Ads by Google Ads by Google

Molia se faiaoga i lona faia o uiga mataga i ni fanau a’oga se to’atolu


[ata: SN]

Pago Pago - AMERIKA SAMOA

O le aso Faraile o le vaiaso ua tuanai, na tula’i ai i luma o le Faamasinoga Maualuga ia le alii faiaoga o Ketesemane Sitivi e tali i moliaga i lona faia o ni uiga mataga i ni tamaiti aoga se to’atolu.  O le amataga o le masina nei na pu’eina ma moliaina ai Sitivi i lenei mataupu.

E $15,000 le tinoitupe ua faatonuina e le faamasinoga e mafai ona tatala ai le ua molia, mai i le falepuipui.

E tusa ai ma le finauga a le Malo, o lenei mataupu na alia’e ona o se tagi na faaulu e se tina ia Mati 8, 2023.

O lo’o ta’ua i totonu o faamaumauga a le faamasinoga,  fanau aoga uma o lo’o a’afia i lenei mataupu, e ta’i 12 tausaga le matutua.

O lo’o ta’ua i totonu o faamaumauga e faapea, na faamatalaina e se tasi o alii na a’afia, i leoleo e faapea, o le aso 7 o Mati o le tausaga nei, na faatonu ai o ia e lona faiaoga e alu atu e lomi lona lima, ma o iina na faia ai e le faiaoga uiga mataga ia te ia.

Sa ta’ua e le tamaititi a’oga, sa ia taumafai e u’unai ese le lima o lona faiaoga, ae sa taumafai lava Sitivi e soso atu ia te ia.  I se taimi mulimuli ane, na faamatala ai e lenei tamaititi a’oga le mea na tupu ia te ia, i sana uo.

Na faapea foi ona faamatalaina e lenei tamaititi le mea na tupu i ona matua, ma o’o atu ai loa matua i le ofisa a leoleo ma faaulu ai le latou tagi.

O le tamaititi lona lua na a’afia i lenei faalavelave, sa ia faamatalaina e faapea, e le’i umi ona toe fo’i le tamaititi muamua i lona nofoa, ae taumafai le faiaoga e tagotago atu ia te ia.  Sa taumafai foi lenei tamaiti e tete’e atu le tagotago atu a Sitivi ae peitai, sa le’i faamanuiaina ana taumafaiga.

O le tamaititi lona tolu, sa faamatalina i leoleo, le atoa o le 5 minute o taumafai le alii faiaoga e tagotago atu ia te ia, i se auala le talafeagai.

Ina ua suesueina le alii faiaoga, sa ia faamaonia le faamatalaga a le tamaititi muamua, o le faatonuina o le tamaititi aoga e sau e lomi lona lima.  Sa ta’ua e le alii faiaoga, e moni e sese lana faatonuga ma e le o gatasi ma tulafono a le aoga.  Ae sa ia ta’ua e faapea, e na te le i iloaina sa latalata ona lima i itutino sa o le tamaititi aoga.

Sa ia te’ena foi lona faia o ni tulaga e pei ona ta’ua e le tamaititi a’oga lona lua ma le lona tolu.

O lenei faalavelave, e tusa ai ma faamaumauga a le faamasinoga, sa tula’i mai i totonu o le potu aoga a le Vasega 6 i le aoga tulaga muamua a Sagato Falanisisi (St. Francis).

I le amataga o le masina, na faasalalauina ai e le Ofisa o Aoga a le Ekalesia Katoliko i totonu o Amerika Samoa tulafono a le ofisa o aoga, e faasaina ai sauaga faafeusuaiga (sexual abuse) i totonu o le aoga.

Na ta’ua i lea faaaliga le iai o se popolega tele i faauluuluga ma le aiga faiaoga i le nofo puipuia o fanau aoga ma ua maea ona uia e le aoga auala e tatau ai, e tusa ai ma lipoti I lenei faalavelave matuia ua tula’i mai.

O lo’o ta’ua foi i lea fa’aaliga le tu’uina mai o le faatuatuaga a matua i ulu o aoga ma le aiga faiaoga, i le puipuiga o fanau a’o iai i latou i totonu o aoga.  Ma ua mae’a ona tofutofusia aoga uma a le Ekalesia Katoliko ma tulafono e avea ma taiala mo le puipuiga o alo ma fanau aoga.

O lenei fa’aaliga sa sau i tua o seisi foi faalavelave na tula’i mai i se taimi ua tuanai, ina ua molia seisi foi tagata e 19 tausaga, i lona faia foi o ni uiga mataga i ni tamaiti aoga se toatolu.  E ui ina sa ta’ua le na molia i lea faalavelave o se faiaoga, ae peitai, sa faailoa mai e le aoga, o lea tagata o se teufale ae le o se faiaoga.