VAEGA 158

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

*************************************************

Sa gata mai le tatou Fagogo i le vaiaso ua mavae, ina ua fesiligia e le alii faamasino ia le tamaitai loia, o Ruta, pe iai se molimau e mafai ona fa’amaonia ia tulaga uma sa molimauina e le tamaloa o Alesana.

Na tula’i lemu ifo lava i luga Ruta ma amata ona tali atu i le faamasino, e leai se molimau, ae fa’ate’ia o ia, aemaise o le tamaloa o Alesana ma tagata uma sa i totonu o le potu faamasino, i se leo na tali mai i le pito i tua o le potu, o faapea mai, “E iai le molimau”.

Sa tau fai liliu uma tagata i tua o le potu faamasino, i le mea sa sau ai le leo o le tagata lea na tali mai i le fesili a le faamasino.

Ma sa matua’i fa’ate’ia le tamaloa o Alesana ina ua ia va’ai atu, o tu mai ai le tamaloa o Semi lea na ia fiu e tulituli.

“O ai lou suafa?” o le fesili mai lea a le alii faamasino ia Semi.

“O Semi Tagaloa,” o le tali atu lea a Semi.

“O le a lau faia i lenei mataupu?” o le toe fesili mai lea a le alii faamasino.

“O la’u molimau lea sa lokaina ai ia le susuga ia Alesana.  O la’u molimau lea na avea ma molimau autu a le malo i le taimi na tupu ai le faalavelave,” o le toe tali mai lea a Semi.

“Su su mai i le nofoa molimau, faamolemole,” o le fa’atonuga lea mai i le alii faamasino.

Ua savali atu nei Semi ma saofai i le nofoa molimau ma ua fa’atonuina e le faamasino ia le leoleo a le faamasinoga, ina ia fa’atautoina ia Semi.

Sa faapena ona fai.  Ona fa’atonuina lea e le alii faamasino ia Semi ina ia ta’u lona igoa atoa aua fa’amaumauga a le faamasinoga.

Ua mae’a ona fa’atauto ia Semi ona liliu atu loa lea o le alii faamasino ma ia fesili atu ia Semi, “O e silafia, afai ae ou faamaonia lau molimau i lenei aso, e te ono lavelavea ai i tulaga o le tulafono?”

“O lea lava,” o le tali mai lea a Semi.

“Ia ua lelei, ae amata mai lava i le amataga lau molimau faamolemole,” o le toe tala mai lea i le alii faamasino.

Ma ua faapea loa ona amata le faamatalaga a le tamaloa o Semi.

[E FAIA PEA]