Ua molia nei e le malo se ali’i faigaluega mai le Ofisa o Ta’avale Afi i Tafuna (OMV), ona o tu’uaiga i lona faia lea o ni laisene ave ta’avale pepelo ma fa’atau atu i tagata ae maua ai ana tupe.

E 4 moliaga mamafa ua tu’uaia ai e le malo ia Matthew Tafua. O ia moliaga e aofia ai moliaga e 2 o le faia o fa’amaumauga tau fa’asese, atoa ai ma moliaga e 2 o le taliaina lea o ni taui tupe i ni auala fa’alilolilo.

O le aso Lulu o le vaiaso nei na tula’i ai Tafua i luma o le fa’amasinoga fa’aitumalo, ma fa’atulaga ai loa e le afioga i le ali’i fa’amasino ia Fiti Sunia le tupe e $10,000 e totogi, ona fa’atoa mafai lea ona tatala o ia i tua.

Afai ae mafai ona tatala Tafua i tua, ua poloaina o ia e le mafai ona ia tuua le atunu’u i soo se taimi, se’i vagana ua tuuina mai se poloaiga a le fa’amasinoga. Faasa ona ia taumafai e fa’afesoota’i molimau a le malo, a ia avea o ia ma tagatanu’u e tausisi i tulafono a le malo i soo se taimi, ma ia auai i taimi uma e valaau ai lana mataupu.

O le mataupu e pei ona tu’uaia ai Tafua, na alia’e mai ina ua taofia e Leoleo se pasi la’u pasese i Nu’uuli i le taeao o le aso 15 Setema, 2018 ona ua mae’a le aoga o le laisene e fa’ataga ai ona fealua’i i luga o le alatele.

O le mae’a ai ona faia o feutanaiga a le Komesina o Leoleo ia Le’i Sonny Thomson ma ni isi o Leoleo sa auai i lea taeao, na filifilia ai loa le ali’i Leoleo Suesue ia Det. Filemoni Amituana’i na te fa’atautaia le suesueina o lenei mataupu.

O le gaioiga muamua lava a le ali’i Leoleo Suesue sa faia, o le fesiligia lea o fa’amaumauga o le pasi mai le Ofisa o le OMV. Na fa’amaonia atu e le Ofisa, fa’atoa mae’a le aoga o le pemita o le pasi i le aso 30 o Setema. Ae ina ua siaki e Leoleo le laisene o le ali’i ave pasi, na iloa ai e pepelo lona laisene o lo o umia. O le ali’i ave pasi o Gasolo Gasolo. O lo o atagia mai i luga o le laisene ave ta’avale a Gasolo, o loo tusilima le saini a le Pule o le OMV, e le foliga tutusa ma le tele o laisene o lo o tuuina atu e le Ofisa i le to’atele  ave ta’avale.

A o fa’agasolo le suesuega, na ta’utino ai loa Gasolo i Leoleo, o lana laisene o se laisene pepelo na aumai i se tagata faigaluega o le OMV e suafa ia Matthew Tafua.

Na taua e Gasolo i se fa’atalatalanoaga ma Leoleo e faapea, i le aso 17 o Iulai 2018, na alu ai i le Ofisa o Leoleo i Tafuna e vaai se tama’ita’i Leoleo, e fia siaki togi o lana suega sa faia, peita’i na fa’ailoa ane e le tama’ita’i Leoleo ia te ia, e le pasi lana suega sa faia, ma ua toe tuu atu nei lona igoa mo le isi vaega o loo sosoo mai.

Ina ua aga’i mai i fafo mai le Ofisa o le Tama’ita’i Leoleo ia Gasolo, ae na fetaui ai ma Tafua i fafo, ma ia fa’amatalaina ai loa ia Tafua le fa’afituali ua tula’i mai, atoa ai ma lona naunau e fia maua sona laisene ave ta’avale. O le taimi lava lea na ofo atu ai loa e Tafua lana fesoasoani mo Gasolo, e ala i lona faia o se laisene ave ta’avale mo ia, ae tatau ona ia totogi atu le $60.

O le aso na sosoo ai, Setema 18, na toe fetaui ai loa Gasolo ma Tafua i le ofisa o le OMV, ma tu’u atu ai loa e Gasolo le $60 ia Tafua, ae tu’u atu fo’i e Tafua le laisene ave ta’avale i le lima o Gasolo. Na taua atili e Gasolo i Leoleo e fa’apea, sa i ai fo’i le isi ana uo e igoa ia Sautia Fiti na la o ia Tafua mo se laisene ave ta’avale, lea fo’i na totogi e lana uo o Fiti le $60 ia Tafua ae maua mai ai fo’i lana laisene ave ta’avale.

Na maua le avanoa e fesiligia ai e Leoleo le ali’i o Fiti i lona fale i Faleniu e tusa ai o lenei mataupu. Na faamaonia e Fiti i Leoleo lona totogiina atu o le $60 ia Tafua, ae maua mai ai lona laisene ave ta’avale. Na taua atili e Fiti i Leoleo e fa’apea, e le i alu lava o ia i se aoga ave ta’avale, pe su’e fo’i i se suega e maua ai sona laisene.

Na fesiligia e Leoleo le tama’ita’i Leoleo e tusa ai o lenei mataupu. Na taua e le tamaitai Leoleo e fa’apea, o le aso 11 o Setema a o fa’agasolo le latou poloka masani i luga o le alatele, sa ia taofia ai se pasi na fa’afoe e Fiti. Sa ia suesueina le laisene a Fiti ma fa’amaonia ai, e pepelo foliga o lona laisene.

Ina ua fesiligia Fiti, sa ia ta’utino atu ia te ia, o lana laisene na maua atu ia Tafua ina ua ia totogi ia Tafua le $60.

O le aso 17 o Setema na maua ai loa le avanoa o Leoleo e fesiligia ai Tafua e uiga i lenei mataupu. A o le i faia le fa’atalatalanoaga ma Leoleo, na muamua faitau aia tatau o Tafua, ma ia fa’ailoa ai i Leoleo lona malamalama i ona aia tatau, ae ua ia manatu fo’i e fa’aagafua ona aia, ae ua sauni e talanoa e fa’atatau i le mataupu.

Na ta’utino Tafua i Leoleo, e sa’o sa ia tuuina atu laisene ave ta’avale pepelo ia Gasolo mo le $30, ma le isi laisene ave ta’avale mo Natu Sio Jr i le $20.

Na fesiligia Tafua pe i ai ni isi ave ta’avale sa ia tuu atu i ai ni isi laisene ave ta’avale pepelo, na tali le ua molia, na te le o manatuaina igoa o i latou, ae i ai isi ave ta’avale sa ia tuu atu i ai laisene ave ta’avale pepelo i le tau e ta’i $20.

Na toe fesiligia e Leoleo ia Tafua i le mafua’aga o lona faia o lea tulaga, ae na tali le ua molia, o le gaioiga lea sa ia aoaoina mai i le isi tagata faigaluega a le OMV e igoa ia Sam Kolone ua fa’amalolo, o se auala e mafai ai ona maua se isi tupe fa’asili e fesoasoani ai i le laititi o lana siaki o loo maua.