Ads by Google Ads by Google

Pu’e faapagota e Leoleo i le gaoi ae maua ai fualaau faasaina


[ata: SN]
ausage@samoanews.com

Pago Pago, AMERIKA SAMOA - 

 

O le ali’i lea na pu’e faapagota e Leoleo i le vaiaso na te’a nei ona o tu’uaiga i lona gaoia lea o se telefoni mai totonu o se Faleoloa i Tafuna, ua tu’uaia nei fo’i o ia i lona umia faasolitulafono o fualaau faasaina, ina ua maua i ai e Leoleo vaega o le pauta o le aisa i le taimi na taofia ai o ia.

 

O le vaiaso na te’a nei na tulai ai Ernest Aetui i luma o le Faamasinoga Faaitumalo mo lana ulua’i iloiloga.

 

E 2 tagi a le malo ua faila faasaga ia Aetui. I le tagi muamua, o lo o tu’uai aai o ia i le solitulafono o le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, poo le faasala foi i faasalaga uma ia e lua.

 

E $5,000 le vaega tupe lea ua faatulaga e tatala ai Aetui mai le tagi muamua a le malo.

 

I le tagi lona lua a le malo, o loo tu’uaia ai Aetui i le moliga o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000, poo le faasala fo’i i faasalaga uma iae lua.

 

E $5,000 lea ua faatulaga e tatala ai Aetui mai le tagi lona lua a le malo

 

O le vaiaso na te’a nei na tofu atu ai le mataupu a Aetui i luma o le Faamasinoga Maualuga, lea na ia teena ai tu’uaiga faasaga ia te ia.

 

O le masina o Novema o le tausaga nei lea ua fa’atulaga e faia ai le ulua’i iloiloga mo mataupu uma ia e 2 a Aetui i luma o le afioga i le ali’i Fa’amasino Sili lagolago ia Fiti Sunia.

 

MATAUPU I LE UMIA FAASOLITULAFONO O FUALAAU FAASAINA

 

O le taeao o le aso 1 o Setema a o pisi ai Leoleo i le faatinoina o a latou tiute masani i luga o le alatele i Futiga, na maitauina ai e Leoleo le susuga a Aetui o lo o ia faafoeina atua se ta’avale na alu atu ma afe i luma o se Faleoloa.

 

Na vave ona manatua e Leoleo tusi saisai o loo i ai le igoa o Aetui, ma o loo tau sailia e le isi vaega o Leoleo se auala e maua ai Aetui ina ia mafai ai ona faailoa atu ia te ia tusi saisai mai le Faamasinoga mo ia.

 

Na aga’i atu Leoleo i le vaega tonu o loo paka ai le ta’avale a Aetui ma taumafai loa e faailoa i ai le mafua’aga ua ala ai ona latou aga’i atu i lana ta’avlae. Na faailoa e Leoleo ia Aetui, o lo o i ai se tusi saisai o lo o i ai lona igoa sa auina mai e le Faamasinoga e faataga ai ona pu’e faapagota o ia, ona o se mataupu o loo tu’uaia ai o ia e le malo i le 2 tausaga talu ai.

 

Na tetee Aetui ma fai atu i Leoleo  na te le iloaina ni tusi saisai o loo i lalo o lona igoa, peita’i sa finau atu pea Leoleo ma faailoa atu ia Aetui le taua tele o le mataupu lenei, e tatau fo’i ona latou aga’i atu i le Ofisa o Leoleo i Tafuna mo le faatalatalanoaina o le mataupu i tusi saisai.

 

A o talanoa atu Leoleo ia Aetui, na faalogoina e Leoleo le faaola e Aetui o lana ta’avale ma sauni o le a ia tuua le nofoaga, peita’i na vave gaioiga a Leoleo ma latou aveese mai ai le lima o Aetui mai le foeuli o le ta’avale. Sa faaauau pea ona tete’e Aetui a o taumafai atu Leoleo e loka ona lima. 

 

E umi se taimi o tauivi Leoleo ma Aetui seia oo loa ina mafai ona loka e Leoleo lima o Aetui ma aumai o ia i fafo o lana ta’avale, ma auina atu loa i le Ta’avale a Leoleo i le Ofisa o Leoleo i Tafuna mo isi suesuega.

 

A o ta’ita’i atu e Leoleo ia Aetui i le Ofisa o Leoleo i Tafuna, na faailoa e Aetui i se tasi o Leoleo lona mana’omia o lana fesoasoani mo ia, ae na tali i ai le Leoleo, e onosa’i se’i oo i le Ofisa o Leoleo i Tafuna, ona faailoa uma loa lea i Leoleo Suesue mea uma lava o lo o ia mana’o e faailoa i Leoleo.

 

Ae le i onosa’i Aetui e faatali sei oo i le Ofisa o Leoleo i Tafuna, ae na ia faailoa lava i le Leoleo i le taimi lea, o loo i ai i totonu o le taga o lona ofu o loo fai se straw o loo i ai vaega o le pauta faasaina o le aisa.

 

Ina ua taunuu i le Ofisa o Leoleo i Tafuna, sa faailoa loa e le Leoleo i Leoleo Suesue le straw o loo ia Aetui, lea fo’i na mafai e Leoleo ona aveese atu lea straw.

 

Ina ua mae’a ona faailoa ia Aetui ona aia tatau i lalo o le tulafono, sa malie ai loa o ia e sailia totonu o le ta’avale rental lea na fealua’i ai. I totonu o le ta’avale rental, na maua ai e Leoleo ni straws se 3 o lo o utu ai i totonu vaega o le pauta faasaina o le aisa.

 

Sa fa’aauau le sailiga a Leoleo ma latou maua ai se paipa tioata o lo o i ai vaega o le pauta faasaina o le aisa. 

 

Na faia se suega a Leoleo i pauta papa’e na maua i straws ma le paipa tioata ma faamaonia ai, o vaega ia o le pauta faasaina o le aisa.

 

Na musu Aetui e fai sana faamatalaga i Leoleo e uiga i fualaau faasaina sa maua ia te ia ae na manatu se’i talanoa muamua i lana Loia Fautua ona faatoa mafai lea ona ia faamatu’u atu ni faamalatalaga i Leoleo e tusa ai o lenei mataupu.

 

MATAUPU I LE GAOIA O LE TELEFONI MAI LE MANU’A STORE

 

O le 7 o Setema, 2018 na logo ai e le Pule o le Faleoloa o le Manu’a Store le Ofisa o Leoleo i Tafuna mo se fesoasoani, ina ua maua i le masini pu’e ata a le Faleoloa le alu o se tagata faatau ma gaoi le telefoni sa i totonu o le Faleoloa.

 

O le ali’i faatau lea na tu’uaia  na alu ma le telefoni, o le susuga lea ia Ernest Aetui, o ia lea ua molia i lenei mataupu.

 

E to’atele Leoleo na aga’i atu e suesue le mataupu ma maua ai loa le avanoa e fesiligia ai ni isi o le aufaigaluega faapea ai ma le tama’ita’i Pule o le Manu’a Store.

 

Na taua e se tagata faigaluega e faapea, a o pisi e faatino ona tiute i totonu o le Faleoloa, sa faafuase’i ona savali atu se tagata ma talosaga atu mo se avanoa e avatu ai le telefoni e matamata ai. O le ali’i na alu atu o ia lea o Aetui.

 

Na ave e le tagata faigaluega le telefoni ia Aetui e matamata ai, ona toe fo’i loa lea o le tagata faigaluega e faatino ana galuega masani ae galo ai ia te ia le telefoni na ia tuuina atu ia Aetui.

 

I se taimi o le aso lava lea, na maitauina ai e le isi tagata faigaluega a le Manu’a Store le aveesea mai o le telefoni mai le nofoaga na faalauiloa ai i totonu o le pusa, ma ia logoina ai loa le Tamaitai Pule e uiga i lenei mataupu. Na aga’i mai le tagata faigaluega lea na ia tuuina atu le telefoni ia Aetui ma ia faamaonia, o ia na tuuina le telefoni ia Aetui ae foliga mai ua alu lava Aetui ma ave le telefoni.

 

O le vaiaso lava lea na maua ai e Leoleo ia Aetui ma fesiligia loa e uiga i le telefoni na ia gaoia mai le Manu’a Store, peita’i na tali le ua molia, ua uma ona ia toe faafoia le telefoni i le aso na sosoo ai, atoa ai ma le tupe e $50 e totogi ai lona alu ma ave le telefoni.

 

Ina ua fesiligia e Leoleo le Tamaitai Pule o le Manu’a Store, sa ia teena ai le molimau a Aetui ua uma ona toe faafo’i atu le telefoni. Na taua atili e le Tama’ita’i Pule, na alu atu Aetui i le aso na sosoo ai ma le aso na ia gaoia ai le telefoni, ae ona tuliesea mai le Faleoloa, se’i vagana ua toe faafo’i atu le telefoni.

 

O le masina o Aperila o le tausaga nei na molia ai Aetui, o lona tuafafine ma le to’alua a lona tuafafine i se isi fo’i mataupu, e faatatau i le fa’aaoga faasolitulafono o le eletise a le Pule o le Eletise ma le Suavai (ASPA) e aunoa ma se faatanaga.

 

Ina ua faila e le malo le mataupu lea faasaga ia Aetui, na faila faatasi ai loa e le malo ma le mataupu o loo tu’uaia ai o ia i le ave faagaoi o le telefoni.

 

I le mae’a ai o feutanaiga i le va o itu e lua, na talosaga ai loa le malo i le Faamasinoga e solofua le mataupu sa tu’uaia ai Aetui i le faaaoga faasolitulafono o le eletise faapea ai ma le mataupu e pei ona tu’uaia ai o ia i le ave faagaoi o se telefoni mai le Manu’a Store.