Pago Pago - AMERIKA SAMOA

MOLIA SE ALII I LE FAATUPU VEVESI MA LE FA’AO’OLIMA

O le po o Oketopa 29, 2024 na fa’afeso’ota’i ai e se teineititi ia le Ofisa a Leoleo i Tafuna ma ripotia ai le sauaina o lona ‘Aunty’ e lona ‘Uncle’ ma le tuli’eseina o i latou ma lona ‘Aunty’ ma nisi o ona tei, mai i le fale.

[O le a le lomia suafa o i latou ua a’afia ma molia i lenei faalavelave, aua e puipuiga o fanau iti ma i latou na a’afia.]

E tusa ai ma fa’amaumauga a le malo, e 61 tausaga o le matua o le ‘Uncle’ ua molia i lenei faalavelave ma e tusa ai ma su’esu’ega a leoleo, sa le’i gata i le fela’uina e le ua molia, ia foliga o lona to’alua, ae na ia taumafai foi e gagau tamatama’i vae o le tina faapea ma  le una’iina o le tina, i fafo ma le fale.

O lo’o ta’ua foi i faamaumauga a le malo le taumafai o le ua molia, e ta le tina i se nofoa laupapa.

Ina ua valaau le teineititi i le ofisa a leoleo e ripotia le faalavelave, sa mafai ona ia faaleoina igoa o i latou na a’afia faapea ma le ua molia.

Ina ua taunu’u leoleo i le nofoaga na tupu ai le faalavelave, sa va’aia ni tagata se to’afa o tu tu mai i fafo o le fale, na aofia ai le tina na a’afia ma fanau iti e to’atolu.

Sa faamatalaina e le tina i leoleo le alu atu o lona toalua i lona fale faigaluega ma va’aia ai i la’ua ma se alii e la te galulue faatasi, i totonu o le taavale a le latou ofisa i  le EOB.  Ma ina ua manava mai, ua leva ona inu ‘ava malosi a lona to’alua.  

Ma ina ua o’o i  le taimi o le a faia ai se la malologa i lea po, sa fesiligia o ia e lona to’alua po o a la mea ma le alii lea e la te galulue faatasi, o fai i totonu o le taavale.  Ae sa le’i tali atu iai le tina, aua ua na iloa, ua fa’asuaava lona toalua.

Ae peitai, sa le’i malolo ai le fesili pea o le ua molia, ona tali mai lea o le tina, o lana pule ma o la na fa’ato’a taunu’u atu mai i se latou galuega faamama.

Ona ta’ua lea e le tina le a’apa atu o le ua molia ma valusi ona foliga, faapea ai ma lona taumafai e gagau ona tamatama’i vae.  Na ta’ua e le tina lona oso i lalo mai i le moega ma savali atu i fafo o le potu moe, agai i le potu malolo.  

Ae ua tago lona toalua ma tau ta o ia i se nofoa la’au ma u’una’i o ia i fafo mai i le fale.  Ona valaau lea o lona to’alua i ‘nieces’ o le tina, sa i totonu o latou potu moe, e o i fafo ma le tina.  

Ina ua faatalanoaina e leoleo le teineititi lea na valaau mai i le Ofisa a Leoleo, sa ia ta’ua lo latou iai ma ona uso i totonu o le latou potu, ae o latou faalogoina le misa a le latou ‘aunt’ ma le latou ‘uncle’ i totonu o le la’ua potu.

Na ta’ua e le teineititi le latou lagonaina o le ‘e’e a le latou ‘Aunt’ e foliga mai o lo’o ia manaomia se fesoasoani.  Ae le gata i lea, o le laulauvavale a le latou ‘uncle’ i lea po.

O lo’o ta’ua foi i totonu o faamaumauga a le malo le molimauina e le teineititi na valaau i le ofisa a leoleo faapea ma ona uso, ia le taumafai o le ua molia, e ta le latou ‘aunt’ i le nofoa la’au ma u’una’i o ia i fafo mai i le fale.

Ina ua mae’a ona talatalanoa leoleo ma le tina na a’afia, sa o latou agai atu loa i totonu o le fale ma taumafai e loka mai le ua molia mai totonu o le potu moe, ae peitai, sa tete’e mai le ua molia, i taumafaiga a leoleo.  Ae na i’u lava ina mafai ona lokaina mai o ia ma tu’uina i totonu o le taavale leoleo ma aveina atu loa i le ofisa leoleo i Tafuna mo le fa’aauauina o su’esu’ega.

E tusa ai ma le faamatalaga a le ua molia, i leoleo, e le’i sona lima i lona toalua ma e le’i palauvale foi i totonu o le fale.  Ae na ia faamaonia lona taumafaina o ni apa pia e valu i lena afiafi.

Ua tu’ua’ia nei le ua molia i le Faatupu Vevesi i totonu o le aiga (sauaga i totonu o le aiga), o se vaega ‘C’ o solitulafono mama, e mafai ona nofosala ai i le falepuipui, i le o’o atu i aso e 15, po o se sala tupe e i le va o le $150 ma le $300; po o faasalaga uma e lua.

E le gata i lea, ua molia foi o ia i le Fa’ao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le falepuipui i le tausaga atoa, po o se sala tupe e $1,000; po o faasalaga uma e lua.

Ma le faitauga lona tolu, o lona tete’e i le faatinoga o tiute a leoleo, lea e mafai ona nofosala ai i le falepuipui i  le tausaga atoa, po o se sala tupe e $1,000; po o faasalaga uma e lua.

E $2,000 na faatulaga e mafai ona tatalaina ai le ua molia, e faatalitali ai lona faamasinoga.

MOLIA NI ALII SE TOALUA I LE FAATUPU VEVESI

O le vaveao o Novema 1, 2024 na valaau ai e se tasi le Ofisa a Leoleo i Tafuna, ona o se fusuaga a ni alii se toalua ua faapisa ai ma aiga tuaoi.

Sa ta’ua i faamaumauga a le malo le faasuaava uma o nei alii.

Ina ua taunuu leoleo I le nofoaga na tupu ai le faalavelave, sa vaaia ni alii talavou se toalua o laulauvavale solo, tau’ai ma’a ma faapea mai e leai seisi e popole i leoleo.

O le tasi o i la’ua nei ua molia, e aofia ai se alii 17 tausaga ma se alii e 20 tausaga, e suafa ia Vaai Anetipa.  

Ina ua taunuu leoleo sa sosola i la’ua, ma na tamo’e le alii 17 tausaga agai I tua o se faleoloa, ae sulufa’i Anetipa i totonu o le faleoloa, lea na maua ai e leoleo.  

Ae na maua le alii 17 tausaga o lafi i lalo o se taavale a se aiga tuaoi.  O lenei alii talavou ua loka so’o e leoleo ona o moliaga o le gaoi ma le faomea.  

Ina ua tuuina e leoleo ia le alii 17 tausaga i totonu o le taavale, na faalogoina e leoleo le malosi o le manogi faasuaava o le alii.  

Ma na fiu foi leoleo e taufaato’ato’a le alii ae sa palauvale mai i leoleo ma lu’i leoleo latou te fufusu.  

Sa faapea foi ia Anetipa ina ua tuuina o ia e leoleo i totonu o le taavale.  

O se taimi mulimuli ane, na toe tatalaina ai i tua le alii 17 tausaga i ona matua, ae molia Anetipa i le Faatupu Vevesi i nofoaga lautele, o se vaega ‘B’ o soligatulafono mama, e mafai ona nofosala ai i le ono masina, po o se sala tupe e $500; po o faasalaga uma e lua.  

E $300 na faatulagaina e tatalaina ai le ua molia, e faatalitali ai lona faamasinoga.  

MOLIA SE TAMALOA I LE FA’AO’OLIMA

Ua molia nei se tamaloa i le Fa’ao’olima ma le Faatupu Vevesi ona o se faalavelave na tupu i le afiafi o Novema 6, 2024 lea na ripotia atu ai lenei alii i lona sauaina o lona toalua ma lona atalii.

[O le a le lomia suafa o i latou na aafia pe molia i lenei faalavelave, aua le puipuiga o fanau itu.]

E tusa ai ma faamaumauga a le malo, ina ua taunuu leoleo i le nofoaga na tupu ai le faalavelave na vaaia e leoleo ia le ua molia, o nofonofo i se fale faatalitali pasi i Pago Pago, e tu lata i le Pago Plaza.  Sa faapea ona lokaina mai o ia e leoleo ma tu’u I totonu o le taavale.

A’o fa’aauau atu pea le taavale a leoleo i le fale na tupu ai le faalavelave, sa faapea ona fetaui ai ma le tamaitai na valaau I le Ofisa a Leoleo ma sa toe faamatalaina e le tamaitai mea uma na ia faamatalaina i luga o le telefoni.

Sa faapea ona faasino e lenei tamaitai ia le fale na tupu ai le faalavelave, i leoleo, lea na mafai ona talanoa ai leoleo ma le toalua o le ua molia ma na ta’ua e le tina e faapea, e le o se taimi muamua lea ua tupu ai se faalavelave faapenei pe a faasuaava lona toalua.

Na faamatala e le tamaitai na valaau i le Ofisa a Leoleo, lo la lagonaina ma sona uso laititi ia le faateteleina o le taugaupu a le ua molia ma lona toalua, ma o la o atu ai e taumafai e taofi ae o la vaaia ai le tu o le tina i le va o le ua molia ma sona alo, ae o lo’o taumafai le tina e taofiofi le ua molia.

Sa ta’ua e le tina le taumafai o le ua molia, e po ese ona lima ma u’una’i ese o ia, ma savali atu i le po foliga a lona alo.

Na mafai ona taofi e le tamaitai na valaau i leoleo, ma lona uso, ia le ua molia ma faatonu e alu ‘ese ma le fale, a leai, o le a valaau leoleo.  Ma na o latou vaaia le savali ese o le ua molia, ae mulimuli ane, o latou vaaia le nuti o le fa’ata o le latou taavale.

Ina ua taunuu leoleo ma le ua molia, i le Ofisa a Leoleo i Fagatogo, sa le mafai ona faia sana faamatalaga tusitusia, ona ua ova le faasuaava.

O moliaga o le tama o le aiga, e aofia ai Faitauga 1&2 o le Faao’olima i lona tulaga e tolu faapea ma Le Faitauga e 3, o le Faatupu Vevesi i totonu o le aiga.

O nei solitulafono o ni vaega o sauaga i totonu o le aiga, i le vaega ‘C’ o solitulafono mama, e mafai ona nofosala ai i le falepuipui i aso e 15, po o se sala tupe i le va o le $150 ma le $300; po o faasalaga uma e lua.

E $1,000 na faatulagaina e mafai ona tatalaina ai le ua molia, e faatalitali ai lona faamasinoga.