Ads by Google Ads by Google

Molia umia o fualaau fa’asaina se ali’i na fa’asa’oloto muamua Leoleo


[ata: foa'i]
ausage@samoanews.com

O le ali’i lea na tatala ma fa’asa’oloto e Leoleo ina ua mae’a ona latou maua se vaega tele o fualaau fa’asaina i totonu o pikiapu sa malaga ai lea ali’i, na pu’e fa’apagota e Leoleo i le po na sosoo ai ma molia loa i le umia fa’asolitulafono o vaega o le pauta oona o le aisa.

 

E tasi le moliaga lea ua molia ai e le malo le ali’i o Pio Atonio. O lea moliaga, o lona umia fa’asolitulafono lea o vaega o le pauta oona o le aisa. O lea moliaga o se vaega D lea o solitulafono mamafa, lea e mafai ona fa’asala ai se tasi i le toese mo le umi e le itiiti ifo i le 5 tausaga, ae le sili atu fo’i i le 10 tausaga, poo le fa’asala fo’i i le salatupe e le itiiti ifo i le $5,000, ae le sili atu fo’i ma le $10,000.

 

O le vaiaso na te’a nei na tula’i ai Atonio i luma o le fa’amasinoga fa’aitumalo mo lana ulua’i tula’i, ma fa’atulaga ai loa lana mataupu e toe fofogaina i le aso Tofi na te’a nei, lea na fa’amoemoe e faia ai lana ulua’i iloiloga.

 

Ae talu ai na manatu le ua molia e fa’aagafua ona aia tatau fa’aletulafono ina ia le fa’ataunuuina ai lana ulua’i iloiloga, na tofu atu ai loa lana mataupu i luma o le fa’amasinoga maualuga mo le fa’aauauina ai o ana iloiloga o loo totoe.

 

O le aso Faraile la na te’a nei na tula’i ai Atonio i luma o le fa’amasinoga maualuga, ma ia teena ai le moliaga e tasi o loo tu’uaia ai o ia e le malo. O le masina o Iulai lea ua fa’atulaga e toe valaau ai lana mataupu, ma ua toe taofia nei o ia i le toese e fa’atali ai le aso lea ua fa’atulaga e toe tula’i ai, ina ua le mafai ona ia totogi le tupe e $5,000 ua mae’a ona fa’atulaga e tatala ai o ia i tua.

 

E tusa ai o le tagi a le malo o loo taua ai e fa’apea, o le po o le aso 16 Me na taofia ai Leoleo se pikiapu i Iliili ona ua mae’a le aoga o le laisene o lo o fa’apipi’i i le pito i tua o le ta’avale.

 

I totonu o le ta’avale sa i ai le ave ta’avale, o ia lea o Suilefaiga Toala, ma ali’i se to’alua, o Foketi Misi Siua ma Atonio.

 

Ina ua saili e Leoleo le ta’avale ma maua ai fualaau fa’asaina, na molia ai loa le ave ta’avale ia Toala i le umia fa’asolitulafono o fualaau fa’asaina, faapea ai ma le moliaga o le umia faasolitulafono o fualaau fa’asaina ma le fa’amoemoe e tulei pe fa’atau atu i isi tagata.

 

O le mae’a ai o suesuega a Leoleo, na toe fa’asaoloto ai loa Siua ma Atonio i le po lea e lei molia i laua.

 

O le po na sosoo ai, Me 17 i luga o le auala a le malo i Tafuna, na taofia ai e Leoleo se pikiapu sa vaaia le faaletonu o moli pito i luma. O le Leoleo lea sa taofia le ta’avale a Toala i le po ua mavae, o ia lava fo’i lea na taofia le pikiapu i le po na sosoo ai. I totonu o le pikiapu o loo i ai ni ali’i se to’alua.

 

Ao talanoa le Leoleo i le ave ta’avale, na vave ona toe manatua e le Leoleo, o le ave ta’avale lea sa i totonu o le ta’avale a Toala, lea na toe fa’asaoloto i le po ua mavae, le susuga a Siua. Mulimuli ane na toe iloa e le ali’i Leoleo, o lo o i ai se isi tagata o loo to’alua ma Siua i totonu o lana ta’avale, o ia lea o Atonio, lea fo’i sa fa’asaoloto i le po ua mavae.

 

Talu ai le fia maua e Leoleo o ni fa’amatalaga e fa’atatau i le mataupu a Toala, na mafua ai ona talosagaina Siua ma Atonio e malaga fa’atasi ma Leoleo i le Ofisa o Leoleo i Tafuna mo le fa’atalatalanoaina o le mataupu a Toala.

 

O ti’eti’e atu Siua i lana pikiapu ae ave atu e le Leoleo lana ta’avale, ae o Atonio na alu atu o ia i le ta’avale a Leoleo. Sa vaaia e Leoleo foliga le mautonu o Atonio ina ua fa’atonuina o ia latou te malaga i le Ofisa o Leoleo mo le fa’atalatalanoaina o le mataupu a Toala.

 

Na musu o ia e o ma Leoleo, ae ina ua fa’atauanau atu pea Leoleo ia te ia, sa ia malie ai loa ma alu atu ua oso i totonu o le ta’avale a Leoleo ma aga’i atu loa i le Ofisa i Tafuna.

 

Ina ua taunu’u le ta’avale a Leoleo lea sa malaga atu ai Atonio i le Ofisa o Leoleo i Tafuna, sa fa’atonuina ai loa o ia e oso i fafo ma le ta’avale ma aga’i atu i totonu o le Ofisa. O le taimi na oso ai Atonio i fafo mai le ta’avale a Leoleo, na vaaia ai le toulu mai o ni pepa iila laiti mai le nofoa sa nofo ai.

 

Na fesiligia e Leoleo ia Atonio poo a nei pepa ua toulu mai i fafo o le ta’avale, ae na tali le ua molia na te le iloaina.

 

Na saili e Leoleo le vaega o le ta’avale sa nofo ai Atonio, ma maua ai isi pepa iila laiti, atoa ai ma se tama’i ato uliuli e fusi i le manava. I totonu o lea tama’i ato fusi manava sa maua ai e Leoleo i totonu se paipa tioata, lea e fa’aaoga e tagata e ula ai le pauta oona o le aisa. I totonu o le paipa o loo i ai vaega o le pauta pa’epa’e, lea na faia i ai se suega ma fa’amaonia ai, o vaega ia o le pauta o le aisa.

 

Ina ua fesiligia e Leoleo ia Atonio e uiga i le paipa, o le tama’i ato atoa ai ma pepa iila, e tasi lava lana tali, na te le iloaina poo ai e ana ia mea.

 

O le mae’a ai ona fesiligia e Leoleo o Atonio, na taofia ai loa o ia i le toese ma molia i le umia faasolitulafono o fualaau fa’asaina.

 

E le i molia e le malo ia Siua, ae na toe fa’asa’oloto o ia i le po lava lea ina ua mae’a ona suesue ma fesiligia o ia e Leoleo.