HAWAII

O le aso Lua na se’i mavae atu nei, na tula’i ai i luma o le faamasinoga ia se alii leoleo na so’aina se ta’avale, i lana pasika leoleo, i le tausaga ua mavae, ma manu’a ai le aveta’avale.

Ua molia nei ia Vasai Isala Jr., i lona faia o se ripoti pepelo, i isi leoleo, ina ua pu’eina i luga o masini pu’eata a leoleo, lona fa’ailoa atu i seisi leoleo, e le o ia na mafua ai le fa’alavelave.

Sa iai se fuafuaga mo le fa’aleoina e Isala o lana tali e tusa ai ma ona moliaga, i luma o le Faamasinoga Faaleitumalo i Ewa, ae peitai, sa talosagaina e lana loia le toe tolopoina o lenei mataupu.

E le’i umi le iloiloga sa faia, e le’i atoa se sefulu minute.  Na auai uma atu ai ia Isala ma lana loia, ma e na’o le pau lava le taimi na saunoa ai Isala, o le taimi sa faaleoina ai lona suafa.

Ina ua fesiligia e le tamaitai faamasino ia Tracy Fukui, ia le loia e tusa ai ma le tulaga o le mataupu.  Sa tali mai Cameron Holm, o lo’o fia talosagaina le toe tolopoina o le mataupu, ona o lo’o manaomia se taimi e toe iloiloina ai tulaga na maua i lenei mataupu, ae e le’i faia se faaiuga pe talosagaina le faia o se faamasinoga.

Na taliaina e le faamasino ia le talosaga ma tu’uina atu i le itu tete’e ia le lua vaiaso e toe iloiloina ai molimau o lenei mataupu.

O le aso 17 o Tesema lea ua toe tolopoina iai le mataupu.

O lenei faalavelave na tula’i mai i le 15 masina talu ai, ina ua so’aina e Isala ia se taavale sa tu i ona luma i se moli, e tu lata i le Aloha Stadium.  Ma o lo’o ta’ua i fa’amaumauga le ‘oga’oga o manu’a o le avetaavale e 62 tausaga.

I le mae’a ai o suesuega, sa faamaonia ai, na mafua le faalavelave ona o Isala, ae peitai, e le o le faamatalaga lea sa faia e Isala i le leoleo na alu atu e su’esu’e le faalavelave i le aso na tupu ai.

O lo’o pu’eina i luga o masini pu’eata e la’ei e leoleo, le faamatalaina e Isala le so’aina e se pasi o le taavale.  Ae e le na’o le pau lea o faamatalaga eseese na ta’ua e Isala, i le mafuaaga o le faalavelave.

Sa le gata ina su’esu’eina o le faalavelave, ae sa faapea foi ona faia se su’esu’ega lotoifale i le ofisa a leoleo, e faasaga i le leoleo sa uluai taunu’u i le nofoaga na tupu ai le faalavelave.

E tusa ai ma se ripoti mai i le ofisa a leoleo, sa fa’aalia i su’esu’ega na faia, le auai atu o Isala i se pati ae e le’i tupu le faalavelave.  Ae peitai, sa fa’aalia i ripoti le leai o se su’esu’ega na faia ia Isala, e faamautu ai pe sa fa’asuaava o ia pe leai.

Na ta’ua foi i ripoti a le ofisa a leoleo, ina ua taunu’u atu leoleo e su’esu’eina le faalavelave, ua tu’ua e Isala le nofoaga na tupu ai le faalavelave.  Ae e le o ta’ua i totonu o le ripoti, po o fea sa alu iai Isala.

E le o manino mai lava i le taimi nei, pe na momoli e leoleo ia Isala i lona aiga ina ua mae’a ona tupu le faalavelave, ona sa masalomia lona fa’asuaava.

E le o se taimi muamua lenei ua su’esu’eina ai le susuga ia Isala, e pei ona ta’ua e le ofisa faasalalau a le Hawaii Nei Now (HNN).  I le 2016 na molia ai o ia i le fa’afoeina o se taavale ae o lo’o fa’asuaava, ma ia so’aina ai se pou uila, i Makakilo.

Ae peitai, sa faaleaogaina ona tu’uaiga ina ua tula’i se tasi o aiga a Isala mai i Amerika Samoa, ma molimau, o ia sa fa’afoeina le taavale, e le o Isala.