Ads by Google Ads by Google

Nofovaavaaia mo le 12 masina se sui o le ‘Magic Circus’ mai Samoa


[ata: foa'i]
ausage@samoanews.com

E 12 masina lea ua faanofovaavaaia ai e le Fa’amasinoga Fa’aitumalo se ali’i sa avea ma sui o le vaega faafiafia mai Samoa, le Magic Circus of Samoa, ina ua ta’usala o ia i le moliaga mama o lona faia o gaioiga e lamatia ai le saogalemu o fanau laiti, e mafua mai i le fa’alavelave lea na manu’a ai se tamaititi e 9 tausaga ina ua ia tosoina.

 

Na fa’ailoa e le afioga i le ali’i Fa’amasino ia Fiti Sunia i le ali’i o Teodore Sefo Willie i le taimi na lau ai lana fa’asalaga i le vaiaso na te’a nei, na mafua ona malaga mai i Amerika Samoa, “na sau e fa’afiafia fanau laiti a Amerika Samoa, ae le i sau e fa’asaua ma lepeti lo latou saogalemu.”

 

E pei ona taua i fa’amaumauga a le fa’amasinoga, o le aso 30 o Setema 2018 na loka ai e Leoleo ia Willie, ona o se fa’alavelave na manu’a ai se tamaititi e 9 tausaga le matua. O lea fa’alavelave e pei ona taua e le malo, na mafua mai ina ua ‘ona le ua molia ma ia fa’aumuumu ai i nofoaga faitele.

 

Na aga’i atu le tamaititi na a’afia e fia vaai poo ai o loo pisa ma leoleoa, peita’i na tago atu i ai le ua molia ma toso le tamaititi i luga o le mutia ma manu’a ai ona foliga.

 

Na molia Willie e le malo i moliaga mama e 3 e aofia ai le faaoolima i le tulaga 3, faatupu vevesi i nofoaga faitele, faapea ai ma le faia o gaioiga e lamatia ai le saogalemu o fanau laiti. Ae i lalo o se maliliega na sainia e Willie ma le malo, sa ia tali ioe ai i le moliaga o lona faia o gaioiga e lamatia ai le saogalemu o fanau laiti, ae solofua e le Fa’amasinoga isi moliaga sa totoe ai.

 

Na ulufale mai Willie i Amerika Samoa i le pemita e 30 aso le umi, o ia o se vaega o le Magic Circus of Samoa, e galue o se Leoleopo i le faitoto’a.

 

Saunoa le afioga i le ali’i Fa’amasino ia Sunia e fa’apea, o le itu e laki ai, na vave ona taofia le gaioiga a le ua molia sa faia i le po na tula’i mai ai le fa’alavelave, ona ua tulioso atu nisi sa i ai ma aveese mai le tamaititi.

 

Saunoa atili Sunia e fa’apea, o Willie na malaga mai o se sui o le Magic Circus of Samoa, ae ina ua molia o ia i lenei mataupu, sa fa’atulaga ai e le fa’amasinoga le $500 e tatala ai o ia i tua, peita’i, talu mai lava lea taimi, e lei tatalaina lava e le sponsor poo le Pule a le ua molia o ia i tua.

 

“O lea la ua toe fo’i le Magic Circus i Samoa, toe fo’i atu ai ma le Pule a le ua molia, ae ua leai se isi e manatu na te totogiina le tupe sa fa’atulaga e le fa’amasinoga,” o le saunoaga lea a Sunia.

 

Na taua fo’i e Sunia le tele o manatu e fia talanoa i ai le Fa’amasinoga e fa’atatau i lenei mataupu, peita’i ua manatu le fa’amasinoga e taofi lea tulaga.

 

Na pau le tulaga na fa’amamafa e le ali’i  Fa’amasinoga, o Willie na ulufale mai i le teritori e faigaluega, ae ina ua saisaitia i le tulafono, sa taofia ai loa i le toese a o lea ua toe fo’i lona Pule i Samoa. Sa alu tupe a tagata totogi lafoga e fafaga ma tausi ai o ia i totonu o le falepuipui.

 

“E le o oe o se tagata nofomau i totonu o le teritori nei, e le o oe fo’i o se tagata totogi lafoga, a o lea ua e sau ma fa’atupu manu’aga i fanau a le atunu’u,” o le saunoaga lea a Sunia ia Willie.

 

“Na e sau iinei e fa’afiafia a matou fanau, ae le o le fa’atigaina ma faia gaioiga e lamatia ai lo latou saogalemu. O le itu e laki ai, na avea tagata sa i ai e taofi lau gaioiga ma itu e le i matuia ai manu’a sa a’afia ai lenei tamaititi.”

 

E 12 masina lea ua faanofovaavaaia ai Willie e le fa’amasinoga i lalo o tuutuuga faapitoa, na te tuua le teritori ma toe fo’i atu i Samoa, ma aumau ai mo le umi o lana nofovaavaaia.

 

Na taua e Sunia e faapea, e leai se salatupe e tuuina atu e le fa’amasinoga mo Willie, aua e le iloa poo ai e totogia, o lea ua toe fo’i le Pule o le Magic Circus i Samoa.

 

Na fesili Sunia i le loia a le malo, poo ai e totogia le pili o le eletise, pili o le vai, o le fale ma meaai na tausi ma fafaga ai le ua molia a o i ai i le toese.

 

O le aso Faraile lava na te’a nei na toe fo’i atu ai Willie i Samoa.