Ads by Google Ads by Google

Pu’e faapagota se ali’i i le faaoolima ae maua ai ma fualaau fa’asaina


[ata: foa'i]
ausage@samoanews.com

Pago Pago, AMERIKA SAMOA

 

E 37 tausaga le matua o se ali’i ua molia e le malo i lona umia faasolitulafono o fualaau faasaina o le aisa ma le mariuana, ina ua pu’e faapagota o ia i lona faaoolima i se isi tagata ae maua ai e Leoleo fualaau faasaina i lona Tino faapea ai ma totonu o lana ta’avale. 

 

Ina ua fesiligia e Leoleo le susuga a Taulagi Vaifou e tusa ai o fualaau faasaina sa maua ia te ia, na ia ta’utino ai, o fualaau fa’asaina na ia fa’atau mai i se nofoaga i Iliili e masani ona fa’atau mai ai ana fualaau fa’asaina.

 

O le mataupu fa’asaga ia Vaifou e pei ona taua e le malo i le latou tagi ua i luma o le Fa’amasinoga, na afua mai ina ua talosagaina e se Tina se fesoasoani, ona o lona to’alua ua manu’a tigaina na faaoolima i ai Vaifou. 

 

E to’atele Leoleo na tali atu i le valaau ma latou fesiligia ai le Tina na ia faafesootaia le Ofisa o Leoleo mo se fesoasoani. Na faasino e le Tina i Leoleo le itu o le alatele lea ua aga’i atu i ai le ta’avale a Vaifou, ua sola ina ua ia iloa Leoleo ua aga’i atu.

 

Na taua e le Tina i Leoleo e fa’apea, o ia sa i totonu o le fale ma lana fanau laiti e to’atolu, ae o lona to’alua (le na aafia) sa pisi lava i le faaumaina o ana galuega i fafo o le latou fale ta’avale. 

 

A o pisi e tau tapena le ti o le taeao i le aso 18 o Ianuari 2021, ae ona faalogoina se ta’avale ua aga’i atu ma paka i luma tonu lava o le latou fale. E le i umia ae ona faalogoina se tagata ua tau valaau i le igoa o lona to’alua. Na manino i lana fa’alogo, o le leo lea o Vaifou, le ali’i latou te tuaoi, lea e masani ona alu atu e tafao atu i lona to’alua. 

 

E le i alu tele lona mafaufau i le valaau atu a Vaifou i lona to’alua, aua sa ia manatu, o loo lagona e lona to’alua le valaau, ai fo’i ua savali atu i ai lona to’alua e talanoa ia Vaifou. Ae na matua faateia o ia ina ua faafuase’i ona ia vaaia lona to’alua ua tamo’e telea’i atu i totonu o le fale ma uu atu lona ulu, ae o le taimi lea o loo sisino ifo i lalo le toto mai lona ulu ma ona foliga.

 

O lona te’i tele na ia tu faanatinati a’e ai i luga ma savali mai i fafo o le fale na te fia iloa le mafua’aga o le fa’alavelave. E fetaui lona savali mai i fafo ae ona vaaia loa Vaifou ua u mai le papatua ua savali aga’i i lana ta’avale, ae o lo o uu i lona lima taumatau se ma’a.

 

Ina ua ia valaau atu ia Vaifou pe aisea ua ia faaoolima ai lona to’alua, na faateia o ia ina ua faliu Vaifou i le isi itu ma togi loa le faitoto’a o le latou fale i le ma’a sa uu i lona lima ma ta’e ai le tioata.

 

Na ia toe faanatinati atu i totonu o le fale ma taumafai e fesoasoani i le manu’a o le ulu o lona to’alua, sosoo ai loa ma lona vili o le Ofisa o Leoleo mo se fesoasoani. Na taua atili e le Tina i Leoleo e fa’apea, na te le o iloaina le mafua’aga o le faalavelave, pau le itu na te iloa, e masani lava ona eva atu Vaifou i lo latou fale ona o lona to’alua, o i laua fo’i o se uo mafana.

 

E le i umi ona taunu’u Leoleo ae taunu’u loa fo’i ma le Ta’avale Falema’i a le EMS ma auina atu ai loa le alii na manu’a i le Falema’i i Faga’alu mo togafitiga. Na mafai ona fesiligia e Leoleo le alii na aafia ina ua te’a atu o ia mai le falema’i, e tusa ai o le faalavelave e pei ona tula’i mai. 

 

Na faamaonia e le ali’i na aafia faamatlaga uma a lona to’alua e tusa ai o le fa’alavelave. Sa ia taua atili i Leoleo e fa’apea, ao le i tulai mai le fa’alavelave e pei ona manu’a ai, e i ai se pati sa latou faatasi atu ai ma nisi o ana uo e aofia ai ma Vaifou i le fale o se tasi o a latou uo. O iina i le fiafia lea o loo masalomia na mafua mai ai le mataupu e pei ona faaoolima ai Vaifou ia te ia. 

 

Na taua e le ali’i na aafia i Leoleo, na te le o manatua pe sa i ai se mea na la vevesi muamua ai ma Vaifou, fua i le aga’i atu o le alii ma faaoo manu’a ia te ia. Sa ia taua e fa’apea, ina ua valaau atu Vaifou ia te ia, sa ia savali ane i ai ma lona fiafia, peita’i na matua faateia o ia ina ua kola e Vaifou le ua o lona ofu ae tu’i lona ulu i le ma’a.

 

O le ma’a lea na togi ai e Vaifou le faitoto’a o le latou fale ma ta’e ai le tioata ina ua mae’a ona ia faaoolima ia te ia. 

 

O le mae’a ai ona fesiligia e Leoleo o le alii na aafia ma lona to’alua, na latou aga’i atu ai loa e tau saili le ta’avale a le ua molia. I le tuana’i atu o itula e 4 talu ona tula’i mai le fa’alavelave, ae vaaia ai loa e Leoleo le pikiapu a le ua molia o lo o paka i luma o se faleoloa i Mesepa, ma aga’i atu ai loa Leoleo e fesiligia o ia e uiga i lenei mataupu.

 

Ina ua faailoa e Leoleo ia Vaifou le mafua’aga o le latou aga’i atu ia te ia, ona o lo o mana’omia o ia mo se faatalatalanoaga e tusa ai o le mataupu lea na ia faaoolima ai i se isi ali’i, na musu le ua molia ma faapea atu i Leoleo, na te le iloa se faalavelave, na te le i faaoolima foi i se isi tagata.

 

Mulimuli ane, na malie le ua molia e aga’i atu ma Leoleo i le Ofisa mo le faatalatalanoaina o le mataupu. 

 

A o talanoa Leoleo ma Vaifou, na vaaia e Leoleo foliga fefe ma le popole o le ua molia, o le mafua’aga lea na talosagaina ai loa e Leoleo le ua molia o se avanoa e saili ai lona tagata faapea ai lana ta’avale mo le saogalemu o Leoleo faapea fo’i ma ia.

 

Ina ua saili e Leoleo le tino a le ua molia, na maua ai e Leoleo ni pepa iila laiti se 2 i le taga pito i tua o lona ofuvae sa faia o lo o i ai vaega o le laau faasaina o le mariuana. Na saili e Leoleo totou o le ta’avale ma maua ai i totonu o se tama’i ato uliuli se pepa iila o lo o i ai vaega o le pauta paepae o le aisa.

 

Ina ua fesiligia e Leoleo le ua molia, sa ia ta’utino ai, o fualaau fa’asaina sa maua ia te ia, o meatotino lava a ia na faatau mai i le nofoaga o Le Aute i le $50 ma le fa’amoemoe e fa’aaoga mo ia lava. Sa ia ta’utino atili fo’i i Leoleo lona fa’aaogaina o se ma’a e faaoo ai manu’a i le ali’i na a’afia, e mafua mai i lona alu ma faasalalau solo tala le moni e fa’atatau ia te ia (Vaifou).

 

O le masina na te’a nei na tula’i ai Vaifou i luma o le Fa’amasinoga Faaitumalo mo lana ulua’i tula’i.

 

Ua molia o ia e le malo i le moliaga mamafa o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le laau faasaina o le mariuana, o vaega ia o solitulafono mamafa e mafai ona faasala ai se tasi i le Toese mo le umi e mafai ona oo atu i le 10 tausaga, pe faasala foi i le salatupe e mafai ona oo atu i le $20,000, poo le faasala foi i faasalaga uma ia e lua; o lo o molia foi o ia i le solitulafono o le faaoolima i le tulaga lua, o le vaega D lea o solitulafono mamafa, lea e mafai ona faasala ai se tasi i le Toese mo le umi e le sili atu i le 5 tausaga, pe faasala i le salatupe e le sili atui le $5,000, poo le faasala foi i faasalaga uma ia e lua; faapea ai ma moliaga mama e 2 o le tu fua i le fanua o le isi aiga atoa ai ma le faaleaga meatotino i le tulaga 3.

 

E $10,000 lea ua faatulaga e tatala ai i tua Vaifou. O le aso Faraile o le vaiaso fou lea ua fa’atulaga e faia ai le ulua’i iloiloga o lenei mataupu.

 

Afai ae tatala Vaifou i tua mai le Toese i Tafuna, ua poloaina o ia e aua nei ona toe solia se tulafono a le malo, auai i soo se taimi e valaau ai lana mataupu, ma ia fesoota’i vava lalata ma lana loia fautua. E le mafai fo’i ona ia toe taumafai e faafesoota’i le tagata na aafia i lenei mataupu.