le ali’i na a’afia.

 

Ae ina ua fesiligia e Leoleo le ali’i Samoa lea e faigaluega i le faleoloa Asia, sa ia taua ai e fa’apea, a o pisi i le teuina o oloa i totonu o le faleoloa, na faafuase’i ona ia vaaia le aga’i atu o se tagata ia te ia.

 

Ina ua latalata atu le tagata, sa ia iloa ai, o le ali’i lea o loo faia le latou inugapia ma ana uo i fafo o le vaega e paka ai ta’avale. Na ona taunuu atu lava o le ali’i lea, fesili atu loa ia te ia, pe aisea na ia alu atu ai fua ma taofi le latou inuga pia o loo faia.

 

Na taua e le ali’i na aafia le faateia o ia ina ua tu’i e le ali’i lea ona foliga ma pau ai i lalo o le fola o le fale. O le taimi lea na tula’i ai loa le ali’i lea ma alu ese i fafo.

 

Pe tusa o le itula talu ona saili e Leoleo le ta’avale a le ua molia, ae latou maua loa o loo paka i luma o se fale’aiga i Tafuna.

 

A o lei auina atu e Leoleo ia Lemalu i le Ofisa o Leoleo i Tafuna mo suesuega, na sailia muamua e Leoleo lona tino, ina ia mautinoa na te le o tauaveina ni a’upega poo ni fualaau fa’asaina.

 

I lea sailiga, na maua ai e Leoleo ni taga pepa iila se 2 i totonu o le taga o le ofu a le ua molia, o lo o i ai ni vaega o le pauta faasaina o le aisa. Na taua e Lemalu i Leoleo, o pepa iila ia e lua na ia maua i autafa o le faleoloa Asia lea sa faia ai e latou inuga pia ma ana uo i Nuuuli, ona ia tago lea ma tuu i totonu o le taga o lona ofu.

 

E pei ona taua i faamaumauga a le Fa’amasinoga, e le fou le susuga a Lemanu i luma o le Fa’amasinoga. O le tausaga e 2014 na ta’usala ai o ia i le moliaga o le ave taavale ‘ona ma le faaoolima, ma nofovaavaaia ai o ia mo le 12 masina. 

 

Tolu tausaga mulimuli ae ai i le 2017, na toe aafia ai fo’i o ia i le tulafono ma nofovaavaaia ai mo le 12 masina ina ua ta’usala o ia i le solitulafono o le faatupu vevesi nofoaga faitele faapea ai ma le faaleaga meatotino.