Vaega 159

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O OE O LO’U TAMA” i lona

vaega e 159.

**************************************

Ua mae’a le molimau a le tamaloa o Semi Tagaloa, ae o le taimi lena i totonu o le potu faamasino, ua leai ma seisi e toe pisa, po o se mea e toe gase.

Ae ua lologo uma taliga o tagata e faalogologo i le molimau a Semi.  Ma sa ia fa’amaonia ai le molimau a le tamaloa o Alesana, i le mea tonu sa tupu a’o latou talavou ma le mafuaaga moni na maliu ai le atalii a le ulugalii mau’oa.

Sa faapea foi ona molimau Semi i le fa’amalosia o ia i lona talavou e ‘au i le faamatalaga lea na tu’ua’ia ai le tamaloa o Alesana, i le maliu o le uo mau’oa a Semi.

E mae’a ifo le molimau a Semi, ua pei o se paipa ki le maligi o loimata a le tamaloa o Alesana, ona ua pei o se mase’i atu o se avega mamafa, ua leva ona ia amo i ona tau’au.

Ina ua mae’a le molimau a Semi, sa fa’atonuina loa o ia e le faamasino ina ia toe fo’i mai I lona nofoa.

Ma ina ua o’o mai le savali a le tamaloa o Semi i le mea o nofo atu ai le tamaloa o Alesana, na tu ifo i luga Alesana ma tu’u atu lona lima ma pu’e mai le lima o Semi ma lu lu ma le malosi, ae o malaga pea ona loimata.

Ua liliu ma nei le alii faamasino ma ia faapea mai, “Atonu ua mae’a ai i’i ia molimau o lenei mataupu.  Ma o le a taoto mai loa i le faamasinoga, se’i iloiloina ia nei molimau ma lenei mataupu, ona tu’uina atu ai lea o sana fa’ai’uga, i le aso Gafua o le vaiaso fou.”

[E FAIA PEA]