Ads by Google Ads by Google

Pasia Senate pili e fa’avae ai Matagaluega o Toese ma Falepuipui


[ata: foa'i]

Pago Pago - AMERIKA SAMOA

 

O le vaiaso ua te’a na pasia ai e le Maota Maualuga, le Senate, se tasi o tulafono tauaaofi a le faigamalo a Lemanu ma Talauega, e fa’avae ai le Matagaluega o toese ma fale puipui, e tu’afa’atasia ai tautua a le toese i Tafuna ma le falepuipui mo tamaiti - e pei ona i ai nei i lalo o le vaaiga a le Matagaluega a le Puipuiga o Saogalemu Lautele. 

 

O se vaega o le tulafono taufa’aofi o lo’o fa’ailoa ai e fa’apea, ua tele i latou taofia i le toese i Tafuna ua sosola ese mai lea nofoaga; ma o le naunautaiga o le Malo o Amerika Samoa ina ia taula’i i le fa’aleleia o le saogalemu o le atunuu e ala i le faatuina o se isi Matagaluega e vaaiga le toese ma le nofoaga o lo’o taofia ai tamaiti - Juvenile Detention Center. 

 

O lo o taua i le tulafono taufaaofi e tatau ona tofia e le Kovana se Fa’atonusili o leni matagaluega fou (Department of Corrections).

 

“O le Fa’atonusili e nafa ma le matafaioi mo pagota uma ma tamaiti o lo o taofia i le falepuipui i Tafuna ma le Falepuipui o Tamaiti,” ose vaega lea o le fa’aupuga o le tulafono taufa’aofi.

 

O le a va’ava’aia fo’i e le Fa’atonu le fa’atinoina o galuega a le Falepuipui i Tafuna, le Falepuipui o Tamaiti, ma so’o se isi nofoaga i Amerika Samoa o lo’o taofia ai pagota ma fanau laiti (mo pagota ua tofia i le Vaega o le Soifua Maloloina, e tatau i le Fa’atonu o le Matagaluega ona i ai matafaioi fa'atasi mo le puipuiga ma le Falema'i i Amerika Samoa); ma fa'atumauina nofoaga saogalemu ma malupuipuia mo le taofia o i latou o lo'o tu'uina atu i lea matagaluega fou. 

 

O isi tiute o le faatonu e aofia ai:

 

• Ina ia unaia le toefuataiga o pagota ma tamaiti o loo taofia, ia mautinoa o tagata ua tuuina atu i lea matagaluega latou te maua meaai talafeagai, fale, ma tausiga faafomai; fa'avae ma fa'amalosia tulaga tusitusia e fa'amautinoa ai le usita'ia o tulafono a Amerika Samoa. 

 

• Ia talia pagota uma ua pu’e fa’atulafonoina e so’o se ali’i fa’amalosi tulafono o lo’o iai le malosi e pu’e fa’apagota ai se’i vagana ua mana’omia e lea pagota ni togafitiga fa’afuase’i; felauaiga pagota i fa’amasinoga i soo se taimi ma nofoaga e manaomia e soo se faamasinoga a Amerika Samoa; taofia so'o se tagata ua fa'asala i le fa'afalepuipui mo le umi o lo latou nofosala fa'aletulafono, fa'afaigaluega tagata ofisa ma tagata faigaluega talafeagai e fa'atino o latou tiute e pei ona mana'omia e lenei suafa; ma faalauiloa tulafono e manaomia e faatino ai le faamoemoe o lenei suafa e tusa ai ma isi vaega o le tulafono a Amerika Samoa. 

 

Ua tuuina atu lea tulafono taufa’aofi i le Maota o Sui e faia i ai sa latou fa’aiuga. 

 

O lo’o manaomia e le faigamalo a Lemanu ma Talauega pe pasia vave e le Fono Faitulafono lenei pili, ae le’i ma’ea galuega o le nofoaiga lenei a le Fono Faitulafono.