Vaega 151

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O OE O LO’U TAMA” i lona vaega e 151.

*********************************************

Ua tutula’i le faamasinoga, ae tu’umuli atu le alii faamasino.  E le’i toe nonofo lelei ifo i lalo tagata sa i totonu o le potu faamasino, ae tu tu a’e i luga ia le ulugalii matutua lea sa nonofo mai i le pito i tua, ma savavali sa’o atu lava i le laulau o lo’o nonofo mai ai Ruta ma Alesana ma faapea atu le fafine ia Alesana, “O le a le uiga o lenei mea ua e toe faia? E le’i lava le tiga sa o ma mafatia ai i le maliu o si a ma atalii?”

Sa matua’i fa’ate’ia le tamaloa o Alesana i le fesili a le fafine ma sa ia taumafai e tali mai le fafine, ae peitai, ua tu a’e i luga le teine o Ruta, po o lana loia, ma faapea atu i le ulugalii.  “E faamalie atu, ae e leai se faamatalaga a le susuga ia Alesana e mafai ona fai atu ia te oulua  le taimi nei.”

Ma tago atu lava le teine ua toso atu i luga lona tama ma ta’ita’i atu aga’i i le faitoto’a.

“Ou ke ofo i se kou le alolofa,” o le vala’au mai lea a le fafine ma tagi leotele.

E alu lava la ia le tamaloa o Alesana, ae na toe autilo mai lava i tua i le tu tu atu a le ulugalii.  Ina ua o la taunu’u i fafo ma le potu, na faapea atu Ruta i lona tama, “Aua e te faia se tala i so’o se tasi.”

Ae o le taimi foi lea ua taunu’u atu ia le fafine o Eseta ma le la fanau o Iakopo ma Naomi ma le alii fomai o Taki.  Sa fa’atonuina loa i latou e Ruta, ina ia fai se li’o i le latou tama ae savavali sa’o lava i fafo i le latou taavale.

Ma sa faapena ona faia ma agai atu ai loa le aiga i fafo o le fale faamasino, ae o le taimi tonu lava lea na taunu’u atu ai vaega fa’asalalau ma taumafai e fesiligia le tamaloa o Alesana e tusa ai ma lana mataupu.

Sa faapea ona u’una’i e Ruta ia lona tina ma nai ona tei e ave le latou tama i fafo i le taavale, ae ua ia liliu atu i vaega fa’asalalau ma faapea atu iai, “O lea e matou te taumfaai e fa’asa’o se sese na a’afia ai le olaga o se alii talavou i tausaga ua tuanai.”

Ae o le taimi lea, na tepa atu Ruta i leisi itu, o lo’o tu tu mai ai lava le ulugalii mau’oa ma tilotilo mai ia te ia.

[E FAIA PEA]