Vaega 145

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi. Ae sagai mai loa, o le a toe sosoo atu le tatou Fagogo, “O OE O LO’U TAMA” i lona vaega e 145.

********************************************

Ua savali ese atu nei ia le tamaloa o Alesana ma lona atalii o Iakopo mai i le ofisa a le alii o Semi Tagaloa.

Na va’aia e Alesana le fa’ano’uno’u o le savali a si ona tama, e foliga mai e le’i i’u manuia lana taumafaiga ia Semi.

Ina ua o la taunu’u i totonu o le taavale, na umi se taimi o saofafa’i  le to’alua lea e aunoa ma se tala e fai e seisi o i la’ua.

Ae o Iakopo ua na o le fia ma tilotilo i foliga o si ona tama, le tamaloa o Alesana, e taumate lagona o lo’o ia faalogonaina i lea taimi.

Na umi a se taimi o nofo le tamaloa o Alesana e aunoa ma se faamatalaga, ona ia faapea mai lea, “Ia o lena.  Ua leai seisi mea e mafai ona toe fai.”

“Fai mai e a Semi?” o le fesili atu lea a Iakopo i lona tama.

“E le o ana upu ae o ona lagona fa’aalia sa ou maitauina,” o le tala lea a Alesana.  Ma na matua’i fa’ate’ia Iakopo i leisi faaupuga a lona tama.  “Talofa e ia Semi.  I le mamafa o le la avega o ia tau’aveina.”

“O le a le uiga o lau tala Dad?” o le toe fesili atu lea a Iakopo i le tamaloa o Alesana. 

“Iakopo, ou te mana’o e te folafola mai, po o le a se mea e tupu i lou olaga, ia aua lava ne’i e fa’amuamua tupe ma ‘oa o lenei lalolagi, i lo le avea o oe ma se tagata faamaoni ma le alofa,” o le faapea atu lea a Alesana i lona atalii.

“O le mafua’aga lea ausulusulu ma lafi solo ai Semi, ona sa sili atu lona fiafia ma mana’o i tupe ma ‘oa o lenei olaga, ae ua i’u ai ina mamafa le avega ua ia tau’aveina mo aso o totoe o lona ola,” o le toe upu lea a Alesana ma o la o ‘ese atu loa ma lona atalii.

[E FAIA PEA]