Molimau le tama’ita’i na a’afia i le fa’amasinoga autu a Sione Setu
O le ulua’i molimau na valaau e le malo e lagolagoina ai le latou tagi fa’asaga i le susuga a Sione Onelei Setu, o le tama’ita’i e 17 tausaga le matua, lea o loo faapea mai le malo, o ia lea na a’afia i le solitulafono o loo tu’uaia ai Setu i le aso 26 Aperila o le tausaga na te’a nei, i le taimi a o 15 ona tausaga le matua.
O Setu, o se faiaoga mai le aoga maualuga a Tafuna, o lo o tu’uaia i le moliaga mamafa e tasi o le tagofia lea o itutinosa o se tama’ita’i e talavou i lalo o le tulafono.
Na taua e le tama’ita’i na a’afia i lana molimau e fa’apea, i le aso na tula’i mai ai le fa’alavelave, sa i ai o ia i totonu o le vasega mo le mataupu o le Numera, lea sa fa’atautaia e le ali’i faiaoga o Setu.
Na mae’a le vasega ona nofo lea se’i fesili ia Setu mo le fa’amalamalamaina o nisi o mataupu e le o malamalama ai.
Ina ua taape uma ese atu tamaiti o le vasega, na ia alu atu ai loa ma saofa’i i luga o le nofoa o loo i le pito i tua o le potu. Na savali atu fo’i Setu ma saofa’i atu i ona tafatafa ma fesili atu e fa’amanino atu le mataupu o loo ia fia malamalama ai.
Na taua e le tama’ita’i na a’afia i lana molimau e fa’apea, a o nofo atu Setu i ona tafatafa, na fa’ateia o ia ina ua amata ona ia tago atu i lona vae, sosoo ai loa ma lona tago atu ua milimili lona ogavae ma fa’asolo atu ai lona lima i le vaega o loo i ai lona itutinosa.
Na fesili le loia a le malo ia Christy Dunn i le molimau, pe sa tago Setu i lona itutinosa, na tali le molimau, e leai, se’i vagana ai lona ogavae.
Ina ua mae’a ona faia e Setu o lea gaioiga, na ia tula’i ai loa i luga ma savali atu ua loka le faitoto’a pito i tua o le potu. Sa toe savali atu ma toso ane le laupapa e tusi ai mataupu a le vasega ma pupuni ai le fa’amalama o le potu, ina ia faigata ai ona iloa mai e ni tagata totonu o le potu, ma savali atu ai loa ua toe saofa’i i tafatafa o le tama’ita’i na a’afia.
O le taimi lea na ia tago atu ai loa i le fatafata o le tama’ita’i na a’afia, a o ia musumusu atu i se leo malu e fa’amatala atu le mataupu o loo fia malamalama i ai. Na taua e le tama’ita’i na a’afia lona fefe i le taimi lea.
Ina ua sauni o le a ia tuua le potu, sa punou i lalo e piki mai i luga lana api sa pau, peita’i na fa’ateia o ia ina ua ia fa’alogoina le tago atu o le lima o Setu i lona nofoaga.
Na aga’i atu le na a’afia ma fa’amatala i lana uo le mea sa tupu. Sa ia fa’amatala fo’i i lana faufautua i le aoga, o le sui pule o le aoga, faapea ai ma lona Tina. O le logoina ai o lona Tina i le mataupu, na la aga’i atu ai loa ma lona Tina ma faila le tagi i le ofisa o Leoleo.
O le taeao na sosoo ai, na aga’i atu ai Setu ma fa’anoi mai o ia mai lana vasega, ona e fia talanoa ia te ia. Ina ua la talanoa, na taua e le tama’ita’i na a’afia le talosaga atu o Setu ia te ia, ina ia taofi lona toe fa’asalalauina o tala e fa’atatau ia te i laua, a ia natia lava i lo la va le mea sa tula’i mai.
Ina ua maua le avanoa o le loia a Setu ia Marcellus T. Uiagalelei e fesiligia ai le molimau, sa ia fesiligia ai loa o ia pe sa tuu atu sana fa’amatalaga tusitusia i Leoleo e uiga i lenei mataupu. Na tali le molimau, ioe.
“E sa’o la pe a ou fa’apea atu, e le i fa’aaogaina i lau fa’amatalaga sa tuuina atu i Leoleo le upu “susu”, se’i vagana ai lou fa’aaogaina o le fa’aupuga lea, sa tago atu Setu i lou fatafata,” o le fesili lea a Uiagalelei i le molimau. Na tali le molimau, “O lea lava, na fa’atoa ia fa’aaogaina lava le upu “susu” ina ua toe fesiligia o ia e le loia a le malo e sauni ai mo le fa’amasinoga.”
Na taua e le tama’ita’i na a’afia, na loka e Setu le faitoto’a pito i tua, ae sa matala pea lava le faitoto’a pito i luma o le potu sa la i ai. Sa ia taua fo’i se fa’alavelave na tula’i mai i aso e 2 ao lumana’i ai le fa’alavelave e pei ona tula’i mai i le aso Lulu, Aperila 26.
O lea fa’alavelave, na aveese ai e Setu mea faalogo (earphones) mai ia te ia, ona ua alu tele lona ulu i le faiga o ana earphones ae leai ai ma sana meaaoga na faia.
Na fesili Uiagalelei i le molimau, pe sa’o na te lei ta’uina i le sui puleaoga se fa’amatalaga e fa’atatau i le tago atu lea o Setu i lona fatafata ma ona ogavae, na tali le molimau, o lea lava.