O le vaiaso na te’a nei na taofia faapagota ai e Leoleo se ulugali’i ona o tu’uaiga i lo la auai lea i se gaioiga e fa’aaoga faagaoi ai le eletise mai le Pulega o le Eletise ma le Suavai a Amerika Samoa (ASPA) i se auala faasolitulafono, e aunoa ma se faatanaga mai le Pulega o le Eletise ma le Suavai.

E na o le ulugali’i na mafai ona pu’e faapagota e Leoleo ma molia i le Tulafono, ae o lo o tau sailia pea e Leoleo le tuagane o le fafine lea fo’i o lo o tu’uaia i lona aafia ai i lenei mataupu.

O le vaiaso na te’a nei na tutulai ai Michelle Aetui-Fuimaono ma lona to’alua o Kirk Aab i luma o le Faamasinoga Faaitumalo. O lo o molia i laua i le moliaga e tasi o le faia o gaioiga faasolitulafono, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, pe faasala foi i faasalaga uma ia e lua.

E $5,000 lea ua faatulaga e le Fa’amasinoga e tatala ai Aetui-Fuimaono ma Aab i tua mai le Toese i Tafuna. 

O le vaiaso nei lea ua faatulaga e faia ai le ulua’i iloilioga o lenei mataupu i luma o le afioga i le ali’i Fa’amasino ia Elvis P. Patea.

TAGI A LE MALO

O lenei mataupu na tofu atu i le Ofisa o Leoleo i Tafuna i le aso 22 o Aperila, ina ua talosagaina e se sui o le Ofisa o le Pulega o le Eletise ma le Suavai se fesoasoani a Leoleo, i se mataupu na tula’i mai i Futiga i le fanua o le au aiga o Aetui.

E to’atele Leoleo na tali atu i lea valaau ma maua ai loa le avanoa e fesiligia ai alii faigaluega o le Pulega o le Eletise ma le Suavai sa i ai i le nofoaga na tula’i mai ai le faalavelave, faapea ai ma i laua ua molia i lenei mataupu.

O le mae’a ai ona tu’u fa’atasia e Leoleo o faamatalaga mai le nofoaga na tula’i mai ai le faalavelave, na faia ai loa le faaiuga ina ia auina atu i laua ua molia atoa ai ma alii faigaluega o le Pulega o le Eletise ma le Suavai i le Ofisa o Leoleo i Tafuna mo suesuega atili.

Na taua e se sui o le Pulega o le Eletise ma le Suavai i Leoleo e fa’apea, e to’atolu i latou na tofia e galulue i le faaleleia o nisi o laina eletise i le itu i sisifo o le atunu’u e aofia ai ma le afioaga i Futiga. Sa faasolo le latou galuega asiasi ma oo atu ai loa i le fanua o le aiga o Aetui i Futiga.

A o faia la latou galuega, na mafai ona iloa e ese tasi o alii o le latou vaega se uaea eletise o loo sau mai luga o le pou uila a le ASPA ma aga’i atu i le fale o le aiga o Aetui. O lea  uaea eletise o loo tanu i lalo o le palapala ae faapipii aga’i i le pou uila, o se taumafaiga ina ia faigata ai ona iloa e se tasi poo sui o le Pulega o le Eletise ma le Suavai pe a faatino a latou galuega.

Na faailoa e le aufaigaluega i le latou Ta’ita’i sa i ai i le taimi lea le tulaga e pei ona maitauina, ma faia ai loa le faaiuga a le Taitai e tipi le uaea ina ia motusia ai le toe sapalai atu o le eletise i le fale o le aiga o Aetui. O le taimi fo’i lea na latou faailoa ai i le aiga o Aetui le gaioiga ua faia ona o le solitulafono o le auala na latou maua ai le eletise e aunoa ma lo latou totogiina atu o se tupe.

Na matua le fiafia Aetui-Fuimaono ma lona to’alua ia Aab i le taimi na logo atu ai e alii faigaluega o le Pulega o le Eletise ma le Suavai le gaioiga ua latou faia i le uaea eletise lea na ta’i faanana mai luga o le pou uila ma aga’i atu i le latou fale.

O le ova o le ita ma lagona le fiafia o le ulugali’i, na faatino lea e ala i le la lafo o upu palauvale aga’i i ali’i faigaluega o le Pulega o le Eletise ma le Suavai atoa ai ma le lafo i ai o upu tau faamata’u. Sa i ai ma le tuagane o Aetui-Fuimaono i le gaioiga e lafo upu mataga ma faia folafolaga tau faamata’u.

Na taua e se alii faigaluega i Leoleo e fa’apea, o Aetui-Fuimaono na savali atu ma palauvale atu ia te i latou, ae o lona to’alua o Aab na savali atu ma le Suo ma ia folafola lona sasaina o le ulu o le tagata ona o le soli atu fua o le fanua e aunoa ma se faatanaga. Sa faapea fo’i ona lafo e Aab upu palauvale i alii faigaluega.

O le tuagane a Aetui-Fuimaono, lea fo’i o lo o ta’u lona igoa i totonu o le tagi a le malo, sa ia savali atu ma tu i le faitoto’a o le fale ma se fana o loo u’u i lona lima, ma foliga mai o lo o ia faia ni gaioiga e faamata’u ai ali’i faigaluega, ma valaau atu i ali’i faigaluega e o ese ma le fanua.

Na faafesoota’i e se ali’i faigaluega le Ofisa autu o le Pulega o le Eletise ma le Suavai, ma fesili i ai i le taimi mulimuli na motusia ai le eletise a le aiga o Aetui. Na taua e se sui o le Ofisa autu, o le pili moli mulimuli lava a le aiga na totogi lea e Aetui-Fuimaono i le masina o Me 2018. O le latou pili moli o lo o i ai e le i totogiina lava e tusa ma le $6,500, a o lea ua latou faia le gaioiga faasolitulafono e toe faaola ai le eletise i le latou fale, e ala i le ta’i faagaoi o le uaea mai luga o le pou uila e aga’i atu i le latou fale.

Na taua e le isi alii faigaluega a le Pulega o le Eletise ma le Suavai ina ua fesiligia o ia e Leoleo, lona fefe ma le mata’u ina ua vaaia le aga’i atu o le aiga o Aetui ma laulauvavale atu a o faatinoina a latou tiute. I lona taofi, o lea ua tutuli ese i latou ae o loo faatino a latou galuega mo le manuia o le aiga o Aetui faapea ai tagata uma o le nu’u ma le atunu’u.

Sa taua e le ali’i faigaluega lea lona vaaia o le tuagane a Aetui-Fuimaono o savali atu i fafo ma valaau atu ia tei latou, e i ai lana fana o lo o i ai. Na savali le alii lea i totonu o le fale ma uu mai le fana, ona ia tu lea i le faitoto’a o le fale ma faaali atu ia te i latou le au o le fana, ae o lana vaai, e foliga mai o se fana tuai.

Na musu Aetui-Fuimaono e fai sana faamatalaga i Leoleo, se’i vagana ai Aab na malie e faasoa ma Leoleo e tusa ai o le fa’alavelave.

Ae mo le susuga na Ernie Aetui, o lo o tau sailia pea o ia e Leoleo i le taimi nei.